ការឆែកនៅក្នុងកម្មវិធី «Nextspell App» តាមរយៈកុំព្យូទ័រដើម្បីជាជំនួយដល់អក្ខរាវិរុទ្ធជាភាសាខ្មែរកាលពីថ្ងៃទី១៩ កុម្ភៈ ។ ហុង មិនា
ភ្នំពេញ: ដោយសារតែមើលឃើញពីការលំបាកនៃការប្រើប្រាស់ភាសាបរទេសលើទូរស័ព្ទដៃទំនើប និងការប្រើប្រាស់ពុម្ពអក្សរប្រភេទ Limon លោក ដាញ់ ហុង បាននឹកឃើញបង្កើតប្រភេទពុម្ពអក្សរ ដែលហៅថាយូនីកូដក្នុងឆ្នាំ ២០០១ ដើម្បីផ្ដល់ភាពងាយស្រួលក្នុងការសរសេរអក្សរជាតិ។
ប៉ុន្មានឆ្នាំចុងក្រោយនេះដោយមើលឃើញថាការប្រើប្រាស់ភាសាជាតិប្រឈមនឹងបញ្ហាខុសឆ្គងលើអក្ខរាវិរុទ្ធ អតីតនិស្សិតផ្នែកច្បាប់រូបនេះបានបង្កើតកម្មវិធីទូរស័ព្ទ និងកុំព្យូទ័រថ្មីមួយដើម្បីសម្រួលដល់អ្នកមិនសូវប៉ិនប្រសប់ចំពោះសរសេរអក្សរខ្មែរនោះ គឺ «Nextspell App»។
«Nextspell App» ត្រូវបានអភិវឌ្ឍឡើងក្នុងឆ្នាំ ២០១៩ ដោយលោក ដាញ់ ហុង ដែលអភិវឌ្ឍកម្មវិធី OCR ឬ ការស្គេនរូបភាពជាអក្សរអត្រាអក្ខរាវិរុទ្ធត្រឹមត្រូវមានកម្រិតទាប។ ដូច្នេះ វាត្រូវការប្រព័ន្ធកែអក្ខរាវិរុទ្ធ ដែលខុសពីអក្សរអង់គ្លេស។
លោកហុងបានថ្លែងថា៖ «ការកែរបស់ភាសាអង់គ្លេសដែលសម្រាប់ដាក់ក្នុងកម្មវិធីធំៗ ដូចជា Ms. Words ដំណើរការដោយរូបមន្ដកែ។ ចំណែក «Nextspell App» ប្រើទិន្នន័យដើរដោយបច្ចេកវិទ្យាវៃឆ្លាត (AI) ស្វែងរកឃើញពាក្យខុសញឹកញាប់ដើម្បីរក្សាទុកក្នុងប្រព័ន្ធទិន្នន័យ និងធ្វើការកែសម្រួល»។
លោកបន្ដថា៖ «គោលដៅចម្បងនៃការបង្កើត «Nextspell App» គឺជាជំនួយការ ដែលហាក់ដូចជាមានមនុស្សម្នាក់ជួយកែអក្ខរាវិរុទ្ធ ដោយអ្នកវាយអក្សរមិនសូវខ្វល់ខ្វាយពីពាក្យត្រូវឬខុសនោះទេ ពីព្រោះប្រព័ន្ធ AI នឹងធ្វើការកែពាក្យជំនួស»។
យុវជនស្វ័យសិក្សាលើមុខវិជ្ជាព័ត៌មានវិទ្យារូបនេះ បានឱ្យដឹងថា ជាក់ស្ដែង អ្នកកាសែតសរសេរបណ្ដើរ មើលមេឃមើលផ្កាយបណ្ដើរ ហើយគ្រាន់តែចុចប៊ូតុងមួយ វាធ្វើការកែពាក្យខុសឱ្យទាំងអស់។ ចំពោះភាសាអង់គ្លេស ពេលសរសេរពាក្យខុស វានឹងបង្ហាញបន្ទាត់ក្រហមពីក្រោម។ ប៉ុន្ដែលោក ហុង អះអាងថា គោលដៅរបស់លោកគឺកែពាក្យខុសដោយស្វ័យប្រវត្ដិ។
ទោះជាយ៉ាងណា លោកទទួលស្គាល់ថា ប្រព័ន្ធកែស្វ័យប្រវត្ដិ និងការបង្ហាញពាក្យខុសជាបន្ទាត់ក្រហមគឺមានចំណុចខ្លាំង និងចំណុចខុសៗគ្នា។
