គ្រឿងផ្សំក្នុងការចម្អិនម្ហូបត្រូវបានសម្រិតសម្រាំងពីប្រទេសបារាំង និងកម្ពុជា។ រូបថត សហការី
ភ្នំពេញ: ជំងឺរាតត្បាតបានធ្វើឱ្យភោជនីយដ្ឋានមួយចំនួនត្រូវបិទទ្វារ ខណៈហាងជាច្រើនប្រឹងបន្តដង្ហើមប្រតិបត្តិការរបស់ខ្លួន។
យ៉ាងណាមិញ ភោជនីយដ្ឋានម្ហូបប្រណីត Topaz ដ៏មានអាយុកាលចាស់វស្សានៅទីក្រុងភ្នំពេញ បានជាប់ក្នុងបញ្ជីភោជនីយដ្ឋានកំពូលទាំង ១០០ នៅអាស៊ី ពីកម្មវិធី «ភោជនីយដ្ឋានល្អបំផុតទាំង ៥០ នៅអាស៊ី» ដែលបានប្រកាសអ្នកឈ្នះរង្វាន់ពីលេខរៀង ៥១-១០០ កាលពីថ្ងៃទី ២៣ មីនា ឆ្នាំ ២០២២។
«ភោជនីយដ្ឋានល្អបំផុតទាំង ៥០ របស់អាស៊ី» ត្រូវបានបង្កើតឡើងក្នុងឆ្នាំ ២០១៣ ដើម្បីអបអរអាហារទូទាំងតំបន់ ក៏ដូចជាផ្ដល់នូវការយល់ដឹង និងណែនាំពីសិល្បៈនៃការធ្វើម្ហូប។ ភោជនីយដ្ឋានត្រូវបានជ្រើសរើស ដោយក្រុមអ្នកជំនាញម្ហូបជាង ៣០០ នាក់ តាមរយៈការបោះឆ្នោត។
អ្នកនាង ហាក់ លីណា ជាអ្នកគ្រប់គ្រងនៅ Topaz ប្រាប់ ភ្នំពេញ ប៉ុស្តិ៍ថា៖ «យើងជាប់ក្នុងលេខរៀង ៩០ ក្នុងចំណោមហាងដែលមានកិត្តិយសជាច្រើនទាំងហាង The Chairman របស់ហុងកុង Gaggan Annam របស់ថៃ និង Odette សិង្ហបុរី និង Den ត្យូក្យូ។ វាជាលើកទី១ ក្នុងប្រវត្តិសាស្ត្រ ដែលមេចុងភៅខ្មែរត្រូវបានជ្រើសរើសជាប់នៃការប្រកួតប្រជែងដ៏ល្បីនេះ»។
លោក ពៅ សុភ័ក្រ ជាមេចុងភៅជាង ២០ ឆ្នាំនៅ Topaz ប្រាប់ដែរថា៖ «ជាក់ស្ដែងអារម្មណ៍ខ្ញុំរីករាយមែនទែន ព្រោះថា នេះជាលើកទី២ ហើយ ដែលខ្ញុំទទួលបានជើងឯកប្រចាំប្រទេស។ លើកទី១ ខ្ញុំជាប់បានលេខ ៤ នៅពេលទៅប្រឡងវគ្គផ្ដាច់ព្រ័ត្រនៅអូស្ត្រាលី តាមកម្មវិធី MLA Black Box Culinary Challenge។ ហើយថ្មីៗនេះ ខ្ញុំក៏ដូចជាហាងរបស់ខ្ញុំ បានជាប់នៅក្នុងបញ្ជីនេះ ដែលជាជោគជ័យ ១ ទៀតរបស់ខ្ញុំ និងក្រុមការងារអាចធ្វើបាន។ ខ្ញុំពិតជាមានមោទនភាពមែនទែន»។
