លោក ត្រាំ បានប្រកាសថា លោកនឹងដាក់ពន្ធ ១០០% លើភាពយន្តដែលផលិតនៅបរទេស ដែលជាការបន្ថែមវិវាទពាណិជ្ជកម្មជាមួយប្រទេសផ្សេងៗទូទាំងពិភពលោក។
ប្រធានាធិបតីសហរដ្ឋអាមេរិក ដូណាល់ ត្រាំ បាននិយាយថា លោកកំពុងផ្តល់សិទ្ធិឱ្យតំណាងពាណិជ្ជកម្មអាមេរិកចាប់ផ្តើមដំណើរការដើម្បីដាក់ពន្ធ ព្រោះថាឧស្សាហកម្មភាពយន្តរបស់អាមេរិកកំពុងធ្លាក់ចូលទៅក្នុងស្ថានភាព«ស្លាប់យ៉ាងលឿនបំផុត»។
លោកបានស្តីបន្ទោសទៅលើកិច្ចខិតខំប្រឹងប្រែងរួមគ្នារបស់បណ្តាប្រទេសផ្សេងៗទៀតដែលផ្តល់អត្ថប្រយោជន៍ដើម្បីទាក់ទាញអ្នកថតភាពយន្ត និងស្ទូឌីយោ ដែលគាត់បានពិពណ៌នាថា «ជាភាពគំរាមកំហែងដល់សន្តិសុខជាតិ»។
បន្ថែមពីលើនេះលោក ត្រាំ បានផ្ញើសារនៅលើបណ្ដាញសង្គមរបស់លោក Truth Social ដោយបាននិយាយថា៖ «យើងចង់បានភាពយន្តដែលផលិតនៅអាមេរិកម្តងទៀត»។
គួរឲ្យដឹងផងដែរថា ចាប់តាំងពីការវិលត្រឡប់មកកាន់សេតវិមានក្នុងខែមករា លោក ត្រាំ បានដាក់ពន្ធលើប្រទេសជុំវិញពិភពលោក។ បានអះអាងថា ពន្ធគយនឹងជំរុញក្រុមហ៊ុននានាងាកមកផលិតនៅក្នុងសហរដ្ឋអាមេរិក និងបង្កើតការងាដល់ពលរដ្ឋរបស់ខ្លួន។ យ៉ាងណាក៏ដោយ លទ្ធផលនៃវិធានការរបស់លោកធ្វើឲ្យសេដ្ឋកិច្ចពិភពលោកកំពុងធ្លាក់ចូលទៅក្នុងភាពវឹកវរ ហើយតម្លៃទំនិញជុំវិញពិភពលោកត្រូវបានគេរំពឹងថានឹងកើនឡើង។
មុនពេលចូលកាន់តំណែងជាប្រធានាធិបតី លោក ត្រាំ បានតែងតាំងតារាភាពយន្តបីរូបគឺ លោក Jon Voight, Mel Gibson និង Sylvester Stallone ឱ្យធ្វើជាតំណាងពិសេស ដើម្បីលើកស្ទួយឱកាសអាជីវកម្មនៅហូលីវូដ ដែលគាត់បានពិពណ៌នាថា ជាទីកន្លែងដ៏អស្ចារ្យ ប៉ុន្តែជាកន្លែងដែលមានបញ្ហាច្រើន។
ដោយក្នុងនោះលោកបានលើកឡើងថា៖ «ពួកគេនឹងបម្រើជាតំណាងពិសេសសម្រាប់ខ្ញុំ ដើម្បីនាំយកហូលីវូដដែលបាត់បង់ក្នុងរយៈពេល ៤ឆ្នាំចុងក្រោយនេះនៅក្នុងទីផ្សារបរទេស និងនាំយកមកវិញនូវជោគជ័យ និងភាពរឹងមាំជាងមុន»។
រដ្ឋមន្ត្រីក្រសួងពាណិជ្ជកម្មសហរដ្ឋអាមេរិក លោក Howard Lutnick បានឆ្លើយតបចំពោះការប្រកាសជាថ្មីនេះ ដោយនិយាយថា «ពួកយើងកំពុងធ្វើការលើរឿងនេះ»។
យោងតាមក្រុមហ៊ុនស្រាវជ្រាវឧស្សាហកម្មភាពយន្ត ProdPro បានឱ្យដឹងថា សហរដ្ឋអាមេរិកនៅតែជាមជ្ឈមណ្ឌលផលិតភាពយន្ដដ៏សំខាន់នៅទូទាំងពិភពលោក ទោះបីជាមានបញ្ហាប្រឈមច្រើនក៏ដោយ។ ឧស្សាហកម្មភាពយន្តរបស់សហរដ្ឋអាមេរិកក៏បានទទួលផលប៉ះពាល់យ៉ាងខ្លាំង ពីគោលនយោបាយពាណិជ្ជកម្មរបស់លោក ត្រាំ ផងដែរ។
កាលពីឆ្នាំ២០២៤ ឧស្សាហកម្មភាពយន្តអាមេរិកបានចំណាយប្រាក់ ១៤,៥៤ពាន់លានដុល្លារ ដែលធ្លាក់ចុះ ២៦ភាគរយធៀបនឹងឆ្នាំ២០២២៕ ប្រភព៖ BBC