លោកបានប្រាប់ថា៖ «ការបង្ហាញពាក្យខុសជាបន្ទាត់ក្រហម អ្នកវាយអក្សរអាចជ្រើសរើសពាក្យស្រដៀងគ្នាផ្សេងៗទៀត តែប្រព័ន្ធកែស្វ័យប្រវត្ដិ វាអាចកែតែពាក្យត្រូវបានកត់ត្រាក្នុងទិន្នន័យប៉ុណ្ណោះដោយចេញជាអក្សរពណ៌ខៀវ បើពាក្យពេចន៍ទាំងនោះមិនមានទេ វាក៏ជួយអត់បានដែរ ដោយគ្រាន់តែចេញពណ៌ក្រហម។ ដូច្នេះ វាអាស្រ័យលើការបញ្ចូលទិន្នន័យទាំងស្រុង។
លោក ហុង បានលើកឡើងជាឧទាហរណ៍ជាក់ស្ដែងថា មិនខុសពី Google Translate ទេ កាលពីពេលមុន ភាពសុក្រឹតរបស់វាតិចតួចណាស់ តែយូរៗទិន្នន័យដែលគេប្រមូលបានកាន់តែច្រើន អត្រាត្រឹមត្រូវក៏មានខ្ពស់ដែរ។ លោកថាដរាបណានៅមានទិន្នន័យបញ្ចូលជាប្រចាំកម្មវិធី «Nextspell App» នឹងកាន់តែមានសុក្រឹតភាពរហូតដល់រាប់រយឆ្នាំឯណោះ។
ថ្វីដ្បិតតែវាអាចត្រូវបានដាក់ឱ្យដំណើរការធ្វើបច្ចុប្បន្នភាពដោយស្វ័យប្រវត្ដិក្ដី ប៉ុន្ដែលោក ហុង បានជ្រើសរើសការប្រើប្រាស់មនុស្សជួយបន្ថែមក្នុងការពន្លឿនការបញ្ចូលទិន្នន័យ។
លោកបានពន្យល់ថា ព្យាង្គខ្មែរមានភាពស្មុគស្មាញច្រើន ដែលទាមទារការបញ្ចូលដោយធ្វើបច្ចុប្បន្នភាពជាប្រចាំ។ ចំពោះការសរសេរភាសាខ្មែរទៅតាមឈ្មោះបរទេស ដោយប្រើព្យាង្គចម្លែកៗ វាពិតជាមានការលំបាកខ្លាំង។
លោកហុង បានបន្ថែមថា៖ «យើងផ្អែកលើវចនានុក្រមសម្ដេចសង្ឃ ជូន ណាត។ ប៉ុន្ដែចំពោះពាក្យពេចន៍ថ្មីៗចុងក្រោយ យើងអត់មាននៅក្នុងវចនានុក្រម យើងឆែកមើលអត្រាអ្នកប្រើប្រាស់ខ្ពស់ភាគច្រើន ឬតាមវេបសាយធំៗ ដែលមានអ្នកត្រួតពិនិត្យហ្មត់ចត់លើអក្ខរាវិរុទ្ធជាគោល»។
ដោយមិនបានដឹងច្បាស់អំពីចំនួនអ្នកប្រើប្រាស់ពិតប្រាកដ បុរសខ្មែរកម្ពុជាក្រោមដែលមកតាំងលំនៅក្នុងប្រទេសកម្ពុជាក្នុងឆ្នាំ២០០០ រូបនេះ បានថ្លែងថា អ្នកដោនឡូតកម្មវិធីនេះមកប្រើប្រាស់នៅតែបន្ដប្រើជាប់ទៀងទាត់ និងកើនឡើងជាប្រចាំ។
ថ្វីដ្បិតតែកម្មវិធី «Nextspell App» ដាក់ឱ្យប្រើប្រាស់ឥតគិតថ្លៃដោយមានកំណត់ចំពោះការឆែកពាក្យម្ដងត្រឹម ២០០ពាក្យចុះក្រោម និងរហូតដល់ ៣ ០០០ពាក្យម្ដងសម្រាប់អ្នកបង់ប្រាក់ ១២ដុល្លារក្នុង១ឆ្នាំ បច្ចុប្បន្ននេះ លោក ហុង បានឱ្យដឹងថា លោកកំពុងផ្ដោតលើការបញ្ចូលទិន្នន័យជាច្រើន។
លោកបានបញ្ជាក់ថា៖ «តាមពិតទៅ យើងមានឱ្យគេប្រើឥតគិតថ្លៃច្រើន ដោយសារអ្នកស្គាល់ និងកន្លងមក មធ្យោបាយទូទាត់ប្រាក់នៅមានបញ្ហាស្មុគស្មាញ»។
ក្រៅពីកម្មវិធីលើប្រតិបត្ដិការ Android និងiOSរបស់ Apple កម្មវិធី Nextspell ក៏អាចប្រើនៅលើកុំព្យូទ័របានផងដែរដោយគ្រាន់តែវាយពាក្យhttps://nextspell.com (សម្រាប់ការប្រើប្រាស់ដោយឥតគិតថ្លៃ) នៅលើ Browser។
