មនុស្សម្នារាំជាមួយនឹងឈុតធ្វើពីសំណល់ប្លាស្ទិកក្នុងពិធីជប់លៀងអនាធិបតេយ្យកាលពីចុងខែវិច្ឆិកា។ AFP
.jpg)
ក្រុងឡាហ្គោស៖ ធ្វើចលនារាំតាមចង្វាក់នៃស្គរយក្សស្រោបប្លាស្ទិក មនុស្ស ២ នាក់ បានលោតកញ្ឆេង និងបង្វិលខ្លួនហុយដីទ្រលោមនៅតាមច្រកវិថីតូចមួយក្នុងសង្កាត់អូរ៉ូវ៉ុនហ្សូស្គីជាតំបន់ក្រីក្រមួយនៃក្រុងឡាហ្គោស នៃបេះដូងសេដ្ឋកិច្ចធំរបស់ប្រទេសនីហ្សេរីយ៉ា។
នៅផ្ទះឈើដំបូលស័ង្កសីយ៉ាងតោកយ៉ាក អ្នកស្រុកបានអើតក្បាលចេញមកក្រៅហើយនាំគ្នាបើកភ្នែកធំៗសម្លឹងមើលក្បូនដង្ហែការរាំរែកដ៏ចម្លែកនេះ ដែលបន្តដំណើរទៅមុខសន្សឹមៗ។
មិនយូរប៉ុន្មានមនុស្សម្នាជាច្រើនបានមកចោមរោម និងចូលរួមជាមួយអ្នករាំគ្រងដោយឈុតសម្លៀកបំពាក់ច្នៃចេញពីដបប្លាស្ទិក ដែលប្រមូលបានពីគ្រប់ច្រកល្ហកនៃសង្កាត់ដ៏ក្រីក្រនេះ។
អ្នករាំម្នាក់ដុតភ្លើងផ្លុំ ក្នុងពិធីជប់លៀងអនាធិបតេយ្យនៅសង្កាត់អូរ៉ូវ៉ុនហ្សូស្គីនៃទីក្រុងឡាហ្គោស។ AFP
សូមស្វាគមន៍មកកាន់ «ពិធីជប់លៀងអនាធិបតេយ្យ» (Slum Party) ដែលចាប់ផ្តើមជាមួយនឹងតន្ត្រីការរាំនិងការផ្លុំភ្លើងសម្ដែងដ៏អស្ចារ្យ។
អស់រយៈពេល ៣ ឆ្នាំមកហើយក្រុមអ្នកសម្ដែងវ័យក្មេងជនជាតិនីហ្សេរីយ៉ាចំនួន ១០ នាក់បានរិះរកវិធីធ្វើឱ្យប្រសើរឡើង នូវជីវិតរបស់អ្នកស្រុកអូរ៉ូវ៉ុនហ្សូស្គីតាមរយៈការរាំ និងសម្ដែងសិល្បៈ ដោយសង្ឃឹមថា សកម្មភាពនេះនឹងផ្លាស់ប្តូរកេរ្តិ៍ឈ្មោះដ៏អាក្រក់ជាតំបន់ងាយរងការវាយប្រហារដោយអំពើហិង្សា។
លោក វ៉ាលូ ស្ថាបនិក «ពិធីជប់លៀងអនាធិបតេយ្យ» ដែលប្រារព្ធឡើង ១ ឆ្នាំម្ដងបាននិយាយថា៖ «នៅឆ្នាំ ២០១៩ អូរ៉ូវ៉ុនហ្សូស្គី បានប្រឈមមុខនឹងបញ្ហាសន្តិសុខជាច្រើនហើយគ្មាននរណាម្នាក់ហ៊ានចេញទៅក្រៅតាមផ្លូវទៀតទេ»។
ចុងភៅរៀបចំអាហារសម្រាប់អ្នករាំនិងភ្ញៀវក្នុងពិធីជប់លៀងអនាធិបតេយ្យនៅក្រុងឡាហ្គោស។ AFP
បុរសជាអ្នករាំអាជីពដែលមានឈ្មោះពិតថាសាន់ឌេយ អូហ្សេហ្គប៊ី អូប៊ីយ៉ាជូលូ បាននិយាយថា៖ «យើងចាប់ផ្តើមរាំនៅតាមផ្លូវដើម្បីកុំឱ្យប្រជាជនភ័យខ្លាចតទៅទៀតហើយឱ្យពួកគេចាប់ផ្តើមមានភាពក្លាហានចេញដើរហើរតាមផ្លូវឡើងវិញ»។
សមាជិករាំវ័យ ៣៧ ឆ្នាំ ឈ្មោះ ម៉ារថា អ៊ីហ្ស៊េ បាននិយាយថា៖ «ពីមុនខ្ញុំសម្ងំនៅតែផ្ទះជាមួយកូនរបស់ខ្ញុំ ប៉ុន្តែឥឡូវនេះដោយសារតែពួកគេ [ក្រុម Slum Party] ខ្ញុំបានធ្វើអ្វីដែលប្លែក ទាំងពីមុនមកខ្ញុំពុំធ្លាប់មានអារម្មណ៍បែបនេះសោះ»។
លើសពីការសម្តែងសាមញ្ញៗអ្នករៀបចំកម្មវិធីក៏ប្រើប្រាស់ «ពិធីជប់លៀងអនាធិបតេយ្យ» ជាឧបករណ៍ផ្សព្វផ្សាយសារលើកកម្ពស់ការយល់ដឹងពីនយោបាយផងដែរ។
អ្នករាំនៃEnnovate Dance House សម្ដែងនៅតាមផ្លូវក្នុងពិធីជប់លៀងអនាធិបតេយ្យ។ AFP
អ្នករាំម្នាក់ទៀតឈ្មោះ អូឡាមីដេ បាលីឃ្វីន បាននិយាយដោយចង្អុលទៅហ្វូងកុមារតូចៗថា៖ «យើងមិនចង់រងទុក្ខដូចឪពុកម្តាយរបស់យើងទេហើយយើងច្បាស់ជាមិនចង់ឱ្យពួកគេរងទុក្ខដូចយើងនោះទេ»។
កាលពីឆ្នាំមុនវីដេអូដែលបង្ហាញពីសកម្មភាពស្ថាបនិកកម្មវិធី ឡោក វ៉ាឡូ រាំក្នុងភក់ជ្រាំដ៏ធំនៅចំពោះមុខប៉ូលិសដើម្បីបរិយាយពីស្ថានភាពមហន្តរាយនៃផ្លូវថ្នល់នោះត្រូវបានវាយប្រហារលើបណ្តាញសង្គម។
លោកបាននិយាយថា៖ «ខ្ញុំចង់បង្ហាញថា អ្នកអាចរិះគន់បែបស្ថាបនា និងធ្វើឱ្យសង្គមប្រសើរឡើងតាមរយៈសកម្មភាពសាមញ្ញៗនៅលើដីដូច្នេះ»៕
អ្នករាំនៃEnnovate Dance House សម្ដែងនៅតាមផ្លូវក្នុងពិធីជប់លៀងអនាធិបតេយ្យ។ AFP
