ប៉ូលិសប្រេស៊ីលបានបញ្ឈប់ការវាយប្រហារដោយគ្រាប់បែកដែលគ្រោងធ្វើឡើងនៅឯការប្រគំតន្ត្រីរបស់ Lady Gaga នៅឆ្នេរខ្សាច់ Copacabana ក្នុងទីក្រុង Rio de Janeiro កាលពីថ្ងៃសៅរ៍។ ក្រុមអ្នកដាក់គ្រាប់បែកសារភាពថា ពួកគេរៀបចំវាយប្រហារដើម្បីបានភាពល្បីល្បាញនៅលើបណ្ដាញសង្គម។
កម្លាំងប៉ូលិសនៃរដ្ឋ Rio de Janeiro បាននិយាយថា ដោយមានកិច្ចសហការជាមួយក្រសួងយុត្តិធម៌ បានបង្ក្រាបក្រុមជនសង្ស័យដែលបានជ្រើសរើសអ្នកចូលរួមដើម្បីអនុវត្តការវាយប្រហារដោយប្រើគ្រឿងផ្ទុះដែលពួកគេបានបង្កើតដោយខ្លួនឯង ហើយផែនការវាយប្រហារនេះគឺក្នុងគោលបំណងទទួលបានកេរ្តិ៍ឈ្មោះលើបណ្តាញសង្គម។
ប៉ូលិសបាននិយាយថា អ្នកទទួលខុសត្រូវលើផែនការនេះ និងក្មេងជំទង់ម្នាក់ត្រូវបានចាប់ខ្លួន។ បុគ្គលដែលត្រូវបានចោទប្រកាន់ថាជាមេក្លោងត្រូវបានចាប់ខ្លួនពីបទកាន់កាប់អាវុធខុសច្បាប់នៅរដ្ឋ Rio Grande do Sul ភាគខាងត្បូង ចំណែកក្មេងជំទង់ម្នាក់ត្រូវបានឃុំខ្លួនពីបទរក្សាទុករូបភាពអាសអាភាសកុមារនៅទីក្រុង Rio de Janeiro។
យ៉ាងណាក៏ដោយ ក្រុមការងាររបស់តារាល្បី Lady Gaga បាននិយាយថា ពួកគេមិនបានដឹងពីការគំរាមកំហែងដោយគ្រាប់បែកនេះទេ ទើបតែបានដឹងតាមរយៈសារព័ត៌មាននៅព្រឹកបន្ទាប់ពីការសម្តែង។
ហ្វូងមនុស្សជាង ២,១ លាននាក់បានប្រមូលផ្តុំសម្រាប់ការប្រគំតន្ត្រីដែលបើកឲ្យចូលរួមដោយសេរី និងឥតគិតថ្លៃ។ ការប្រគំតន្ត្រីនេះរៀបចំ និងឧបត្ថម្ភពីរដ្ឋនៃទីក្រុងក្នុងកិច្ចប្រឹងប្រែងស្ដារសកម្មភាពសេដ្ឋកិច្ចរបស់ទីក្រុងនេះ។ ប្រភព៖ BBC
