កញ្ញា សុបញ្ញា និងគូដណ្តឹង នាថ្ងៃភ្ជាប់ពាក្យកាលពីថ្ងៃទី ១០ ខែ កក្កដា ឆ្នាំ ២០២១។ ហ្វេសប៊ុក
ភ្នំពេញ៖ ទើបតែបង្ហើបរឿងមានម្ចាស់បេះដូង ដោយបើកចំហ កាលពីប៉ុន្មានសប្តាហ៍មុនសោះ ស្រាប់តែតារាចម្រៀងស្រីរាងខ្ពស់ស្រឡះកញ្ញា កែវ សុបញ្ញា ជាអតីតបេក្ខភាពប្រកួតកម្មវិធី The Voice Cambodia រដូវកាលទី១ បង្ហោះបង្ហាញមុខមាត់ពិត ឈ្មោះពិត អនាគតជាស្វាមីនាថ្ងៃភ្ជាប់ពាក្យ ដើម្បីរឹតបន្តឹងចំណងស្នេហ៍មួយកម្រិតទៀត កាលពីចុងសប្តាហ៍កន្លងមកនេះ។
ចេញពីគណនីហ្វេសប៊ុកផ្ទាល់ខ្លួន បណ្តុំរូបភាព ជួបជុំសាច់ញាតិទាំងសងខាង ប្រកបដោយក្តីសុខ មានទឹកមុខញញឹមរីករាយ កញ្ញា កែវ សុបញ្ញា បានបរិយាយថា៖ «យើងខ្ញុំទាំង ២ នាក់ កែវ សុបញ្ញា និង ប៉ាល់ ប៉ោស៊ាង សូមជំនួសមុខឱ្យមាតាបិតា ទាំងសងខាង សូមថ្លែងអំណរអរគុណដល់ ភ្ញៀវកិត្តិយសទាំងអស់ ដែលបានចំណាយពេលវេលាដ៏មានតម្លៃចូលរួមក្នុងកម្មវិធីភ្ជាប់ពាក្យរបស់យើងខ្ញុំទាំង ២ និងសូមអធ្យាស្រ័យចំពោះបងប្អូនដែលមិនបានអញ្ជើញចូលរួម ព្រោះនាងខ្ញុំ ធ្វើជាលក្ខណៈគ្រួសារតែបណ្ណោះ។ ដោយសារយើងខ្ញុំត្រូវអនុវត្តតាមបម្រាមគោចររបស់សម្ដេចពុក សូមជូនពរភ្ញៀវកិត្តិយសទាំងអស់មានសុខភាពល្អ រកទទួលទានមានបានគ្រប់ក្រុមគ្រួសារ ក៏អរគុណសម្រាប់ពាក្យជូនពររបស់បងប្អូនទាំងអស់គ្នាផងណា!»។
កញ្ញា កែវ សុបញ្ញា តារាចម្រៀងស្រីនៅផលិតកម្មហង្សមាស។ រូបថត ហ្វេសប៊ុក
កញ្ញា កែវ សុបញ្ញា បន្តថា៖ «នាងខ្ញុំពិតជារំភើប និងថ្លែងអំណរគុណ ជាពិសេសចំពោះអ្នកគាំទ្រពីគ្រប់មជ្ឈដ្ឋាននូវពាក្យជូនពររបស់បងប្អូន និងទឹកចិត្តដ៏រំភើប ត្រេកអរជំនួសយើងទាំង ២ នាក់ សម្រាប់ថ្ងៃមង្គលពាក្យជូនពររបស់អ្នកទាំងអស់គ្នា ប្រៀបដូចជាសិរីសួស្ដី ជ័យមង្គល ដែលបានផ្ដល់ឱ្យនាងខ្ញុំ និងក្រុមគ្រួសារយូរអង្វែង នាងខ្ញុំសូមជូនពរឱ្យបងប្អូនទាំងអស់គ្នាជួបតែសេចក្ដីសុខ និងសុភមង្គលក្នុងក្រុមគ្រួសារជារៀងរហូតដូចគ្នា»។
