ទីក្រុងរ៉ូម៖ ប៉ូលិសបានឱ្យដឹងកាលពីថ្មីៗនេះថា អ្នកទេសចរអាមេរិក ២ រូប ដែលបានលួចចូលទៅក្នុងតំបន់សំណង់បុរាណ ខ័រលឺសៀម (Colosseum) នៃទីក្រុងរ៉ូម ដើម្បីរីករាយនឹងស្រាបៀរត្រជាក់ជាមួយទិដ្ឋភាពសំណង់បុរាណនោះ ត្រូវរងការផាកពិន័យយ៉ាងធ្ងន់ធ្ងរ។
គូកននេះមានអាយុ ២៤ និង ៣៥ ឆ្នាំ បានឡើងដល់ដំណាក់រង្វង់ទី២ ក្នុងតំបន់សំណង់បុរាណនៅពេលព្រឹកព្រលឹមថ្ងៃចន្ទ ប៉ុន្តែអ្នកទាំង២ត្រូវបានប្រទះឃើញដោយអ្នកក្រោកពីព្រលឹម នៅរដ្ឋធានីអ៊ីតាលី ដែលបានជូនដំណឹងដល់ប៉ូលិស។
អ្នកនាំពាក្យប៉ូលិសបានប្រាប់ទីភ្នាក់ងារ AFP ថា ពួកគេបានសារភាពថា បានលួចចូលទៅផឹកស្រាបៀរ ហើយត្រូវបានពិន័យជាប្រាក់ចំនួន ៨០០ អឺរ៉ូ (៩០៥ ដុល្លារ) ។
មិនទាន់ច្បាស់នៅឡើយទេថា តើពួកគេបានចូលទៅក្នុងសំណង់ដ៏ល្បីលើពិភពលោកដែលមានអាយុ ២០០០ ឆ្នាំ បានដោយរបៀបណា?។
មុនពេលជំងឺរាតត្បាត សំណង់បុរាណ ខ័រលឺសៀម (Colosseum) នៃទីក្រុងរ៉ូម មានមនុស្សប្រហែល ២៥ ០០០ នាក់ បានមកទស្សនាជារៀងរាល់ថ្ងៃ៕ AFP