ក្រុមហាម៉ាសបានស្នើថាពួកគេនឹងដោះលែងចំណាប់ខ្មាំងបន្ថែមទៀត នៅក្រោមកិច្ចព្រមព្រៀងឈប់បាញ់ថ្មីនៅហ្គាហ្សា បន្ទាប់ពីការចរចាថ្មីត្រូវបានធ្វើឡើងនៅថ្ងៃសៅរ៍។ការចរចានេះបានចាប់ផ្តើមប៉ុន្មានម៉ោងបន្ទាប់ពីយោធាអ៊ីស្រាអែលបានបើកការវាយលុកទ្រង់ទ្រាយធំថ្មីនៅតំបន់ហ្គាស្សា។
នៅក្នុងការស្នើនេះ ក្រុមហាម៉ាសបានយល់ព្រមដោះលែងចំណាប់ខ្មាំងចំនួន ៩នាក់ ជាថ្នូរនឹងបទឈប់បាញ់រយៈពេល ៦០ ថ្ងៃ និងស្នើឲ្យអ៊ីស្រាអែលដោះលែងអ្នកទោសប៉ាឡេស្ទីន។
មន្ត្រីរូបនេះបាននិយាយថា កិច្ចព្រមព្រៀងដែលបានស្នើថ្មីនេះក៏នឹងអនុញ្ញាតឱ្យរថយន្តជំនួយចំនួន ៤០០ គ្រឿងក្នុងមួយថ្ងៃចូលទៅផ្ដល់ជំនួយដល់ប្រជាជននៅតំបន់ហ្គាហ្សា និងការជម្លៀសអ្នកជំងឺចេញពីតំបន់នេះផងដែរ។
អ៊ីស្រាអែលមិនទាន់ឆ្លើយតបជាសាធារណៈចំពោះកិច្ចព្រមព្រៀងដែលបានស្នើនេះទេ ប៉ុន្តែបាននិយាយមុនការចរចាថា ខ្លួននឹងមិនដកទ័ពចេញពីហ្គាហ្សា ឬក៏បញ្ចប់សង្គ្រាមនោះដែរ។
មនុស្សរាប់ពាន់នាក់បានស្លាប់ចាប់តាំងពីអ៊ីស្រាអែលបានបន្តការវាយប្រហារនៅថ្ងៃទី១៨ ខែមីនា បន្ទាប់ពីការដួលរលំនៃបទឈប់បាញ់ដ៏ផុយស្រួយមួយដែលបានអូសបន្លាយរយៈពេលពីរខែ។
យោធាអ៊ីស្រាអែលបានប្រកាសបើកការវាយលុកថ្មីមួយឈ្មោះ «ប្រតិបត្តិការរទេះសេះរបស់ Gideon» នៅព្រឹកថ្ងៃសៅរ៍ ចំពេលរលកនៃការវាយប្រហារដ៏សាហាវនៅហ្គាហ្សា។ យ៉ាងហោចណាស់មនុស្ស ៣០០ នាក់បានស្លាប់ចាប់តាំងពីថ្ងៃព្រហស្បតិ៍ ដែលរួមមាននៅមន្ទីរពេទ្យ និងជំរុំជនភៀសខ្លួននៅភាគខាងជើង និងខាងត្បូងនៃតំបន់ហ្គាហ្សា៕