លោក ពៅ សុភ័ក្រ វិវឌ្ឍខ្លួនពីអ្នកធ្វើការក្នុងផ្ទះបាយធម្មតា រហូតក្លាយជាមេចុងភៅអាហារប្រណីត។ រូបថត សហការី
អ្នកនាង លីណា បន្តថា ក្រុមការងារភោជនីយដ្ឋានពិតជាកិត្តិយសខ្លាំងណាស់ ដោយចាត់ទុកពានរង្វាន់នេះ ជាមូលដ្ឋានគ្រឹះឱ្យពួកគេបន្តអភិវឌ្ឍខ្លួនឆ្ពោះទៅភាពកាន់តែល្អប្រសើរ និងជាសក្ខីភាពនៃវិស័យទេសចរណ៍ដ៏មានសក្ដានុពលនៅកម្ពុជា។
អ្នកនាងថា វាគួរឱ្យរំភើបចិត្តណាស់ដែលចុងភៅ និងភោជនីយដ្ឋាន ជំនាន់ក្រោយអាចឃើញពីអ្វីដែលពួកគេសម្រេចបាន ចេញពីការប្ដេជ្ញាចិត្ត ចក្ខុវិស័យត្រឹមត្រូវ និងជាមួយមនុស្សត្រឹមត្រូវ។
អំឡុងពេលកូវីដ អ្នកនាងថា វាជាពេលដែលវិស័យបដិសណ្ឋារកិច្ចត្រូវបានធ្លាក់ចុះ និងជាវេលាដ៏លំបាកក្នុងការឈរនៅលើភាពវិជ្ជមាន ខណៈពេលដែលមានភ្ញៀវតិចតួច។
អ្នកនាងថា៖ «ប៉ុន្តែអ្វីមួយដែលយើងមិនចុះចូលនោះការនៅតែពង្រឹងលើស្តង់ដា និងគុណភាពការទទួលភ្ញៀវមកចូលញ៉ាំក្នុងហាង»។
អ្នកនាងថា កត្តារួមចំណែកក្នុងការដែល Topaz ត្រូវបានជាប់ក្នុងបញ្ជីនោះ គឺជាស្មារតី កម្លាំងកាយចិត្តពីគ្រប់បុគ្គលិក ដើម្បីសម្រេចគោលដៅតែ ១។ ពួកគេតែងតែព្យាយាមអភិវឌ្ឍគ្រប់ជ្រុងក្នុងបទពិសោធបម្រើអាហារប្រណីត ដែលអ្នកនាងបញ្ជាក់ថា គ្មានអ្វីល្អឥតខ្ចោះទេ ប៉ុន្តែនៅតែអាចអភិវឌ្ឍបន្ថែមទៀតបាន។
អ្នកគ្រប់គ្រងវ័យ ៣៧ ឆ្នាំរូបនេះថា៖ «Topaz ជឿថា អ្វីៗអាចកែលម្អបានជានិច្ច។ គ្រប់គ្នាដែលធ្វើការនៅទីនេះមានចិត្តគំនិតដូចគ្នា គឺធ្វើឱ្យភោជនីយដ្ឋានល្អតាមដែលអាចធ្វើទៅបាន»។
ជាង ២ ទសវត្សរ៍មកហើយចាប់តាំងពីបើកទ្វារឆ្នាំ ១៩៩៧ ជាភោជនីយដ្ឋានបានបម្រើអាហារឆ្ងាញ់បែបប្រណីតរបស់បារាំង និងយកគ្រឿងផ្សំសំខាន់ពីបារាំង និងកម្ពុជា។ យ៉ាងណាមិញ ចុងភៅ សុភ័ក្រ ថាក្នុងនោះលោកក៏អាចធ្វើម្ហូបតម្រូវតាមអតិថិជនដែរជាមួយរសជាតិជាក្លាយអាស៊ីខ្លះ។
