លោកប៊ិន រ៉ាត់ អ្នកនិពន្ធសៀវភៅ ដែលមានគោលបំណងចង់ឱ្យអ្នកមិនចូលចិត្តអាន និងអ្នកមិនធ្លាប់អានសៀវភៅ ងាកមករកការអានសៀវភៅ។ រូបថត សហការី
ភ្នំពេញៈ ការបំពេញកិច្ចការក្នុងវិស័យតែងនិពន្ធ ក៏ដូចជាវិស័យដទៃទៀត មនុស្សភាគច្រើនតែងតែមានគោលដៅចង់បានភាពល្អប្រសើរក្នុងជីវភាពរស់នៅប្រចាំថ្ងៃ ជាពិសេសភាពរីកចម្រើនខាងហិរញ្ញវត្ថុ។ ចំណែកមនុស្សមួយចំនួនតូចមិនបានគិតពីកត្តាទាំង ២ ខាងលើនោះឡើយ គេអាចគិតដល់កត្តាផ្សេងៗជាច្រើនដោយមិនបានគិតពីវត្ថុបំណងទាំង២នេះ។
លោក ប៊ិន រ៉ាត់ ជាអ្នកនិពន្ធម្នាក់ដែលមិនបានគិតគូរពីជីវភាពរបស់ខ្លួនឡើយ ទោះបីលោកត្រូវចំណាយពេលវេលា លុយកាក់លើការនិពន្ធ និងចែកចាយចំណេះដឹងនេះឡើងក្តី។ ក្នុងការតែងនិពន្ធ លោកមានគោលបំណង ១ និងគោលដៅ ២។ គោលបំណងរបស់លោក គឺដើម្បីបញ្ជ្រាបការអាននៅកម្ពុជា ក៏ដូចជាចូលរួមបណ្តុះធនធានមនុស្សក្នុងវិស័យអប់រំតាមដែលអាចធ្វើទៅបាន ជាពិសេស នៅតំបន់ដាច់ស្រយាល និងអ្នកខ្វះលទ្ធភាព។ ឯគោលបំណងសំខាន់មួយទៀត គឺលោកមានគោលដៅទៅលើមនុស្សសំខាន់២ក្រុម គឺក្រុមដែលមិនធ្លាប់ឣានសៀវភៅ ឬមិនចូលចិត្តអានសៀវភៅ និងក្រុមដែលកំពុងមានបំណងបោះបង់ការសិក្សា។
អ្នកនិពន្ធច្រើនណាស់ សរសេរសៀវភៅ គឺដើម្បីឱ្យអ្នកចូលចិត្តអាន ជ្រើសរើសការអានសៀវភៅ ដោយឡែកលោក ប៊ិន រ៉ាត់ បែរជាសរសេរសៀវភៅ សម្រាប់ឱ្យអ្នកមិនចូលចិត្តអាន ឬមិនធ្លាប់អានសៀវភៅ ងាកមកអានសៀវភៅវិញ។
លោកថា៖«នេះអាចសន្មតថា ជារឿងខុសគេមួយរបស់ខ្ញុំ។ ខ្ញុំដឹងថា បេសកកម្មនេះមិនងាយស្រួលពេកនោះទេ ប៉ុន្តែខ្ញុំបានធ្វើវា កំពុងធ្វើ និងបន្តធ្វើដោយក្ដីសង្ឃឹម។ ការណ៍ដែលចង់ឱ្យអ្នកមិនមានទម្លាប់អានសៀវភៅ ងាកមកអាន និងអ្នកដែលមានបំណងបោះបង់ការសិក្សា មកបន្តការសិក្សាវិញ មិនមែនជារឿងធ្វើត្រឹម ១ ថ្ងៃបានលទ្ធផល ឬងាយពេកនោះទេ»។
លោកប៊ិន រ៉ាត់ បន្តថា៖«ដូចនេះ ជាយុទ្ធសាស្ត្រ ដើម្បីឱ្យមនុស្សទាំង២ក្រុមខាងលើនេះងាកមកចាប់អារម្មណ៍សៀវភៅ ឬអានសៀវភៅ ខ្ញុំព្យាយាមរក្សាសាមញ្ញភាពនៃសៀវភៅទាំងអស់របស់ខ្ញុំ ទាំងអត្ថន័យ ខ្លឹមសារ និងក្របសៀវភៅ ជាពិសេស សៀវភៅទាំងអស់នោះទាក់ទងនឹងដំណើរជីវិតពិត ក្នុងការរស់នៅប្រចាំថ្ងៃរបស់មនុស្ស»។
