ការទូតកំពូលរបស់អាមេរិកលោក Marco Rubio និយាយថា លោកមិនមានការរំពឹងខ្ពស់សម្រាប់កិច្ចចរចាសន្តិភាពអ៊ុយក្រែន-រុស្ស៊ី ដែលធ្វើឡើងនៅក្នុងប្រទេសតួកគីនោះទេ ហើយលោកបានលើកឡើងទៀតថា វត្តមាន ប្រធានាធិបតីលោក ដូណាល់ ត្រាំ និងប្រធានាធិបតីរុស្ស៊ី វ៉្លាឌឺមឿ ពូទីន មានភាពចាំបាច់ធ្វើឲ្យកិច្ចពិភាក្សាចរចាដំណើរការទៅមុខ។
លោកបាននិយាយបន្ទាប់ពីកិច្ចប្រជុំរបស់រដ្ឋមន្ត្រីការបរទេសណាតូ នៅភាគខាងត្បូងប្រទេសទួរគីថា៖ «ខ្ញុំគិតថាយើងមិនមានផ្លែផ្កាអ្វីកើតឡើងនៅទីនេះទេ រហូតទាល់តែប្រធានាធិបតី ត្រាំ និងប្រធានាធិបតី ពូទីន ធ្វើអន្តរកម្មដោយផ្ទាល់លើប្រធានបទនេះ»។
ប្រធានាធិបតីអ៊ុយក្រែនលោក Volodymyr Zelensky បានបញ្ជាក់ថា អ៊ុយក្រែនបានបញ្ជូនគណៈប្រតិភូមួយក្រុមសម្រាប់កិច្ចពិភាក្សានៅទីក្រុងអ៊ីស្តង់ប៊ុល ប៉ុន្តែបានរិះគន់គណៈប្រតិភូរុស្ស៊ីដែលបានបញ្ចូនមកថាជាគណៈប្រតិភូ កម្រិតទាប។
គណៈប្រតិភូរុស្ស៊ី ដឹកនាំដោយលោក Vladimir Medinsky ដែលជាជំនួយការសម្ព័ន្ធប្រធានាធិបតីរុស្ស៊ី បានបញ្ជាក់ថា ក្រុមការងាររបស់ប្រទេសរុស្ស៊ី គឺមានសមត្ថភាពចាំបាច់គ្រប់យ៉ាងទាំងអស់។
លោក ត្រាំ ដែលកំពុងបំពេញទស្សនកិច្ចនៅមជ្ឈិមបូព៌ា ក៏បាននិយាយថា ភាពរីកចំរើននៅក្នុងកិច្ចចរចាសន្តិភាពគឺមិនមានអ្វីកើតឡើងទេ បើមិនមានវត្តមានរូបលោក និងលោក ពូទីន ជួបគ្នាដោយផ្ទាល់។
នៅពេលសួរដោយសារព័ត៌មាន BBC នៅលើយន្តហោះ Air Force One ថាតើលោកមានការខកចិត្តចំពោះកម្រិតនៃគណៈប្រតិភូរុស្ស៊ីដែលចូលរួមកិច្ចចរចាឬទេ? លោក ត្រាំ បានឆ្លើយថា៖ «តើអ្នកឃើញទេ អ្វីៗនឹងមិនកើតឡើងឡើយ រហូតទាល់តែមានវត្តមានខ្ញុំ និងលោក ពូទីន ចូលរួម»។
លោកបានបន្ថែមថា៖ «លោក ពូទីន មិនទៅចូលរួមទេ ប្រសិនបើខ្ញុំមិននៅទីនោះ ហើយខ្ញុំមិនជឿថា អ្វីៗនឹងកើតមានឡើយ មិនថាអ្នកពេញចិត្តឬអត់ទេ រហូតដល់ខ្ញុំ និងលោកពូទីនជួបគ្នាជាមុនសិន ប៉ុន្តែយើងត្រូវដោះស្រាយបញ្ហានេះឲ្យបាន ពីព្រោះមានមនុស្សជាច្រើនកំពុងស្លាប់»។
លោក ត្រាំ ធ្លាប់បាននិយាយថា លោកនឹងចូលរួមកិច្ចពិភាក្សានៅក្នុងប្រទេសតួកគីនៅថ្ងៃសុក្រនេះប្រសិនបើមានភាពសមស្របណាមួយកើតឡើង ប៉ុន្តែក្រោយមក លោកបាននិយាយថា លោកប្រហែលជានឹងត្រឡប់ទៅទីក្រុងវ៉ាស៊ីនតោនវិញ ដោយមិនចូលរួម។
គណៈប្រតិភូមកពីប្រទេសតួកគី សហរដ្ឋអាមេរិក អ៊ុយក្រែន និងរុស្ស៊ី បានគ្រោងជួបប្រជុំគ្នានៅទីក្រុងអ៊ីស្តង់ប៊ុលនៅថ្ងៃព្រហស្បតិ៍នេះ សម្រាប់កិច្ចចរចាទល់មុខ អ៊ុយក្រែន-រុស្ស៊ី ជាលើកដំបូងចាប់តាំងពីឆ្នាំ ២០២២។ ប៉ុន្តែ បើតាមរបាយការណ៍មួយចំនួនបង្ហាញថា កិច្ចប្រជុំនេះអាចនឹងកើតឡើងនៅថ្ងៃសុក្រនេះ។
គួរឲ្យដឹងផងដែរថា លោក ពូទីន បានស្នើឱ្យមានកិច្ចចរចាដោយផ្ទាល់នៅថ្ងៃទី១៥ ឧសភា នៅទីក្រុងអ៊ីស្តង់ប៊ុល ដើម្បីឆ្លើយតបទៅនឹងការអំពាវនាវរបស់មេដឹកនាំអឺរ៉ុប និងអ៊ុយក្រែន ដែលស្នើឲ្យមានបទឈប់បាញ់ដោយគ្មានលក្ខខណ្ឌរយៈពេល ៣០ ថ្ងៃ។
បន្ទាប់មកលោក Zelensky បានស្នើឱ្យលោក ពូទីន ជួបគាត់ដោយផ្ទាល់ ប៉ុន្តែកាលពីថ្ងៃព្រហស្បតិ៍ វិមានក្រឹមឡាំងបាននិយាយថា ប្រធានាធិបតីរុស្ស៊ីមិនស្ថិតក្នុងចំណោមមន្ត្រីដែលធ្វើដំណើរទៅចូលរួមចចារនោះទេ៕
