ព្រះនាងតូច នរោត្តម ជេនណា គ្រងឈុតប្រពៃណីមានទង់ជាតិខ្មែរ។ តារាចម្រៀង ម៉ូដែល ជាសែស្រឡាយរាជវង្សព្រះនាងតូច នរោត្តម ជេនណា។ ហ្វេសប៊ុក
ភ្នំពេញៈ នារយៈពេលជាង ២ ឆ្នាំ ចុងក្រោយនេះ កុមារីជាពន្លកតារាចម្រៀង តារាសម្តែង និងតារាម៉ូដែល ជាប់សែស្រឡាយព្រះរាជវង្ស ព្រះនាងតូច នរោត្តម ជេនណា កំពុងតែមានរាសីឡើងខ្លាំង ដោយទ្រង់ក្តោបបាននូវឱកាសជាច្រើនលើវិថីសិល្បៈ ស្ទើរគ្រប់ទម្រង់ ទាំងវិស័យសម្តែងភាពយន្ត និងចម្រៀង។
ក្នុងឱកាសថ្ងៃបុណ្យភ្ជុំបិណ្ឌតាមគន្លងប្រពៃណី ជាតិ សាសនា ឆ្នាំ ២០២១ កន្លងមកថ្មីៗនេះ តាមរយៈផលិតកម្មអនឡាញ NCJ Empire Studio ព្រះនាងតូច ជេនណា បានចេញអាល់ប៊ុមទី២ នៃចម្រៀងទាំងប្រភេទអូរីជីណល និងច្រៀងឡើងវិញបំពេអារម្មណ៍ប្រិយមិត្ត នារដូវកាលបុណ្យភ្ជុំបិណ្ឌឆ្នាំនេះ ដែលទទួលបានការគាំទ្រយ៉ាងច្រើនរួមមានបទ «អូនអើយអូន» បទ «ភ្ជុំបិណ្ឌទំនៀមខ្មែរ» បទ «វេចអន្សមភ្ជុំ» បទ «ភ្ជុំបិណ្ឌចាំស្នេហ៍» បទ «តាលុងផ្តាំស្នេហ៍» និងបទ «ភ្ជុំបិណ្ឌជុំញាតិ»។
ព្រះនាងតូច នរោត្តម ជេនណា ដែលទ្រង់មានទេពកោសល្យ និងដុងពីកំណើត លើវិស័យសិល្បៈទាំងបុរាណ និងសម័យ ហើយចេះនិយាយ ៥ ភាសា និងមានព្រះជន្ម ៩ វស្សា នៅឆ្នាំ ២០២១ នេះ ទ្រង់បង្ហើរសារថា៖ «បទ «វេចអន្សមភ្ជុំ» ច្រៀងឡើងវិញដោយព្រះនាងតូច នរោត្តម ជេនណា ជាសំនៀងដើមលោកស្រី ប៉ែន រ៉ន និពន្ធបទ និងទំនុកច្រៀងដោយ លោក ឯល ប៉ុលណា។ សូមពុកម៉ែ បងប្អូន រីករាយស្តាប់កម្សាន្តនារដូវបុណ្យភ្ជុំបិណ្ឌនេះ សូមធ្វើដំណើរដោយសុខសប្បាយ សំណាងល្អ សុខភាពល្អ សូមឱ្យការជួបជុំ ប្រកបដោយភាពរីករាយ តែកុំភ្លេចពាក់ម៉ាស់ណា បងប្អូន ៣ កុំ ៣ ការពារ»។
មិនតែប៉ុណ្ណោះព្រះនាងតូចក៏លេចវត្តមានសម្ដែងខ្សែភាពយន្តភាគ ២ រឿង ដែលផលិតដោយស្ថានីយទូរទស្សន៍ស៊ីធីអិន គឺរឿង «ទេពធីតាថ្កុលមាស» នៅដើមឆ្នាំ ២០២០ និងរឿង «នគរមាស» នៅដើមឆ្នាំ ២០២១ នេះ ខណៈទាំង ២ រឿង ព្រះនាងតូច សុទ្ធតែដើរជាតួអង្គឯក ដោយរឿង ១ ព្រះនាងសម្ដែងជាតួអង្គក្នុងវណ្ណៈខ្ពស់ និងរឿង ១ ទៀត សម្ដែងជាតួអង្គក្រខ្សត់ និងកម្សត់។
បើគិតមកត្រឹមពាក់កណ្តាលឆ្នាំ ២០២០ មកព្រះកិត្តិយសព្រះនាងតូចកំពុងតែបោះពួយឡើងជាលំដាប់លើវិថីសិល្បៈទាំងចម្រៀង និងសម្តែង ដោយគេឃើញព្រះនាង ជេនណា លេចវត្តមានក្នុងការថតស្ប៉តពាណិជ្ជកម្មនានា ជាតារាកិត្តិយស សម្ពោធកម្មវិធីសង្គម ជាញឹកញយ ថតកុន និងត្រូវក្រុមហ៊ុនទូរស័ព្ទ Cellcard ជ្រើសជាទូតសុច្ឆន្ទៈទៀតផង។
កាលពីឆ្នាំ ២០១៩ បានបង្កើតនូវភាពភ្ញាក់ផ្អើលខ្លាំងតាមបណ្តាញសង្គមហ្វេសប៊ុក និងយូធូប ជាមួយនឹងសូរសំនៀងដ៏ពីរោះបកស្រាយបទ «ដួងចន្ទ» របស់កុមារី ទើបតែមានព្រះជន្ម ៧ ឆ្នាំ ហើយជាប់សែស្រឡាយរាជវង្សខ្មែរ គឺជាព្រះនាងតូច នរោត្តម ជេនណា ដែលជាបុត្រីទី២ អ្នកអង្គម្ចាស់ នរោត្តម បុប្ផារី និងត្រូវជាចៅស្រីរបស់ព្រះអង្គម្ចាស់ នរោត្តម ចក្រពង្ស់៕