មួយផ្នែកទៀត សៀវភៅទាំងគ្រប់ចំណងជើងរបស់លោកបានផ្ដល់ជូនដោយឥតគិតថ្លៃសម្រាប់អ្នកខ្វះលទ្ធភាព លើសពីនេះក៏មានការផ្ដល់ជូនតាមសាលា បណ្ណាល័យភូមិ និងមណ្ឌលនានាផងដែរ។ ជាការរួមចំណែកបន្ថែម ជារៀងរាល់រាត្រី ក្នុងហ្វេសប៊ុកផេចរបស់លោកផ្ទាល់(chhanrath Phumi-ភូមិ ឆាន់រ៉ាត់) ក៏មានការផ្សាយផ្ទាល់នាទីឆ្លើយសំណួរយកសៀវភៅទៀតផង។
គិតមកដល់ថ្ងៃទី ១៥ ខែមករា ឆ្នាំ ២០២៣ នាទីឆ្លើយសំណួរយកសៀវភៅ ដំណើរការផ្សាយបានចំនួន ២៥២ រាត្រីមកហើយ ជាមួយនឹងការផ្ដល់ជូនសៀវភៅ ពីគ្រប់គ្រឹះស្ថានបោះពុម្ពផ្សាយ ប្រហែលជាង ៦០០ ក្បាល និងសំណួរចំណេះដឹងទូទៅប្រហែលជាង ៤០០ សំណួរ ទៅអ្នកចូលរួមទាំងអស់។
សូមបញ្ជាក់ដែរថា នាទីឆ្លើយសំណួរយកសៀវភៅ មានមហិច្ឆតានៃកាផ្ដល់ជូនសៀវភៅចំនួន ១ ០០០ ក្បាល ដោយឥតគិតថ្លៃទៅសាធារណជនក្នុងរយៈពេល ៣៦៥ ថ្ងៃ។
ស្នាដៃសំខាន់ៗរបស់លោក ប៊ិន រ៉ាត់ មានដូចជា «អតីតកាលដ៏រីករាយ» ជាសៀវភៅទី១ ដែលរៀបរាប់អំពីជីវិតកុមារភាព(បឋមវ័យ) ជាដំណាក់កាលដំបូង និងជាគ្រាដ៏រីករាយបំផុតក្នុងដំណើរជីវិត។ សៀវភៅទី២ «រឿងជីវិត(ព្រលឹត)» ជាប្រលោមលោកដែលលើកយកបញ្ហា និងដំណោះស្រាយជីវិតជាក់ស្ដែងក្នុងការរស់នៅប្រចាំថ្ងៃ(មជ្ឈិមវ័យ) មកបរិយាយ និងបញ្ជាក់ថា នេះ ជារឿងជីវិត។ រីឯសៀភៅទី៣ «ថ្ងៃរសៀល» ជាសៀវភៅដែលរៀបរាប់អំពីបញ្ហាជីវិត ក្នុងបច្ឆិមវ័យ គឺវ័យចុងក្រោយជីវិត ឬឣ្នកដែលមានបញ្ហាសុខភាពជាប់ខ្លួនរ៉ាំរ៉ៃ។
ក្នុងបេសកកម្មដ៏មានតម្លៃរបស់លោក ប៊ិន រ៉ាត់ លោកបានឱ្យដឹងថា៖«សម្រាប់ខ្ញុំ ត្រឹមរយៈពេល ៥-១០ ឆ្នាំក្រោយ ប្រសិនបើមានមនុស្សណាម្នាក់ដើរមកជិតខ្ញុំ ហើយប្រាប់ខ្ញុំថា អរគុណបង ប្រសិនបើខ្ញុំមិនបានអានសៀវភៅរបស់បង ម្ល៉េះខ្ញុំឈប់រៀនបាត់ហើយ...»។
អ្នកនិពន្ធរូបនេះបន្តថា៖ «ឬក៏ អរគុណបង ប្រសិនបើ ខ្ញុំមិនបានអានសៀវភៅបង ម្ល៉េះខ្ញុំមិនចាប់ផ្ដើមអានសៀវភៅទេ...។ ប្រយោគទាំងអស់នេះជាក្ដីសុខរបស់ខ្ញុំ»។
លោកបានបន្តដោយស្នាមញញឹមថា និយាយឱ្យខ្លី បើសៀវភៅទាំងអស់របស់លោកណាមួយ អាចអូសទាញមនុស្ស២ក្រុមខាងលើមកកាន់សៀវភៅអានបាន ឬបន្តការសិក្សាបានវិញត្រឹម ១ នាក់ នោះគឺជាជោគជ័យដ៏ធំមួយ សម្រាប់កិច្ចការតែងនិពន្ធរបស់លោក។
លោក ប៊ិន រ៉ាត់ បានផ្ដល់ទស្សនៈផ្ទាល់ខ្លួនថា៖ «ការមិននឹកនា និងការព្រងើយកន្ដើយពីការអានសៀវភៅ ជាជម្រើសរបស់យើង។ ប៉ុន្តែការមិនស្វែងរកការអប់រំ ចំណេះដឹង ព័ត៌មាន និងបទពិសោធន៍ ដើម្បីអភិវឌ្ឍសមត្ថភាពខ្លួន ជារឿងគួរឱ្យស្ដាយក្នុងកំណើតជាមនុស្ស»៕
