ក្រុងប៉ារីស៖ ពេលមានការបិទខ្ទប់កាត់ផ្ដាច់ការចម្លងវីរុសកូរ៉ូណា តម្រូវការនែបនិត្យធម្មជាតិនៅទីក្រុងរឹតតែសំខាន់ ហើយ AFP បានប្រមូលរូបភាពគម្រោងអគារទីក្រុងជាច្រើន រួមមានការរចនាទីក្រុងបៃតង នៅឈិនឌូ ប្រទេសចិន និងនៅសិង្ហបុរី។
អ្នកជំនាញផ្នែកសុខភាពបរិស្ថាននៃសាកលវិទ្យាល័យ Bath អ្នកនាង ស្តេហ្វានី មើរឆេន បាននិយាយថាទីធ្លាបៃតងត្រូវបានគេរកឃើញថា បានជួយលើកកម្ពស់សុខភាព និងសុខុមាលភាពរួមទាំងការកាត់បន្ថយភាពតានតឹងការថប់អារម្មណ៍ និងស្ត្រេសជាដើម»។
យ៉ាងណាមិញ អ្នកនាងបន្ថែមថា៖ «ប៉ុន្តែការបន្ថែមរុក្ខជាតិព្រៃនៅទីក្រុង ចាំបាច់ត្រូវតែធ្វើឡើងតាមតម្រូវការសហគមន៍ជាមូលដ្ឋានឱ្យសមស្របបរិបទជាក់ស្ដែងរបស់អ្នករស់នៅ»។
សួនពិភពផ្សេងរបស់សិង្ហបុរី
នៅទឹកដីតោកន្ទុយត្រីនេះ ដើមឈើយក្សធ្វើពីគ្រោងឆ្អឹងសិប្បនិម្មិតត្រូវបានសាងសង់ពីបេតុង និងដែកថែបគ្របដណ្តប់ដោយរុក្ខជាតិ។
មានអគារកម្ពស់ពី ២៥ ទៅ ៥០ ម៉ែត្រ នៅលើតំបន់ពាណិជ្ជកម្មថ្មីដែលបំភ្លឺដោយថាមពលពន្លឺព្រះអាទិត្យ និងផ្ទះកញ្ចក់ខ្នាតយក្សគ្របដណ្ដប់ដោយព្រៃត្រូពិក ២ ០០០ ម៉ែត្រ និងទឹកធ្លាក់សិប្បនិម្មិតដ៏អស្ចារ្យ។
គម្រោងឧទ្យានកណ្ដាលក្រុងសិង្ហបុរី ដែលបានទទួលពានរង្វាន់ពិភពលោកនៃការកសាងប្រចាំឆ្នាំនៅក្នុងឆ្នាំ ២០១២ ត្រូវបានផ្ដួចផ្ដើមក្រោមគំនិត «ទីក្រុងមួយនៅក្នុងសួនច្បារ»។
ប៉ុន្តែចក្ខុវិស័យនេះ ត្រូវបានលោក ហ្វីលីហ្វ ស៊ីម៉ាយ ជាទស្សនវិទូលើទីក្រុង និងស្ថាបត្យកម្ម លើកឡើងថា ជាការរំសាយធម្មជាតិ។
លោកលើកជាសំណួរថា៖ «ហេតុអ្វីបានជាធ្វើដើមឈើពីបេតុងនៅពេលអ្នកអាចមានដើមឈើពិតប្រាកដ»។
អគារលំនៅឋានទីក្រុងឈិនឌូ ប្រែក្លាយជាព្រៃកម្ពស់រាប់សិបជាន់
គម្រោងនេះបានផ្ដល់ឱ្យប្រជាជននូវជីវិតបៃតង ផុសកណ្ដាលទីក្រុងដ៏ទំនើប និងមមាញឹក។ ប៉ុន្តែព្រៃដុះបញ្ឈរតាមជាន់នៃអគារនីមួយៗនេះក៏មិនមែនសុទ្ធតែហុចផលល្អឥតខ្ចោះដែរ។
ពលរដ្ឋ លីន ឌិងយីង រស់នៅក្នុងអគារ ១ ក្នុងចំណោមប៉មទាំង ៨ ដែលបើកក្នុងឆ្នាំ ២០១៨ មានអារម្មណ៍វិជ្ជមានលាយឡំនឹងអវិជ្ជមាន។
ផ្នែកខ្លះមើលទៅដូចជាផ្ទះត្រូវលេបត្របាក់ដោយព្រៃត្រូពិក ខណៈផ្នែកផ្សេងទៀតមើលទៅដូចជាឥតសណ្ដាប់ធ្នាប់ ដោយអំណាចនៃរុក្ខជាតិលូតលាស់ច្រើនសន្ធឹក។
កាលពីខែកញ្ញា កាសែត Global Times បានរាយការណ៍ថា មានតែ ១០ គ្រួសារប៉ុណ្ណោះ ដែលបានរើចូលទៅនៅក្នុងអាផាតមិន ក្នុងចំណោមលំនៅឋាន ៨០០ កន្លែង ដោយសារតែពលរដ្ឋបារម្ភពីភាពស៊ុបទ្រុបជាជម្រកមូសខាំ។
អ្នកជំនាញស្ថាបត្យកម្ម សុខភាព និងបរិស្ថាន សុទ្ធតែលើកឡើងស្របគ្នាថា ការប្រែក្លាយទីក្រុងទៅជាព្រៃបៃតង មិនត្រឹមតែជាការគិតគូរពីផលប៉ះពាល់បរិស្ថាននោះទេ គឺត្រូវសិក្សាពីបរិបទតម្រូវការសហគមន៍ជាចាំបាច់ផងដែរ៕ AFP/HR