អ៊ីស្រាអែលបានចាប់ផ្តើមប្រតិបត្តិការដីគោកទ្រង់ទ្រាយធំនៅហ្គាហ្សាកាលពីថ្ងៃអាទិត្យ បន្ថែមលើយុទ្ធនាការអាកាសដ៏ខ្លាំងក្លាមួយ។ មន្ត្រីសុខាភិបាលនៅតំបន់នោះនិយាយថា ប្រតិបត្តិការនេះបានសម្លាប់មនុស្សជាង ១០០ នាក់ក្នុងមួយយប់ និងបានបិទមន្ទីរពេទ្យដែលនៅសេសសល់ចុងក្រោយនៅភាគខាងជើងនៃហ្គាហ្សា។
ប្រតិបត្តិការដីគោករបស់យោធាអ៊ីស្រាអែលនៅភាគខាងជើងនិងខាងត្បូងនៃហ្គាហ្សាកើតឡើងនៅពេលដែលអន្តរជាតិអន្តរការីជំរុញឱ្យមានកិច្ចចរចាបទឈប់បាញ់។
ក្រុមហាម៉ាស និងអ៊ីស្រាអែលបានចាប់ផ្តើមកិច្ចចរចាដោយប្រយោលនៅទីក្រុង ដូហា ប្រទេសកាតា កាលពីថ្ងៃសៅរ៍ ដោយមន្ត្រីជាន់ខ្ពស់របស់ហាម៉ាស Taher Al-Nunu បានបញ្ជាក់ថា «ការចរចាដោយគ្មានលក្ខខណ្ឌ» បានចាប់ផ្តើម។
ប៉ុន្តែ ក្ដីសង្ឃឹមមានតិចតួចណាស់ក្នុងការឈានទៅដល់ការបញ្ចប់សង្គ្រាម។ អ៊ីស្រាអែលនៅថ្ងៃអាទិត្យបានបង្ហាញពីភាពបើកចំហរបស់ខ្លួនក្នុងការបញ្ចប់សង្គ្រាមនៅហ្គាហ្សា ប្រសិនបើហាម៉ាសចុះចាញ់ ដែលជាសំណើមួយដែលក្រុមសកម្មប្រយុទ្ធនេះទំនងជាមិនទទួលយក។
នៅព្រឹកថ្ងៃអាទិត្យ មេដឹកនាំជាន់ខ្ពស់របស់ហាម៉ាសម្នាក់បានប្រាប់ CNN ថា ក្រុមនេះបានយល់ព្រមដោះលែងចំណាប់ខ្មាំងអ៊ីស្រាអែលចន្លោះពី ៧ ទៅ ៩ នាក់ ជាថ្នូរនឹងបទឈប់បាញ់រយៈពេល ៦០ ថ្ងៃ និងការដោះលែងអ្នកទោសនិងអ្នកជាប់ឃុំប៉ាឡេស្ទីនចំនួន ៣០០ នាក់។
ប៉ុន្តែ ប៉ុន្មានម៉ោងក្រោយមក មេដឹកនាំជាន់ខ្ពស់របស់ហាម៉ាសម្នាក់ទៀត គឺលោក Sami Abu Zuhri បានបដិសេធលើការលើកឡើងបែបនេះ ដោយបានបង្ហោះសេចក្តីថ្លែងការណ៍មួយនៅលើ Telegram របស់ទូរទស្សន៍ Al-Aqsa ដែលគ្រប់គ្រងដោយហាម៉ាសថា៖ «មិនមានការពិតទេចំពោះពាក្យចចាមអារ៉ាមទាក់ទងនឹងការយល់ព្រមរបស់ចលនានេះក្នុងការដោះលែងអ្នកទោសអ៊ីស្រាអែល ៩ នាក់ ជាថ្នូរនឹងបទឈប់បាញ់រយៈពេលពីរខៃនោះទេ»។
លោកបន្តទៀតថា៖ «យើងត្រៀមខ្លួនដោះលែងអ្នកទោសទាំងអស់ក្នុងពេលតែមួយ ប្រសិនបើកម្លាំងកាន់កាប់ (អ៊ីស្រាអែល) ប្តេជ្ញាបញ្ចប់អរិភាពដោយមានការធានាពីអន្តរជាតិ ហើយយើងនឹងមិនប្រគល់អ្នកទោសរបស់អ៊ីស្រាអែលនោះទេ ដរាបណាអ៊ីស្រាអែលនៅតែបន្តការឈ្លានពានលើហ្គាហ្សាដោយគ្មានដែនកំណត់»។
អង្គការសហប្រជាជាតិ និងអង្គការផ្ដល់ជំនួយធំៗកំពុងបង្ហាញសញ្ញាអាសន្នអំពីការវាយលុកថ្មីរបស់អ៊ីស្រាអែលនៅហ្គាហ្សា ដោយនិយាយថា គឺជនស៊ីវិលទេជាអ្នកទទួលរងផលប៉ះពាល់ខ្លាំងបំផុតពីការវាយប្រហារនេះ។
មនុស្សជាង ៣០០ នាក់ត្រូវបានសម្លាប់ និងជាង ១០០០ នាក់ផ្សេងទៀតរងរបួស បន្ទាប់ពីអ៊ីស្រាអែលបានបង្កើនការវាយប្រហារតាមអាកាសយ៉ាងខ្លាំងចាប់តាំងពីថ្ងៃព្រហស្បតិ៍។ នេះបើយោងតាមទិន្នន័យរបស់ក្រសួងសុខាភិបាលប៉ាឡេស្ទីនសប្តាហ៍នេះ។
មានករណីមួយដែលគ្រួសារទាំងមូលត្រូវបានសម្លាប់នៅពេលកំពុងសម្រាកលង់លក់ជាមួយគ្នា។ នេះបើយោងតាមក្រសួងសុខាភិបាល៕ CNN
