លោកស្រី មឺរកែល ប្រហែលជាចង់ចំណាយពេលច្រើននៅជាមួយស្វាមី Joachim Sauer នៅតំបន់ឆ្នេរសមុទ្រ។ AFP
.jpg)
ក្រុងប៊ែរឡាំង៖ បន្ទាប់ពីរយៈពេល ១៦ ឆ្នាំនៃការគ្រប់គ្រងសេដ្ឋកិច្ចដ៏ធំបំផុតរបស់អឺរ៉ុប រឿងដំបូងដែលលោកស្រី អេនជេឡា មឺរកែល ចង់ធ្វើនៅពេលដែលលោកស្រីចូលនិវត្តន៍ពីនយោបាយគឺ «សម្រាកបន្តិច» ប៉ុន្តែក្រោយពីសម្រាក តើស្ត្រីដ៏ល្បីល្បាញក្នុងឆាកនយោបាយរូបនេះនឹងធ្វើអ្វីបន្ទាប់ទៀត?
អធិការបតីជើងចាស់រូបនេះនឹងធ្វើការប្រគល់តំណែងទៅឱ្យលោក Olaf Scholz នៅថ្ងៃទី ៨ ខែធ្នូ។
ក្នុងអំឡុងពេលកាន់តំណែងទាំង ៤ អាណត្តិលោកស្រីមឺរកែលវ័យ៦៧ឆ្នាំជារឿយៗត្រូវបានពិពណ៌នាថា ជាស្ត្រីដែលមានអំណាចបំផុតនៅលើពិភពលោកប៉ុន្តែលោកស្រីបានព្រលយថា លោកស្រីនឹងមិននឹកនាបន្ទុកការងារដ៏ធ្ងន់ធ្ងរនោះឡើយ។
លោកស្រីបាននិយាយក្នុងអំឡុងពេលធ្វើដំណើរទៅកាន់ទីក្រុងវ៉ាស៊ីនតោននារដូវក្តៅនេះថា៖ «ខ្ញុំនឹងយល់ជ្រួតជ្រាបបានយ៉ាងឆាប់រហ័សថាអ្វីៗទាំងអស់នេះឥឡូវនេះគឺជាការទទួលខុសត្រូវរបស់អ្នកផ្សេង ហើយខ្ញុំគិតថា ខ្ញុំនឹងចូលចិត្តស្ថានភាពបែបនោះ»។
កាយវិការចុងម្រាមដៃផ្គុំគ្នារបស់លោកស្រី មឺរកែល ដែលធ្វើឱ្យមនុស្សជាច្រើនចងចាំ។ AFP
សាងភាពល្បីល្បាញដោយសារភាពរឹងមាំនិងសមត្ថភាពរបស់លោកស្រីក្នុងការរក្សាភាពស្រស់ស្រាយបន្ទាប់ពីកិច្ចប្រជុំពេញ ១ យប់លោកស្រី មឺរកែល ធ្លាប់បាននិយាយថា លោកស្រីអាចសន្សំម៉ោងដំណេកប៉ះប៉ូវគ្រារវល់ខ្លាំង ដូចជាសត្វអូដ្ឋរក្សាទុកទឹកសម្រាប់គ្រាខ្វះខាតដូច្នោះដែរ។
ប៉ុន្តែនៅពេលសួរអំពីការចូលនិវត្តន៍របស់លោកស្រីនៅទីក្រុងវ៉ាស៊ីនតោនមឺរកែល បានឆ្លើយថា៖ «ប្រហែលជាខ្ញុំនឹងព្យាយាមអានអ្វីមួយបន្ទាប់មកភ្នែករបស់ខ្ញុំនឹងចាប់ផ្តើមបិទព្រោះខ្ញុំហត់នឿយដូច្នេះខ្ញុំនឹងគេងបន្តិចហើយបន្ទាប់មកយើងនឹងអាចដឹងថារូបខ្ញុំទៅដល់ទីណា»។
អតីតអធិការបតីរូបនេះបាននិយាយថា៖ «នៅពេលដែលខ្ញុំឈានដល់អាយុ ៦៧ ឆ្នាំខ្ញុំមិនមានពេលវេលានៅសល់ច្រើនទេ។ នេះមានន័យថាខ្ញុំចង់គិតឱ្យបានហ្មត់ចត់អំពីអ្វីដែលខ្ញុំចង់ធ្វើនៅក្នុងដំណាក់កាលបន្ទាប់នៃជីវិតរបស់ខ្ញុំ»។
លោកស្រីបានរៀបរាប់ថា៖ «តើខ្ញុំចង់សរសេរខ្ញុំចង់និយាយខ្ញុំចង់ដើរលេងខ្ញុំចង់នៅផ្ទះខ្ញុំចង់ឃើញពិភពលោកមែនទេ? ខ្ញុំសម្រេចចិត្តថា មិនទាន់ធ្វើអ្វីទាំងអស់ និងរង់ចាំមើលថាតើនឹងមានអ្វីកើតឡើងសិន»។
