អំប្រ៊ីយ៉ុងដាយណូស័រក្នុងសម្បកស៊ុត ដ៏ពេញលក្ខណៈឥតខ្ចោះមានអាយុកាលយ៉ាងហោចណាស់ ៦៦ លានឆ្នាំ។
ក្រុងវ៉ាស៊ីនតោន៖ អ្នកវិទ្យាសាស្ត្រកាលពីថ្ងៃអង្គារបានប្រកាសពីការរកឃើញអំប្រ៊ីយ៉ុងដាយណូស័រ ដែលត្រូវបានថែរក្សាយ៉ាងល្អឥតខ្ចោះក្នុងសម្បកស៊ុត មានអាយុកាលយ៉ាងហោចណាស់ ៦៦ លានឆ្នាំមុន ដែលជាសត្វកំពុងរៀបញាស់ពីពងដូចទៅនឹងមាន់ញាស់ពីស៊ុតដែរ។
ហ្វូស៊ីលនេះត្រូវបានគេរកឃើញនៅទីក្រុងគ័ងចូវ ភាគខាងត្បូងប្រទេសចិនហើយវាស្ថិតក្នុងអម្បូររបស់សត្វដាយណូស័រ theropod គ្មានធ្មេញឬ oviraptorosaur ដែលអ្នកស្រាវជ្រាវបានដាក់ឈ្មោះថាអំប៊ី្រយ៉ុងក្នុងស៊ុតនោះថាប៊េប៊ីយីងលាំង (Baby Yingliang)។
អ្នកស្រាវជ្រាវនៃសាកលវិទ្យាល័យប៊ឺមីងហាមលោក ហ្វីអន វៃស៊ុម ម៉ា ដែលជាសហអ្នកនិពន្ធអត្ថបទនៅក្នុងទស្សនាវដ្តី iScienceបានប្រាប់ AFP ថា៖ «វាគឺជាអំប្រ៊ីយ៉ុងដាយណូស័រដ៏ល្អបំផុតមួយដែលមិនធ្លាប់មានក្នុងប្រវត្តិសាស្ត្រ»។
លោក ម៉ា និងសហការីបានរកឃើញក្បាលរបស់ប៊េប៊ីយីងលាំងពត់ដេកនៅខាងក្រោមដងខ្លួនចន្លោះជើងទាំងសងខាង និងខ្នងកោងជាទម្រង់ដេកក្នុងស៊ុត ដែលពីមុនមិនធ្លាប់បានឃើញនៅក្នុងដាយណូស័រ ប៉ុន្តែវាមានសណ្ឋានស្រដៀងទៅនឹងសត្វស្លាបសម័យទំនើប។
នៅក្នុងសត្វស្លាបអាកប្បកិរិយាត្រូវបានគ្រប់គ្រងដោយប្រព័ន្ធសរសៃប្រសាទកណ្តាល ហើយត្រូវបានគេហៅថា «ការផ្អោបខ្លួន»។ វាស្រដៀងនឹង កូនមាន់ដែលកំពុងរៀបចំញាស់ដាក់ក្បាលនៅក្រោមស្លាបស្តាំរបស់វាដើម្បីរក្សាលំនឹងក្បាលខណៈដែលវាបំបែកសម្បកដោយចំពុះ។
ប៊េប៊ីយីងលាំងពត់ដេកនៅខាងក្រោមដងខ្លួនចន្លោះជើងទាំងសងខាងនិងខ្នងកោងជាទម្រង់ដេកក្នុងស៊ុត។
ប៊េប៊ីយីងលាំង មានប្រវែងប្រហែល២៧សង់ទីម៉ែត្រ គិតពីក្បាលដល់កន្ទុយ ហើយស្ថិតនៅក្នុងស៊ុតប្រវែង១៧សង់ទីម៉ែត្រ នៅឯសារមន្ទីរថ្មធម្មជាតិយីងលាំង។
អ្នកស្រាវជ្រាវជឿថាសត្វនេះមានអាយុកាលចន្លោះពី៧២ទៅ៦៦លានឆ្នាំ ហើយប្រហែលជាសេសសល់ពីការរអិលបាក់ដីភ្លាមៗ ដែលបានកប់ស៊ុតការពារវាពីសត្វដទៃទៀតរើសស៊ីអស់ជាច្រើនជំនាន់។
ប្រសិនបើវាញាស់វានឹងអាចលូតលាស់មានប្រវែងពី២ទៅ៣ម៉ែត្រហើយទំនងជាសត្វស៊ីរុក្ខជាតិ។
សាស្ត្រាចារ្យ ស្ទីវ ប្រ៊ូសាត នៃសាកលវិទ្យាល័យអេឌីនប៊ឺកដែលជាផ្នែកនៃក្រុមស្រាវជ្រាវបាននិយាយនៅក្នុងសេចក្តីថ្លែងការណ៍១ថា៖ «អំប្រ៊ីយ៉ុងដាយណូស័រនៅក្នុងស៊ុតរបស់វាគឺជាហ្វូស៊ីលដ៏ស្រស់ស្អាតពេញលក្ខណៈបំផុត១ ដែលខ្ញុំធ្លាប់បានឃើញ»។
លោកបន្តថា៖ «ដាយណូស័រមុននឹងញាស់នេះមើលទៅដូចជាកូនបក្សីដែលរួញនៅក្នុងពងរបស់វាហើយវាជាភ័ស្តុតាងបន្ថែមទៀតថាសម័យពីសម័យមុននេះលក្ខណពិសេសជាច្រើនដែលឈានដល់សន្និដ្ឋានពីសត្វស្លាបនាពេលបច្ចុប្បន្ននេះបានវិវត្តដំបូងនៅក្នុងបុព្វបុរសដាយណូស័ររបស់ពួកវា»៕ AFP
ប្រសិនបើវាញាស់វានឹងអាចលូតលាស់មានប្រវែងពី២ទៅ៣ម៉ែត្រ ហើយទំនងជសត្វស៊ីរុក្ខជាតិ។
