ក្រុងប៉ារីស៖ មាន់គក ១ ក្បាលឈ្មោះ «Pitikok» បានធ្វើឱ្យមនុស្សមួយចំនួនកើតទុក្ខទោម្នេញនៅភាគខាងត្បូងប្រទេសបារាំង ហើយឥឡូវនេះពលរដ្ឋបានត្រៀមខ្លួនរួចជាស្រេច ដើម្បីសាកល្បងដែនកំណត់ច្បាប់ពីករណីសំឡេងរំខាន។
អ្នកជិតខាងខឹងសម្បានឹងសម្រែករងាវកោកកាក បានបីសត្វមាន់ជាម្ចាស់សម្រែកទៅតុលាការ។
ប៉ុន្តែអ្នកស្រីជាម្ចាស់មាន់គកអាចរួចផុតពីការពិន័យក្រោមច្បាប់ថ្មីដែលការពារ «កេរដំណែលសញ្ញាណ» នៅទីជនបទចាប់ពីសំឡេងកណ្ដឹងព្រះវិហាររហូតដល់ក្លិនសត្វពាហនៈក្នុងកសិដ្ឋាន។
ម្ចាស់មាន់គកនៅក្នុងភូមិ Oursbelille ចម្ងាយ ១៥០ គីឡូម៉ែត្រភាគនិរតីនៃទីក្រុង Toulouse បានប្រឈមនឹងពាក្យបណ្តឹងសាជាថ្មីហើយគ្រោងនឹងបង្ហាញខ្លួននៅតុលាការក្នុងខែមិថុនា។
ម្ចាស់មាន់គកដែលសុំមិនបញ្ចេញឈ្មោះ បាននិយាយថា៖ «រឿងនេះបានចាប់ផ្តើមតាំងពីឆ្នាំ២០១៩មក។ បុរសអ្នកជិតខាងក្បែរនោះដែលមកវិស្សមកាលតែ២ដងក្នុង១ឆ្នាំ (គាត់) បានមកជួបខ្ញុំ និងទាមទារឱ្យខ្ញុំយកមាន់របស់ខ្ញុំចេញ»។
អ្នកស្រីបានប្រាប់ទីភ្នាក់ងារ AFP ថា៖«ការព្យាយាមសម្របសម្រួលបានបរាជ័យដោយសារតែដំណោះស្រាយតែ ១ គត់ ដែលលោកម្ចាស់ផ្ទះជិតខាង បានស្នើនោះ គឺថាយើងត្រូវតែយកសត្វរបស់យើងចេញ។ អស់ឆ្ងល់ហ្មង!»។
ករណីនេះរំឭកឡើងវិញនូវវិវាទជាបន្តបន្ទាប់បានកើតឡើងដល់អ្នកភូមិ ដែលមានកសិដ្ឋានតូចៗធ្វើឱ្យទាស់ចិត្ដអ្នកមិនស៊ាំនឹងសំឡេងស្រុកស្រែជនបទ ដែលភាគច្រើនជាអ្នកចំណូលថ្មី ឬអ្នកមកវិស្សមកាលដើម្បីស្វែងរកភាពស្ងប់ស្ងាត់នៅតាមជនបទ។
នៅក្នុងជម្លោះពាក់ព័ន្ធសត្វស្លាប ១ករណីផ្សេងទៀតបានល្បីទូទាំងពិភពលោក។ កាលនោះមាន់គកឈ្មោះម៉ូរីស (Maurice) និងម្ចាស់របស់វាបានឈ្នះក្ដីតាមផ្លូវច្បាប់ជាមួយអ្នកជិតខាងក្នុងខែកញ្ញា ឆ្នាំ២០១៩ដោយចៅក្រមបានច្រានចោលការអះអាងពីការរំខានដល់ភាពស្ងប់ស្ងាត់។
ប៉ុន្តែជម្លោះបែបនេះត្រូវបានគេដឹងថាបានក្លាយជាហិង្សា។ មនុស្សរាប់ម៉ឺននាក់បានចុះហត្ថលេខាលើញត្តិមួយកាលពីខែសីហា ឆ្នាំ២០២០ ដើម្បីស្វែងរកយុត្តិធម៌សម្រាប់មាន់ឈ្មោះម៉ារសែល (Marcel) ជាមាន់គកដែលត្រូវបានបាញ់សម្លាប់ដោយអ្នកជិតខាងនៅឃុំ Vinzieux ភាគខាងត្បូងប្រទេសបារាំង។
ឧប្បត្តិហេតុបែបនេះបានជំរុញឱ្យសមាជិកសភាអនុម័តច្បាប់កេរដំណែលជនបទក្នុងខែមករាឆ្នាំ២០២១ ដោយការពារអត្តសញ្ញាណសំឡេងនៅស្រុកស្រែជនបទដូចជា ទា និងសំឡេងត្រាក់ទ័រមុនថ្ងៃរះ ក៏ដូចជាកណ្ដឹងពាក់កសត្វពាហនៈ និងលាមកគោក្របីជាដើម។
អ្នកនាង Stephane Jaffrain មេធាវីរបស់ម្ចាស់មាន់គក Pitikok បាននិយាយថា៖ «ជាថ្មីម្តងទៀតយើងកំពុងដោះស្រាយជាមួយនឹងអ្នកទើបមកនៅថ្មីៗដែលមកលេងជនបទ ហើយមិនអាចទ្រាំទ្រ ឬពិបាកស៊ូទ្រាំជាមួយសំឡេងធម្មជាតិ»៕ AFP/HR