ក្រុងញូវយ៉ក៖ ប្រទេសស្រីលង្កា បានអំពាវនាវកាលពីថ្ងៃពុធ ដល់ពិភពលោកឱ្យចូលរួមការពារបេតិកភណ្ឌព្រះពុទ្ធសាសនានៅប្រទេសអាហ្វហ្គានីស្ថាន ក្រោមការគ្រប់គ្រងរបស់ក្រុមតាលីបង់ ដែលបានបង្កការខឹងសម្បារតាមរយៈសកម្មភាពបំផ្លាញរូបសំណាកព្រះពុទ្ធយក្សនៅពេលដែលពួកគេបានកាន់អំណាចចុងក្រោយកាលពី ២ ទសវត្សរ៍មុន។
ប្រធានាធិបតី Gotabaya Rajapaksa បានប្រាប់កិច្ចប្រជុំកំពូលប្រចាំឆ្នាំរបស់ស្ថាប័នពិភពលោកមួយនេះថា៖ «ខ្ញុំស្នើសុំឱ្យអង្គការសហប្រជាជាតិ និងសហគមន៍អន្តរជាតិធានាការការពារបេតិកភណ្ឌព្រះពុទ្ធសាសនានៅអាហ្វហ្គានីស្ថាន»។
ព្រះពុទ្ធសាសនាដែលជាសាសនាគ្របដណ្ដប់នៅប្រទេសស្រីលង្កា ធ្លាប់មានការរីកចម្រើននៅក្នុងប្រទេសអាហ្វហ្គានីស្ថាន តាមរយៈការបន្សល់នូវនិមិត្តរូបចម្លាក់ព្រះពុទ្ធរូបខ្ពស់ៗនៅលើជញ្ជាំងក្រុងបាមិយ៉ាន ដែលបានឈរស្កឹមស្កៃអស់រយៈពេល ១៥០០ ឆ្នាំ។
ក្រុមតាលីបង់នៅខែមីនា ឆ្នាំ ២០០១ បានចំណាយពេលជាច្រើនសប្តាហ៍ក្នុងការបំផ្ទុះរូបចម្លាក់ ដោយប្រើគ្រាប់បែកផ្ទុះ និងកាំភ្លើងធំច្រើនសន្ធឹក ប្រឆាំងនឹងការអំពាវនាវរបស់អន្តរជាតិ ព្រោះតែជំនឿស៊ស្លាមដែលហ៊ាមឃាតការគោរពបូជាព្រះពុទ្ធរូប។
ការវិលត្រឡប់មកកាន់អំណាចវិញនៅពេល ដែលកងទ័ពអាមេរិកបានចាកចេញបន្ទាប់ពីការតាំងទី ២០ ឆ្នាំ ក្រុមតាលីបង់បានព្យាយាមរក្សាសកម្មភាពមិនឱ្យលេចធ្លោរខ្លាំង។
ប៉ុន្តែអ្នកស្រុកបាននិយាយថា ពួកតាលីបង់ដែលបានឈ្នះម្តងទៀតបានបំផ្ទុះរូបចម្លាក់មួយនៅបាមិយ៉ាន ដែលឧទ្ទិសដល់មេដឹកនាំ ហាហ្សារ៉ា ជាជនជាតិភាគតិចដែលត្រូវបានធ្វើទុក្ខបុកម្នេញដោយក្រុមអ៊ិស្លាមនិកាយស៊ុននី។
ជ្រលងបាមិយ៉ាននៅតែមានបណ្តាញរូងភ្នំខ្វាត់ខ្វែង ដែលមានប្រាសាទ វត្តអារាម ចម្លាក់ និងគំនូរព្រះ ពុទ្ធ សាសនា ជាច្រើនទៀតនៅសេសសល់៕ AFP