ដោយសារតែជាភោជនីយដ្ឋានបារាំង Topaz ក៏ជាទីកសាងជំនាញសម្រាប់ចុងភៅខ្មែរជំនាន់ក្រោយ ទាំងអ្នកគ្រប់គ្រង និងសមាជិកផ្សេងៗ ដូចជាមេចុងភៅ សុភ័ក្រ ផ្ទាល់ផងដែរ។
បុគ្គលិក និងចុងភៅរួមចំណែកក្នុងការនាំភោជនីយដ្ឋានទទួលបានការវាយតម្លៃខ្ពស់។ រូបថត សហការី
លោក សុភ័ក្រ បានរំឭកថា៖ «ខ្ញុំផ្ដើមពីជាអ្នកធ្វើការក្នុងផ្ទះបាយធម្មតាក្នុងឆ្នាំ ២០០២ ប៉ុន្តែបានអភិវឌ្ឍខ្លួនរហូតដល់បានផ្តល់តំណែងជាមេចុងភៅ ឆ្នាំ ២០១០ ហើយវាមិនមែនជាការងាយស្រួលនោះទេ ព្រោះមេចុងភៅ Alain Darc ជាមេចុងភៅបារាំងដ៏តឹងរ៉ឹងបំផុតទៅលើគុណភាព»។
លោកទទួលការបណ្ដុះបណ្ដាលនៅ អង្គការមិត្តសម្លាញ់ មុននឹងមករៀនពីមេចុងភៅបារាំងនៅ Topaz ហើយក៏ត្រូវបានបញ្ជូនទៅសិក្សានៅប្រទេសបារាំង រយៈពេល ៦ ខែជាមួយហាងលំដាប់ផ្កាយ Le Carre des Feuillants និង Le Relais de la Poste ជាទីដែលលោកបានក្រេបជញ្ជក់ចំណេះដឹងជាច្រើនមុនត្រឡប់មកធ្វើមេចុងភៅនៅមាតុភូមិវិញ។
ប្រាប់ពីគោលបំណងនាំ Topaz ទៅទីខ្ពស់រុងរឿង លោក សុភ័ក្ត្រ ថា ក្នុងនាមជាចុងភៅម្នាក់ លោកចង់ធ្វើការអភិវឌ្ឍខ្លួនឱ្យល្អជាងហ្នឹងថែមទៀត ជាមួយបំណងបើកជាហាងទទួលទានបែបប្រណីត និងហាងលំដាប់ផ្កាយ។ ជាក់ស្ដែង លោកក៏កំពុងបណ្ដុះបណ្ដាលសិស្សប្អូនៗ នៅ Topaz លើចំណេះជំនាញនេះផងដែរ។
លោក សុភ័ក្រ បានផ្ដាំផ្ញើទៅកាន់អ្នកចង់អភិវឌ្ឍខ្លួនជាចុងភៅ និងចុងភៅនៅកម្ពុជាថា៖ «ខ្ញុំគ្រាន់តែចង់សំណូមពរឱ្យប្អូនៗ ជាទំពាំងស្នងឫស្សី ដែលចង់ធ្វើជាចុងភៅក្នុងថ្ងៃអនាគត ប្រឹងប្រែងតស៊ូយល់ឱ្យច្បាស់អំពី ម្ហូបដែលយើងធ្វើ ហើយត្រូវដឹងពីមុខម្ហូបណាដែលគេចាត់ទុកជាមុខម្ហូបសម្រាប់ការទទួលទានបែបប្រណីត។ ពេលទំនេរគួរស្វែងរកអ្វីដែលថ្មី។ ចំពោះ មេចុងភៅត្រូវខិតខំដឹកនាំកូនក្រុមរៀងៗខ្លួន ជាពិសេសគួរមានវគ្គបណ្ដុះបណ្ដាលសម្រាប់បុគ្គលិកក្រោមឱវាទ»។
សម្រាប់ព័ត៌មានបន្ថែមពីភោជនីយដ្ឋាន Topaz សូមចូលទៅកាន់គេហទំព័រ topaz-restaurant.com៕
