ភ្នំពេញ: ក្រុម​ផលិតករ​ភាពយន្ដ​ល្បីៗ​នៅ​តំបន់ទន្លេ​មេគង្គ​​បាន​ចង​ក្រង​​បង្កើត​ជា​គំនិត​ផ្ដួចផ្ដើម​ «Write and Eat» ក្នុង​ការ​ផ្ដល់​ការ​បណ្ដុះ​បណ្ដាល​ផ្នែក​ផលិត​ភាពយន្ដគាំទ្រ​​អ្នកនិពន្ធ​​ជំនាន់​​ក្រោយ ​ដើម្បី​ជួយ​ផ្សព្វផ្សាយ និង​អភិរក្ស​វប្បធម៌​​ដ៏​ពិសេស​របស់​តំបន់នេះ​ តាម​រយៈ​ការ​​លើក​ស្ទួយ​​ភាព​យន្ត​​ក្នុង​ស្រុក​ឱ្យកាន់​តែ​​ល្អ​ប្រសើរ។


ផលិតករដែល​មក​ពី​ប្រទេស​កម្ពុជា វៀតណាម ឡាវ ក៏ដូចជាសិង្ហបុរី​ បាន​​អំពាវ​នាវ​ឱ្យ​ក្រុមហ៊ុន​ក្នុង​ស្រុក​ទាំង​អស់​ចូល​ រួម​ឧបត្ថម្ភ​​កម្មវិធី​ដែល​ទទួល​បាន​ការ​គាំទ្រ​ពី​នាយក​ដ្ឋាន​ភាពយន្ត​​ នៃ​ក្រសួង​វប្បធម៌ និង​វិចិត្រ​សិល្បៈ​នៃ​ព្រះ​រាជា​ណា​ចក្រ​កម្ពុជា។


​គំនិតផ្តួចផ្តើម «Write and Eat» កើត​ចេញ​ពី​​កិច្ច​ខិត​ខំ​ប្រឹង​ប្រែង​រួមគ្នា​រវាង​ផលិតករ​​លោក​សុខ វិសាល ​ស្ថាបនិក​​ផលិតកម្ម​802 Films ​នៅ​កម្ពុជា លោក Xaisongkham INDUANGCHANTHY មក​ពី​ប្រទេសឡាវ កញ្ញា Epsin HOAN មក​ពី​ប្រទេស​​វៀតណាម និង​លោក​ Andy HO មកពី​​​​​​សិង្ហបុរី ដើម្បី​រៀបចំ​​​​សិក្ខាសាលារយៈ​ពេល ១​ ឆ្នាំ និង​វគ្គ​បណ្តុះបណ្តាល​បង្កើត​បណ្តាញ​ដែល​រៀបចំ​ឡើង​ដើម្បី​លើក​កម្ពស់​​ស្តង់ដា​​ក្នុង​តំបន់និង​ការ​និពន្ធ​​​​​​ក្នុង​ស្រុក។


លោកសុខ វិសាល ​ស្ថាបនិក​ផលិតកម្ម802 Films បាន​​ឱ្យ​ដឹង​​ថា៖ «ប្រទេស​កម្ពុជា និង​បណ្តាប្រទេស​ក្នុង​តំបន់​ទន្លេ​មេគង្គ​មាន​​ចក្ខុវិស័យពិសេសនៅ​ពេល​និយាយ​អំពីភាពយន្ត។ សិក្ខា​សាលា​ជាស៊េរី​រយៈពេល​១​ឆ្នាំនេះ​នឹង​គាំទ្រ​​ផលិតករ​ភាព​យន្ត និង​អ្នក​និពន្ធ​​ជំនាន់​ក្រោយក្នុង​តំបន់ ជា​មួយ​នឹង​សិក្ខាសាលាជា​ស៊េរីនិង​ឱកាស​បង្កើត​បណ្តាញ»។


ដោយ​សា​រតែលោក​វិសាល ​មើល​ឃើញ​ថា ​វិស័យ​សិល្បៈភាពយន្ដ​នៅ​អាស៊ី​អាគ្នេយ៍​ភាគ​ច្រើនមិន​សូវ​រក​ប្រាក់​ចំណូល​សិក្ខាសាលា​​​​ «Write and Eat» ត្រូវបាន​បង្កើត​ឡើង​ដើម្បី​ពង្រឹង​ជំនាញ​មួយ​នេះ​ ជា​ទុន​ឱ្យ​អ្នក​បម្រើ​ការ​ក្នុង​វិស័យ​ភាពយន្ដ​អាច​រក​ចំណូល​បាន​។ ​


