ចំពេលមានភាពតានតឹងកាន់តែខ្លាំងឡើងជាមួយប៉ាគីស្ថាន បន្ទាប់ពីការវាយប្រហារភេរវកម្ម នៅតំបន់ Pahalgam នាយករដ្ឋមន្ត្រី Narendra Modi កាលពីថ្ងៃចន្ទបានជួបជាមួយទីប្រឹក្សាសន្តិសុខជាតិ Ajit Doval និងរដ្ឋមន្ត្រីក្រសួងមហាផ្ទៃ Govind Mohan ដោយបង្កើនការរំពឹងទុកអំពីផែនការប្រឆាំងការវាយលុក។
នៅព្រឹកថ្ងៃដដែលនោះដែរ រដ្ឋមន្ត្រីការពារជាតិ Rajesh Kumar Singh ក៏បានជួបជាមួយនាយករដ្ឋមន្ត្រីផងដែរ។ កិច្ចប្រជុំទាំងនេះមានសារសំខាន់ណាស់ ខណៈដែលពួកគេតាមដានយ៉ាងយកចិត្តទុកដាក់លើការពិភាក្សាដែលនាយករដ្ឋមន្ត្រី Modi បានធ្វើឡើងជាមួយមេទ័ពអាកាសឥណ្ឌា Marshal Amar Preet Singh កាលពីថ្ងៃអាទិត្យ និងឧត្តមនាវីឯក Dinesh K Tripathi មេទ័ពជើងទឹកកាលពីថ្ងៃសៅរ៍។
ការពិគ្រោះយោបល់កម្រិតខ្ពស់ជាបន្តបន្ទាប់នេះត្រូវបានគេមើលឃើញថាមានសារៈសំខាន់ចំពេលមានការឆ្លើយតបជាយុទ្ធសាស្ត្រ ដែលឥណ្ឌាអាចនឹងរៀបចំផែនការស្របតាមការសម្រេចចិត្តរបស់ប្រទេសនេះក្នុងការវាយប្រហារចំពោះអំពើភេរវកម្ម។
របាយការណ៍បង្ហាញថា នៅយប់ថ្ងៃទី ៤-៥ ខែឧសភា កងទ័ពប៉ាគីស្ថានបានផ្តួចផ្តើមការបាញ់អាវុធធុនតូចចេញពីប៉ុស្តិ៍ទល់មុខតំបន់ Kupwara, Baramulla, Poonch, Rajouri, Mendhar, Naushera, Sunderbani និង Akhnoor នៅតំបន់ Jammu និង Kashmir ក្នុងនោះដែរកងទ័ពឥណ្ឌាបានបាញ់ឆ្លើយតបភ្លាមៗចំពោះការបាញ់នេះ។
កាលពីថ្ងៃសៅរ៍ ឧត្តមនាវីឯក Tripathi មេទ័ពជើងទឹកក៏បានធ្វើសេចក្តីរាយការណ៍សង្ខេបជូននាយករដ្ឋមន្ត្រីអំពីស្ថានភាពសន្តិសុខនៅទូទាំងតំបន់ដែនសមុទ្រសំខាន់ៗនៅក្នុងសមុទ្រអារ៉ាប់ផងដែរ។
គួរឲ្យដឹងផងដែរថា កាលពីសប្តាហ៍មុន នាយករដ្ឋមន្ត្រី Modi បានជួបជាមួយប្រមុខកងកម្លាំងប្រដាប់អាវុធទាំងបី ដោយបង្ហាញទំនុកចិត្ត និងការគាំទ្រយ៉ាងពេញលេញរបស់គាត់ និងបាន ផ្តល់ឱ្យពួកគេនូវសិទ្ធសេរីភាពក្នុងការប្រតិបត្តិកា ការសម្រេចចិត្ត ការសម្រេចគោលដៅ និងពេលវេលា ក្នុងការឆ្លើយតបពីប្រទេសឥណ្ឌាចំពោះការវាយប្រហារភេរវកម្មនៅតំបន់ Pahalgam ដែលបានឆក់យកជីវិតមនុស្សអស់ ២៦ នាក់។
ការវិវឌ្ឍនៃការបើកកិច្ចប្រជុំសន្តិសុខកម្រិតខ្ពស់ជាបន្ទាន់នេះកើតឡើងបន្ទាប់ពីមានការបាញ់សាកល្បងកាំជ្រួចមីស៊ីលផ្លោងនាពេលថ្មីៗនេះរបស់ប្រទេសប៉ាគីស្ថាន ដែលមានរយៈចម្ងាយ ៤៥០គីឡូម៉ែត្រ។ កាំជ្រួចនេះត្រូវបានបាញ់សាកល្បងកាលពីថ្ងៃសៅរ៍ក្នុងអំឡុងពេលសមយុទ្ធយោធារបស់ប៉ាគីស្ថានឈ្មោះ Exercise INDUS៕
