ភ្នំពេញៈ ភាពយន្តជាប់ក្នុងជម្រើសកម្មវិធីមហោស្រពភាពយន្តក្រុងកាន The Cannes Film Festival ផលិតចន្លោះឆ្នាំ ២០២០-២០២១ ចំនួន ១៩ រឿង និងខ្សែភាពយន្តផលិតនៅឆ្នាំផ្សេងៗ ចំនួន ២០ រឿង នឹងយកទៅចាក់បញ្ចាំងឱ្យទស្សនាកម្សាន្តនៅក្នុងរាជធានីភ្នំពេញ ប្រទេសកម្ពុជា តាមរយៈកម្មវិធី «មហោស្រពភាពយន្តក្រុងកាន នៅភ្នំពេញ-Cannes in Phnom Penh»។
កម្មវិធី «មហោស្រពភាពយន្តក្រុងកាន នៅភ្នំពេញ Cannes in Phnom Penh » នេះ នឹងធ្វើរយៈពេល ៩ ថ្ងៃ ចាប់ផ្តើមពីថ្ងៃទី ២០ ដល់ថ្ងៃទី ២៨ ខែ ឧសភា ឆ្នាំ ២០២២ ខាងមុខនេះ។
បើតាមសេចក្តីប្រកាសព័ត៌មានពីវិទ្យាស្ថានបារាំង ប្រចាំនៅកម្ពុជាបានឱ្យដឹងថា៖ «កម្មវិធីមហោស្រពភាពយន្តក្រុងកាន នាពេលនេះ បានមកប្រារព្ធធ្វើនៅរាជធានីភ្នំពេញហើយ! វិទ្យាស្ថានបារាំង កំពុងតែសហការជាមួយដៃគូរោងកុនធំៗគឺ Major Cineplex ដើម្បីជ្រើសយកខ្សែភាពយន្តដែលជាប់ក្នុងជម្រើសផ្សាយនៃកម្មវិធីមហោស្រពភាពយន្តក្រុងកាន ផលិតនៅចន្លោះឆ្នាំ ២០២០-២០២១ ចំនួន ១៩ រឿង និងភាពយន្តផលិតនៅឆ្នាំផ្សេងៗចំនួន ២០ រឿងទៀត (ដោយកុន ៦ រឿង បញ្ចាំងនៅរោងកុន Major Cineplex និងកុន ១៦ រឿងចាក់បញ្ចាំងនៅរោងកុននៃវិទ្យាស្ថានបារាំង)។ ខណៈថ្ងៃបើកសម្ពោធកម្មវិធីមហោស្រពភាពយន្តក្រុងកាន នៅភ្នំពេញនោះ លោកអ្នកនឹងបានទស្សនាខ្សែភាពយន្តរឿង «Memoria» ផលិតដោយ Apichatpong Weerasethakul ជារឿង ១ ក្នុងចំណោមវណ្ណកម្មថ្មីទាំង ១៩ រឿង ដែលផលិតនៅឆ្នាំ ២០២០-២០២១ និងមានការសម្តែងរបាំតុងហ្គោផងដែរ»។
ប្រភពដដែលបានបន្តថា៖ «ការរៀបចំមហោស្រពភាពយន្តក្រុងកាន នៅភ្នំពេញនេះ ដើម្បីអបអរសាទរដល់ការប្រារព្ធកម្មវិធីមហោស្រពភាពយន្តក្រុងកាន នៅប្រទេសបារាំង ខួបលើកទី៧៥ ដែលគេបានចាប់ផ្តើមធ្វើពីថ្ងៃទី ១៧ រហូតដល់ថ្ងៃទី ២៨ ខែ ឧសភា ឆ្នាំ ២០២២។ មហោស្រពភាពយន្តក្រុងកាន នេះគឺជាកម្មវិធីមួយដ៏ល្បីល្បាញនៅលើសកលលោក។ ជារៀងរាល់ឆ្នាំ គេបានអញ្ចើញសិល្បករ និងផលិតករ នៅជុំវិញពិភពលោកមកចូលរួមកម្មវិធីនេះ ដើម្បីបកស្រាយ និងបង្ហាញពីស្នាដៃខ្លួន ក្នុងកិច្ចការរួមគ្នាបង្កើតជាសម្ព័ន្ធភាពលើវិស័យភាពយន្ត នាពេលបច្ចុប្បន្ន និងពេលអនាគត នៅលើសកលលោក។
គួររំឭកដែរ នៅឆ្នាំ ២០១៩ គេឃើញមានខ្សែភាពយន្តដែលជាប់ជម្រើសក្នុងកម្មវិធីមហោស្រពភាពយន្តក្រុងកាន ចំនួន ៥៧ រឿង បានមកពីចំនួន ៣៥ ប្រទេសផ្សេងគ្នា ខណៈកម្មវិធីទាំងមូលនៅក្នុងឆ្នាំ ២០១៩ នេះ មានសិល្បករ និងផលិតករមកពីជុំវិញពិភពលោកចំនួន ១៧០ ប្រទេសឯណោះ។ ដោយឡែកនៅក្នុងប្រទេសកម្ពុជា ការប្រារព្ធកម្មវិធីមហោស្រពភាពយន្តក្រុងកាន នៅភ្នំពេញ ធ្លាប់បានធ្វើលើកដំបូងក្នុងឆ្នាំ ២០១៨ ខណៈមកដល់ឆ្នាំ ២០២២ នេះ ទើបអាចរៀបចំកម្មវិធីនេះ មកវិញបានម្តងទៀត។
បើយោងតាម លោក ឆន ប៊ុនឈឿន បុគ្គលិកផ្នែកទំនាក់ទំនងព័ត៌មាននៃវិទ្យាសា្ថនបារាំង បង្ហើបឱ្យដឹងថា៖ «កម្មវិធីមហោស្រពភាពយន្តក្រុងកាន នេះ នៅរាជធានីភ្នំពេញ ប្រទេសកម្ពុជា ទើបតែដល់ឆ្នាំ ២០២២ ទើបយើងបានរៀបចំម្តងទៀត។ ការរៀបចំលើកមុនចុងក្រោយបង្អស់នោះ គឺនៅក្នុងឆ្នាំ ២០១៨»។
សម្រាប់ការទស្សនាខ្សែភាពយន្តទាំង ៣៩ រឿង ក្នុងកម្មវិធីមហោស្រពភាពយន្តក្រុងកាន ឆ្នាំ ២០២២ នេះ ក៏តម្រូវឱ្យជាវសំបុត្រទស្សនាដែរ ដោយសំបុត្រ ១ តម្លៃ ៣ ដុល្លារ សម្រាប់ការទស្សនា ១ រឿង ខណៈការចំណាយ ២០ ដុល្លារ សម្រាប់ការទស្សនាខ្សែភាពយន្តទាំងអស់។ សំបុត្រកុនអាចរកជាវបាននៅឯវិទ្យាស្ថានបារាំង ចាប់ពីថ្ងៃទី ២០ ខែ ឧសភា ឆ្នាំ ២០២២ តទៅ៕