ក្រុងឡាអេ៖ អ្នកនិយមក្រេបកាហ្វេនៅហាងក្នុងប្រទេសហូឡង់មិនតម្រូវឱ្យបង្ហាញ «វិញ្ញាបនបត្រកូវីដ» ឡើយ ពេលទទួលទាននៅខាងក្រៅ តែត្រូវបង្ហាញពេលចូលបន្ទប់ទឹក។ នេះបើយោងតាមរដ្ឋមន្ដ្រីក្រសួងសុខាភិបាលបានឱ្យដឹងកាលពីថ្ងៃចន្ទ។
កាលពីសប្ដាហ៍មុន ហូឡង់បានបន្ធូរបន្ថយការរឹតបន្ដឹង រួមទាំងការបញ្ចប់វិធានការរក្សាគម្លាតសុវត្ថិភាព តែបានឱ្យដឹងថា ខ្លួននឹងតម្រូវឱ្យមានវិញ្ញាបនបត្រថ្មីសម្រាប់ចូលក្នុងបារ៍ ភោជនីយដ្ឋាន និងកម្មវិធីបុណ្យផ្សេងៗ។
វិធានការថ្មី ដែលចាប់ផ្ដើមអនុវត្ដពីថ្ងៃសៅរ៍ ត្រូវបានអនុម័តដោយរដ្ឋសភា តែលើកលែងសម្រាប់អ្នកចង់ទទួលទានអាហារ ឬភេសជ្ជៈនៅក្រៅអគារ ដោយបាននិយាយថា ឱកាសនៃការឆ្លងមានតិចតួច។
បណ្ដាញផ្សព្វផ្សាយ NOS បានដកស្រង់សម្ដីរដ្ឋមន្ដ្រីក្រសួងសុខាភិបាល ហ៊ូហ្គូ ដេ ជុង ដោយបាននិយាយថា៖ «ប៉ុន្ដែបើអស់លោកចង់ប្រើប្រាស់បន្ទប់ទឹក លោកអ្នកនឹងត្រូវបង្ហាញ QR កូដ»។
បើស្គេន វិញ្ញាបនបត្របង្ហាញភ័ស្ដុតាងពីការចាក់វ៉ាក់សាំង ការជាសះស្បើយពីវីរុស ឬតេស្ដអវិជ្ជមាន និងតម្រូវគ្រប់មនុស្សទាំងអស់ចាប់ពីអាយុ ១៣ឆ្នាំឡើងទៅ។
លោក ដេ ជុង បានសារភាពថា៖ «វាមិនសូវស្រួលប៉ុន្មានទេ តែយើងត្រូវអនុវត្ដទៅតាមការសម្រេចរបស់រដ្ឋសភា។ លោកអ្នកក៏ត្រូវរៀបចំបន្ទប់ទឹកនៅក្បែររានដាល»។
កាលពីសប្ដាហ៍មុន នាយករដ្ឋមន្ដ្រីហូឡង់ ម៉ាក រូតតេ បាននិយាយថា វាមិនគួរណាមានករណីលើកលែងសម្រាប់អ្នកអង្គុយទទួលទានខាងក្រៅអគារ ដោយសារពួកគេច្បាស់ជាត្រូវចូលក្នុងបង់ប្រាក់ ឬចូលបន្ទប់ទឹកដដែល។
លោកបានបន្ដថា៖ «វាក៏អាចមានភ្លៀងធ្លាក់ ហើយពួកគេចង់ចូលខាងក្នុង»។
អ្នកនាំពាក្យក្រសួងសុខាភិបាល អ្នកស្រី រីនស្កេ វែមេន បានប្រាប់ AFP ថា៖ «រដ្ឋាភិបាលដាក់ម៉ាស៊ីនស្គេន QR កូដ នៅគ្រប់វិស័យបដិសណ្ឋារកិច្ច។ វាមិនធ្វើឱ្យរំខានចិត្ដ តែដោយសារមនុស្សត្រូវការសេរីភាពពីការរឹតបន្ដឹង។ ជាអកុសល សេរីភាពទាំងនេះសុទ្ធតែមានព្រំដែនកំណត់»៕ AFP/HR