យ៉ាងណាក្រោយពីភ្ជាប់ទៅ តារាចម្រៀងស្រី និងតារាសម្តែងនៅទ្រនំហង្សមាសរូបនេះ ក៏នៅមិនទាន់អាចបញ្ជាក់ពីគម្រោងថ្ងៃចូលរោងជ័យមង្គល ពេលណានឹងគូដណ្តឹងខ្លួនជាអ្នកសិល្បៈ ឬជាអ្នកបម្រើការងាររដ្ឋ ឬជាអ្នកជំនួញនោះឡើយ ដោយប្រព័ន្ធទូរស័ព្ទកញ្ញាធ្លាប់ទំនាក់ទំនងពីមុននោះ មិនអាចទាក់ទងបាន នាពេលថ្មីៗនេះ។
កាលពីប៉ុន្មានសប្តាហ៍មុន កញ្ញា កែវ សុបញ្ញា បង្ហោះសារបង្ហើបពីសម្ព័ន្ធភាពជាមួយបុរសជាម្ចាស់ចិត្តខ្លួន តាមបណ្តាញសង្គម តែមិនទាន់បង្ហាញមុខមាត់ពិតនៅឡើយ ដោយរៀបរាប់ជាសំណេរប្រាប់ដល់មហាជនដែរថា៖ «មនុស្សដែលខ្ញុំស្រឡាញ់ គឺខ្ញុំរើសដោយបេះដូង និងមនោសញ្ចេតនាផ្ទាល់របស់ខ្លួនឯង។ ទោះអ្នកមិនល្អសម្រាប់អ្នកផ្សេង ទោះអ្នកបែបណាក៏ដោយ ក៏មិនមែនជាបញ្ហា សុំត្រឹមអ្នកមានការស្រឡាញ់ ស្មោះត្រង់ចំពោះខ្ញុំ តស៊ូជាមួយខ្ញុំច្បាស់លាស់នឹងខ្ញុំ និយាយដោយសម្ដីត្រូវធ្វើដោយទង្វើ។ មនុស្សសាមញ្ញរបស់ខ្ញុំ»។
សម្រាប់កញ្ញា កែវ សុបញ្ញា ចាប់ពីក្លាយជាតារាអាជីព ១ រូប ដែលកាន់តែលេចធ្លោក្នុងរង្វង់សិល្បៈលើទ្រនំហង្សមាស ទទួលបានប្រជាប្រិយភាពមិនចាញ់តារារួមជំនាន់ឡើយ ខណៈតារាស្រីរូបនេះ តែងតែមានវត្តមាន នៅលើឆាកប្រគំតន្ត្រីទាំងតូចទាំងធំជាច្រើន ក៏ដូចជាចូលរួមក្នុងកម្មវិធីផ្សេងៗ ព្រមទាំងបទចម្រៀងថ្មីៗចេញជាហូរហែផងដែរ។
ស្របពេលដែលអាជីពសិល្បៈកាន់តែឡើងកូដនោះ ស្រីស្រស់ កែវ-សុបញ្ញា ក៏រឹតតែថែរក្សារូបសម្រស់ឱ្យកាន់តែសិចស៊ី ទាក់ទាញក្រុមកន្លង់តាមសុំស្នេហ៍ និងចង់បាន ធ្វើជាម្ចាស់បេះដូង ក៏មិនតិចនោះឡើយ។ តារាស្រីវ័យ ២៨ ឆ្នាំ តែរូបសម្រស់មិនជ្រេតាមវ័យ កញ្ញា កែវ សុបញ្ញា ធ្លាប់បានប្រាប់ពីជីវិតគូស្រករខ្លួនដូច្នេះថា៖ «រឿងនេះ មិនទាន់មានម្ចាស់ចិត្តទេ ប៉ុន្តែក៏កំពុងតែមើលផងដែរ-ហើយក៏ធ្លាប់មានគេចូលស្តីដណ្តឹងដែរ ប៉ុន្តែខ្ញុំបដិសេធដោយសារចង់រកលុយសិន ចង់ឱ្យការងារមានលំនឹង និងរឹងមាំជាងនេះសិន ចាំយើងគិត ព្រោះខ្លួនឯងក៏ជិតចូល ៣០ ឆ្នាំស្អែកខានស្អែកហើយហ្នឹង ក៏មិនចង់នៅយូរដែរ»៕