មុនដំបូងត្រូវចុះឈ្មោះ ដោយការបញ្ចូលលេខទូរស័ព្ទលេខសម្ងាត់ ៦ខ្ទង់ និងបន្ថែមអាសយដ្ឋាន។ អ្នកប្រើប្រាស់អាចកូពីអក្សរ ឬអត្ថបទពីកម្មវិធី Ms. Words រួចចម្លងទៅលើ Browser វេបសាយខាងលើរួចចុច «ពិនិត្យអក្ខរាវិរុទ្ធ» និង «ពិនិត្យ និងកែអក្ខរាវិរុទ្ធ (អាចចុចច្រើនដង) ក៏ដូចជា «សម្រេច»។
កំណត់សម្គាល់៖ អក្សរពណ៌ខៀវ មានន័យថាអ្នកត្រូវចុចពិនិត្យនិងកែអក្ខរាវិរុទ្ធម្ដងទៀត។ អក្សរពណ៌ក្រហមមានន័យថាមិនអាចកែឬមិនមានលទ្ធភាពកែនៅពេលនេះ។
លោក ហុង បានប្រាប់ ភ្នំពេញ ប៉ុស្ដិ៍ថា៖ «ការដំណើរការដោយការបញ្ចូនទិន្នន័យនូវព្យាង្គ ឬពាក្យថ្មីៗជាប្រចាំ កម្រិតនៃភាពត្រឹមត្រូវរបស់វាកាន់តែមានខ្ពស់។ជាក់ស្ដែង កម្មវិធីវៃឆ្លាតរបស់វាបានស្គាល់អក្សរសរសេរខុសញឹកញាប់ច្រើនជាងមុន។ យើងពិបាកវាស់ស្ទង់ពីកម្រិតភាគរយត្រឹមត្រូវណាស់ តែក្នុង ១ ថ្ងៃ វារកឃើញកំហុសនៃពាក្យសរសេរខុសបានច្រើនជាងមុន»។
គួររំឭកថា លោក ដាញ់ ហុង បានចាប់ផ្ដើមបង្កើតពុម្ពអក្សរយូនីកូដ (KhmerOS) ក្នុងឆ្នាំ ២០០១ និងអាចដាក់ឱ្យដំណើរការនៅលើកម្មវិធី Ms. Words ជាមួយប្រព័ន្ធប្រតិបត្ដិការ Window XP ក្នុងឆ្នាំ ២០០៣។
រហូតដល់អំឡុងឆ្នាំ ២០១០ ដល់ ២០១២ ពុម្ពអក្សរយូនីកូដ ត្រូវបានប្រើប្រាស់យ៉ាងទូលំទូលាយតាំងពីក្រុមហ៊ុនឯកជនរហូតដល់ស្ថាប័នរដ្ឋ ដោយមានក្រុមព័ត៌មាននានាបង្កើតពុម្ពអក្សរជាហូរហែ។ ប៉ុន្ដែលោកអះអាងថា លោកមិនបានចំណេញអ្វីពីការបង្កើតថ្មីៗនេះទេ ក្រៅពីទទួលបានប្រាក់ខ្លះពីក្រុមហ៊ុន Google និងប្រតិបត្ដិការ Android។
លោក ហុង បានឱ្យដឹងថា លោកបានបង្រៀនបុគ្គលិកមន្ដ្រីរាជការ និងឯកជន ចំពោះមេរៀននៃការបង្កើតពុម្ពអក្សរខ្មែរ រហូតដល់ជួយរដ្ឋាភិបាលឡាវនូវការបង្កើតពុម្ពអក្សរឡាវ។
លោកបន្ថែមថា៖ «អក្សរខ្មែរ ដែលមានស្រះ និងព្យាង្គតម្រួតស្មុគស្មាញច្រើនជាងភាសាអង់គ្លេស ត្រូវការសរសេរកូដបែបវៃឆ្លាត ពេលយើងវាយអក្សរ ស្រះ និងជើងតម្រួត ដោយវាលោតសម្រួលឱ្យសមសួនស្វ័យប្រវត្ដិ។ កន្លងមក ពុម្ពអក្សរ Limon វាមិនវៃឆ្លាត ពេលវាយវានៅត្រង់ណា វានៅត្រង់នោះរហូតហើយ ដោយមិនចេះកាសទៅតាមពាក្យនីមួយៗ»។
ការងារចម្បងរបស់លោក ហុង ជាខ្មែរកម្ពុជាក្រោម ផ្ដោតលើការសរសេរប្រូក្រាមនៅ www.khmerwriters.com (Khmer Spellchecker online) និងចំណាយពេលវេលាលើការអភិវឌ្ឍពុម្ពអក្សរ និងពុម្ពអក្សរសម្រាប់កុមារ៕
