ភ្នំពេញ៖ កាលពីម្ចាស់ស្នេហ៍លោក ចូវ៉ានី អេនតូនីញ៉ូ បានលុតជង្គង់ សុំរៀបការជាការបញ្ជាក់ក្តីស្រឡាញ់ដ៏លើសលប់ កាលពីប៉ុន្មានខែមុននោះ តារាសម្តែង ម៉ូដែល និងពិធីការិនី រាងស្រឡូន កញ្ញា ទឹម រដ្ឋា កាន់តែបន្ថែមភាពផ្អែមល្ហែមយ៉ាងស្អិតល្មួត ជាមួយម្ចាស់ចិត្ត តែហាក់ពុំទាន់បង្ហើបពីរឿងកំណត់វេលាចូលរោងការនោះឡើយ។
តែនាពេលថ្មីៗនេះ តារាសម្តែងស្រី និងម៉ូដែលរូបស្រស់ រាងស្ល៊ីម កញ្ញា ទឹម រដ្ឋា ស្រាប់តែបង្ហើបថា នឹងរួសរាន់ដឹកដៃគូស្នេហ៍ជនជាតិអាមេរិក ចូវ៉ានី អេនតូនីញ៉ូ ចូលរោងការឆាប់ៗ ប្រសិនបើស្ថានភាពកូវីដបានបញ្ចប់ការរាលដាលឆាប់ៗនោះ។
នេះបើតាមសារអះអាងបង្ហើរនៅក្នុងបណ្តាញសង្គមហ្វេសប៊ុក តារាសម្តែងស្រី ពូកែថែរក្សារាងឱ្យនៅតែស្ល៊ីម កញ្ញា ទឹម រដ្ឋា បង្ហើបថា៖ «My គូជិវិត Jovany Antonio Real Estate! COVID 19 នេះ អត់ព្រមឈប់សោះ អត់ដឹងថា ទឹម រដ្ឋា ចាំចូលរោងការទេអី! គ្នាមិនងាយបានរៀបការនោះទេណា ទៅវិញឱ្យលឿនៗទៅទាន់ខ្ញុំកំពុងតែចង់ការ»។
រឿងនេះមិនត្រឹម-តែធ្វើឱ្យផ្អើលទៅដល់ប្រិយមិត្តអ្នកគាំទ្រទេ សូម្បីតែអតីតមិត្តរួមសិល្បៈគឺអ្នកនាង អេនជី ក៏បានលាន់មាត់ និងផ្តល់ជាយោបល់បែបរុញទូកទៅបណ្តោយតាមខ្យល់ថា៖ «រៀបការបែបសម័យកូវីដ ទៅពួកម៉ាក! ហើយកុំចាំមិនដឹងពេលណាចប់នោះទេ Friend!»។
ដោយសារតែគេឧស្សាហ៍ឃើញបណ្តើរសង្សារអាមេរិករូបសង្ហា ចូវ៉ានី អេនតូនីញ៉ូ ទៅចូលរួមក្នុងកម្មវិធីផ្លូវការ ឬកម្មវិធីសង្គមនានា បើកចំហ និងមានរយៈពេលយូរក្រែលនោះ ទើបតារាសម្តែងស្រីរាងស្ល៊ីម កញ្ញា ទឹម រដ្ឋា រងភាពជម្រេញខ្លាំងនឹងសំណួរជជីកសួរនាំពីរឿងសម្ព័ន្ធស្នេហ៍របស់នាង ដែលនៅមិនទាន់កំណត់វេលាចូលរោងការជារឿយៗ។
ប្រហែលទ្រាំលែងបានហើយមើលទៅ ទើបតារាសម្តែងសិចស៊ី ឬស៊ីវិល័យកញ្ញា ទឹម រដ្ឋា បន្លឺជាសារតបវិញភ្លាមៗ ទៅនឹងអ្នកតាមសួរនាំរឿងនាងដូច្នេះថា៖ «មានសំណួរជាច្រើនហើយក៏ជាសំណួរដដែលៗ ដែលសួរមកកាន់ពួកយើងទាំង ២។ ចម្លើយ គឺសូមរង់ចាំទស្សនាភាគបន្តអរគុណសម្រាប់នូវការស្រឡាញ់ និងគាំទ្រ ខ្វល់ខ្វាយមកកាន់យើងទាំង ២ តាំងពីដើមរហូតដល់ឥឡូវ»។
ជាក់ស្តែងថ្មីៗនេះ កញ្ញា ទឹម រដ្ឋា បង្ហោះរូបថតស៊ីអារម្មណ៍នឹងគូស្នេហ៍ពេលទៅលេងកម្សាន្ត ក៏រំលេចជាសារអមថា៖ «ត្រូវតែធ្វើឱ្យប្រាកដថា ម្ចាស់បេះដូងអ្នកស្រឡាញ់អ្នកពីចំណុចសូន្យទៅដល់ចំណុច ១០០ មិនមែនពីចំណុច ១០០ មកចំណុច ០ (សូន្យ) ទេ។ មិនថា ពួកយើងរវល់ប៉ុនណានោះទេ តែពួកយើងតែងមានពេលសម្រាប់គ្នារៀងរាល់ចុងសប្តាហ៍។ ជីវិតគូ ត្រូវតែមានតុល្យភាព»៕