ការវាយប្រហារដោយយោធាអ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ៣០នាក់នៅទូទាំងតំបន់ Gaza Strip កាលពីថ្ងៃអាទិត្យ រួមទាំងមន្ត្រីសេវាសង្គ្រោះបន្ទាន់ជាន់ខ្ពស់ និងអ្នកកាសែតម្នាក់ផងដែរ។ នេះបើតាមអាជ្ញាធរសុខាភិបាលក្នុងតំបន់ហ្គាហ្សា។
ក្រុមគ្រូពេទ្យបាននិយាយថា ការស្លាប់ចុងក្រោយបង្អស់កើតឡើងពីការវាយប្រហារដាច់ដោយឡែកពីគ្នារបស់អ៊ីស្រាអែលទៅលើចំនួន ៣ គឺនៅ Khan Younis ភាគខាងត្បូង Jabalia ភាគខាងជើង និង Nuseirat នៅកណ្តាល Gaza Strip ។
ពួកគេបាននិយាយថា នៅតំបន់ Jabalia អ្នកកាសែតក្នុងស្រុកឈ្មោះ Hassan Majdi Abu Warda និងសមាជិកគ្រួសារជាច្រើននាក់ទៀតត្រូវបានសម្លាប់ដោយការវាយប្រហារតាមអាកាសទៅលើផ្ទះរបស់ពួកគេកាលពីព្រឹកថ្ងៃអាទិត្យ។
ការវាយប្រហារតាមអាកាសមួយទៀតនៅ Nuseirat បានសម្លាប់លោក Ashraf Abu Nar ដែលជាមន្ត្រីជាន់ខ្ពស់នៅក្នុងក្រុមសេវាសង្គ្រោះបន្ទាន់ស៊ីវិលប្រចាំតំបន់ និងប្រពន្ធរបស់គាត់នៅក្នុងផ្ទះរបស់ពួកគេ។
ការិយាល័យប្រព័ន្ធផ្សព្វផ្សាយរបស់រដ្ឋាភិបាលតំបន់ហ្គាហ្សាដែលគ្រប់គ្រងដោយក្រុមហាម៉ាសបាននិយាយថា ការស្លាប់របស់លោក Abu Warda បានបង្កើនចំនួនអ្នកកាសែតប៉ាឡេស្ទីនដែលត្រូវបានសម្លាប់នៅហ្គាហ្សាដល់ ២២០នាក់ ចាប់តាំងពីខែតុលាឆ្នាំ២០២៣។
យោធាអ៊ីស្រាអែលបាននិយាយនៅក្នុងសេចក្តីថ្លែងការណ៍មួយថា មេបញ្ជាការ Eyal Zamir បានទៅលេងកងទ័ពនៅតំបន់ Khan Younis កាលពីថ្ងៃអាទិត្យ ដោយបានប្រាប់ពួកគេថា៖ «នេះមិនមែនជាសង្គ្រាមដែលគ្មានទីបញ្ចប់ទេ ហើយថាក្រុមហាម៉ាស់បានបាត់បង់ទ្រព្យសម្បត្តិភាគច្រើនរបស់ខ្លួន រួមទាំងការបញ្ជា និងការគ្រប់គ្រងផងដែរ»។
លោក Zamir បានលើកឡើងបន្ថែមទៀតថា៖ «យើងនឹងប្រើប្រាស់គ្រប់ឧបករណ៍ និងសមត្ថភាពទាំងអស់ដែលយើងមាន ដើម្បីកម្ចាត់ក្រុមហាម៉ាស និងបំផ្លាញ់អំណាចរបស់ពួកគេចោឱ្យអស់»។
នៅថ្ងៃអាទិត្យដដែល គណៈកម្មាធិការអន្តរជាតិនៃកាកបាទក្រហម ICRC បាននិយាយនៅក្នុងសេចក្តីថ្លែងការណ៍មួយថា បុគ្គលិករបស់ខ្លួនពីរនាក់គឺលោក Ibrahim Eid និងលោក Ahmad Abu Hilal ត្រូវបានសម្លាប់នៅក្នុងការវាយប្រហារមួយនៅ Khan Younis កាលពីថ្ងៃសៅរ៍។
សេចក្តីថ្លែងការណ៍របស់ ICRC បានបន្ថែមថា៖ «ការសម្លាប់របស់ពួកគេទៅលើជនស៊ីវិលនៅតំបន់ Gaza គឺជារឿងដែលមិនអាចអត់ឱនឱ្យបាន។ ICRC បានបន្តអំពាវនាវឲ្យមានការបញ្ឈប់បាញ់បោះជាបន្ទាន់ និងធ្វើការគោរពដល់ការការពារប្រជាពលរដ្ធ រួមទាំងបុគ្គលិកសុខាភិបាល បុគ្គលិកសង្គ្រោមនុស្សធម៌ និងបុគ្គលិកការពារបុគ្គលិកការពារស៊ីវិល»។
នៅក្នុងសេចក្តីថ្លែងការណ៍ដាច់ដោយឡែកមួយ ការិយាល័យប្រព័ន្ធផ្សព្វផ្សាយហ្គាហ្សាបាននិយាយថា កងកម្លាំងអ៊ីស្រាអែលបានគ្រប់គ្រង ៧៧ភាគរយ នៃតំបន់ Gaza Strip៕