លោកស្រី មឺរកែល ធ្លាប់បាននិយាយថា លោកស្រីអាចសន្សំម៉ោងដំណេកប៉ះប៉ូវគ្រារវល់ខ្លាំង ដូចជាសត្វអូដ្ឋរក្សាទុកទឹកដែរ។ AFP
លោកស្រី មឺរកែល ប្រហែលជាចង់ចំណាយពេលច្រើន នៅជាមួយស្វាមីរបស់លោកស្រី Joachim Sauer នៅ Hohenwalde ជិតក្រុង Templin ជាស្រុកកំណើតដែលអតីតអធិការបតីអាល្លឺម៉ង់រូបនេះធំធាត់និងជាកន្លែងដែលលោកស្រីមានផ្ទះវិស្សមកាលទុកគ្រាន់សម្រាកស្រូបខ្យល់អាកាសរំសាយភាពនឿយហត់។
ក្នុងចំណោមសកម្មភាពកម្សាន្តដែលលោកស្រីអាចនឹងធ្វើរួមមានការដាំបន្លែនិងជាពិសេសការដាំដំឡូងជាអ្វីដែលលោកស្រីធ្លាប់បានប្រាប់ទស្សនាវដ្ដីBunteក្នុងបទសម្ភាសមួយក្នុងឆ្នាំ ២០១៣ ថា ជាចំណូលចិត្តរបស់លោកស្រីផ្ទាល់តែម្ដង។
លោកស្រីក៏ត្រូវបានគេស្គាល់ថា ជាអ្នកស្រឡាញ់ទឹកដីភ្នំភ្លើង D''Ischia ជាពិសេសភូមិមាត់សមុទ្រដាច់ស្រយាលនៃ Sant''Angelo។
លោកស្រី មឺរកែល ត្រូវបានគេថតបាននៅលើវីដេអូទូរស័ព្ទស្មាតហ្វូនក្នុងសប្តាហ៍នេះ ពេលលោកស្រីដើររកមើលទិញស្បែកជើងក្នុងហាងលក់សម្លៀកបំពាក់កីឡានៅទីក្រុងប៊ែរឡាំងដែលនាំឱ្យមានការរំពឹងទុកថា លោកស្រីអាចនឹងមានគម្រោងសកម្មភាពកីឡាអ្វីមួយ។
លោកស្រី មឺរកែល ពុំទាន់ដឹងថានឹងត្រូវធ្វើអ្វីបន្ទាប់ អាចជាការសម្រាក ឬលម្ហែនៅឆ្នេរសមុទ្រ។ AFP
អតីតអ្នកវិទ្យាសាស្ត្ររូបនេះក៏អាចចាប់ផ្តើមដំណើរទេសចរណ៍ជាវាគ្មិននៃសាកលវិទ្យាល័យរាប់មិនអស់តាំងពីទីក្រុងសេអ៊ូលរហូតដល់ទីក្រុងតែលអាវីវដែលបានប្រគល់សញ្ញាបត្របណ្ឌិតកិត្តិយសដល់លោកស្រីផងដែរ។
លោកស្រី មឺរកែលត្រូវបានកំណត់ឱ្យទទួលបានប្រាក់សោធននិវត្តន៍ប្រចាំខែប្រមាណ ១៥០០០អឺរ៉ូ (១៦ ៩០០ ដុល្លារ) នេះបើយោងតាមការគណនាដោយសមាគមអ្នកបង់ពន្ធអាល្លឺម៉ង់។
ប៉ុន្តែលោកស្រីមិនធ្លាប់ជាមនុស្សម្នាក់ចាយវាយខ្ជះខ្ជាយឡើយដោយជ្រើសរើសយកការរស់នៅក្នុងអាផាតមិនជាន់ទី ៤ ក្នុងទីក្រុងប៊ែរឡាំងហើយជាញឹកញាប់ធ្វើការដើរទិញអីវ៉ាន់ផ្ទាល់ខ្លួននៅផ្សារទំនើបសាមញ្ញៗ។
ក្នុងឆ្នាំ ២០១៤ លោកស្រីថែមទាំងបាននាំលោកនាយករដ្ឋមន្ត្រី លី កេឈាំងទៅកាន់ផ្សារទំនើបដែលលោកស្រីចូលចិត្តទិញទំនិញនៅទីក្រុងប៊ែរឡាំង បន្ទាប់ពីកិច្ចប្រជុំទ្វេភាគីទៀតផង។
ដូច្នេះ ប្រហែលជាលោកស្រីនឹងចំណាយពេល១យប់ដ៏ស្ងប់ស្ងាត់ ដើម្បីពិសាស្រាស និងទទួលទានអាហារចំណូលចិត្តគឺស៊ុបដំឡូងដ៏ឆ្ងាញ់៕
លោកស្រី មឺរកែល ចូលចិត្តសកម្មភាពដាំដុះធ្វើសួនដំណាំ និងទទួលទានម្ហូបស៊ុបដំឡូងដ៏ឆ្ងាញ់ពិសា។ AFP
