រូបថត៖ ក្រសួងការពារជាតិអ៊ុយក្រែន
យ៉ាងហោចមនុស្ស ៩ នាក់ត្រូវបានសម្លាប់ និងមនុស្ស ៦៣នាក់ទៀតរងរបួសនៅក្នុងការវាយប្រហាររបស់រុស្ស៊ីទៅលើទីក្រុងកៀវ នៃប្រទេសអ៊ុយក្រែននៅយប់ថ្ងៃទី២៣ ខែមេសា។ ចំណែកមនុស្ស ២ នាក់ទៀតបានរងរបួសនៅទីក្រុង Kharkiv។
អភិបាលក្រុងកៀវ Vitali Klitschko និយាយថា ក្នុងចំណោមអ្នករងរបួស មានក្មេងៗចំនួន ៦នាក់។
លោកថា ការវាយប្រហារនេះបណ្ដាលឲ្យមានអគ្គិភ័យកើតឡើងនៅទីតាំងចំនួន ៦ ហើយមនុស្សជាច្រើនបានជាប់នៅក្នុងគំនរអគារបាក់បែក។
រដ្ឋមន្ត្រីមហាផ្ទៃអ៊ុយក្រែន Ihor Klymenko និយាយ គេបានឮសំឡេងហៅទូរស័ព្ទចេញពីគំនរបាក់បែក ហើយថា កិច្ចប្រឹងប្រែងជួយសង្គ្រោះកំពុងធ្វើឡើង។ តំបន់ផ្សេងទៀតក៏រងការវាយប្រហារដែរ ដូចជា Sumy និង Zhytomyr ប៉ុន្តែ ទីក្រុងកៀវរងគ្រោះខ្លាំងជាងគេ។
រូបថត៖ ក្រសួងការពារជាតិអ៊ុយក្រែន
យោធារុស្ស៊ីមិនបានធ្វើអត្ថាធិប្បាយអំពីការវាយប្រហារនេះទេ ប៉ុន្តែ បានអះអាងថា ពួកគេបានចាប់បានដ្រូនរបស់អ៊ុយក្រែនចំនួន ៨៧គ្រឿង ដែលក្នុងនោះមាន ២ គ្រឿងត្រូវបានចាប់បាននៅតំបន់នៃទីក្រុងមូស្គូ។
ការវាយប្រហាររបស់រុស្ស៊ី មានឡើងស្របពេលដែលកិច្ចចរចាបញ្ចប់សង្គ្រាមនៅអ៊ុយក្រែន ហាក់ដូចជាគ្មានពន្លឺនៅឡើយ ដោយប្រធានាធិបតីសហរដ្ឋអាមេរិក រិះគន់ប្រធានាធិបតីអ៊ុយក្រែន Volodymyr Zelensky សម្រាប់ការលើកឡើងពីការទាមទារតំបន់គ្រីមា (Crimea) នៅក្នុងការចរចា៕
រូបថត៖ ក្រសួងការពារជាតិអ៊ុយក្រែន