​​គំនិត​ផ្តួចផ្តើម «Write and Eat» កំពុង​​ស្វែងរក​សិក្ខាកាម​​​​ចំនួន ១៥ នាក់​ដែល​មាន​អាយុ​ចន្លោះ​ពី ២២ ទៅ ៣៥ ​ឆ្នាំមក​​ពី​ប្រទេស​កម្ពុជា ​វៀត​ណាម​ និង​ឡាវ​ដើម្បី​ចូលរួម​ក្នុង​កម្មវិធី​អប់រំ​ថ្នាក់​តំបន់​​នេះ។

លោក​ វិសាល បា​នប្រាប់​ភ្នំពេញ​ប៉ុស្ដិ៍​ថា​៖ «​តា​មពិត​ទៅសិក្ខាកាម​មិន​តម្រូវ​ឱ្យ​បង់​ប្រាក់​នោះទេ​ ដោយ​យើង​អំពាវនាវ​ឱ្យ​ក្រុមហ៊ុន​នានា​ចូលរួម​ជួយ​ឧបត្ថម្ភ​។ ប៉ុន្ដែ​សិក្ខាកាម​ដែល​ជា​យុវជន​មក​ពី​ ៣ ប្រទេស​នេះតម្រូវ​ឱ្យ​កក់​ប្រាក់​ ១០០ ដុល្លារ​មុន​ពេល​ចូល​រៀន​វគ្គ​នីមួយៗ ក្នុង​ចំណោម ៦​ វគ្គ​»។

លោក​បាន​បន្ដថា​៖ «​ការ​កក់​ប្រាក់​នេះគឺ​ចង់​ឱ្យ​សិក្ខាកាម​យកចិត្ដ​ទុក​ដាក់​រៀន​ឱ្យ​ចប់​ចុង​ចប់​ដើម​ ដោយ​មិន​បោះបង់​ចោល​ការ​សិក្សា​ពាក់​កណ្ដាល​ទី​។ គ្រូ​បង្គោល​ទាំង​អស់​បាន​ចំណាយ​ពេល​វេលានិង​កម្លាំង​កាយ​ចិត្ដ​ជា​ច្រើន​ដើម្បី​បណ្ដុះបណ្ដាល​ពួកគេ​។ ដូច្នេះយើង​មិន​ចឹង​ឱ្យ​ខាត​កម្លាំង​អាសា​បង់​នោះទេ​»។

ចំពោះ​កូតា​សិក្ខា​កាម​សម្រាប់​ប្រទេស​នីមួយៗ គឺកម្ពុជា ៥ នាក់ ឡាវ ៥ នាក់ និង​វៀតណាម​ ៥នាក់​។ នេះ​បើ​យោង​តាម​លោក​វិសាល​ ម្ចាស់​ផលិត​កម្ម 802 Films។

អ្នក​ស្រីNg Swee Sanអ្នក​និពន្ធ​​ជនជាតិ​សិង្ហបុរី​និង​​ជាគ្រូ​បង្រៀន​ផ្នែក​និពន្ធ​ បញ្ចប់​ថ្នាក់​បរិញ្ញាបត្រ​ជាន់​ខ្ពស់​​ផ្នែក​សិល្បៈ​ពី​មហា​វិទ្យាល័យ​សិល្បៈ Lasalleក្នុង​ប្រទេស​សិង្ហបុរីនិងក៏​​ជា​អតីត​​ប្រធានសមាគម​អ្នក​និពន្ធ (សិង្ហបុរី) ផងដែរ​នោះ នឹង​ធ្វើ​ជា​គ្រូ​បង្គោល​ម្នាក់​​ក្នុង​ចំណោម​គ្រូបង្គោលផ្សេងទៀត​សម្រាប់​វគ្គ​បណ្តុះ​បណ្តាល​ផ្លូវការ​នេះ​។

វគ្គ​បណ្តុះបណ្តាល​នេះ​​រួម​មាន​សិក្ខាសាលា​​​បង្រៀន​អំពី​​ការ​និទាន​រឿងការ​បង្កើត​​តួអង្គការសរសេរ​កិច្ច​សន្ទនាការ​បង្កើត​រចនា​សម្ព័ន្ធ​រឿងនិង​សមាស​ធាតុ​ផ្សេង​ទៀត​ដែល​ចាំបាច់​សម្រាប់ការ​និពន្ធ​សាច់​រឿង។

លោកវិសាល បាន​បន្ថែមថា៖ «យើង​កំពុង​ស្វែង​រក​អ្នក​​មក​ពី​តំបន់​នេះដែល​មាន​ចំណង់​ចំណូលចិត្ត​​ផលិត​​ភាព​យន្ដនិង​អ្នក​ដែល​ចង់​​ជួយ​អភិវឌ្ឍ​ឧស្សាហកម្ម​ភាពយន្ត​នៅ​ក្នុង​តំបន់។ ជា​ការពិត​ណាស់ ក្នុង​នាម​ជា​តួអង្គ​ដ៏​សំខាន់​មួយយើង​រំពឹង​ថា វប្បធម៌​ដ៏​រឹងមាំ​និង​គំនិត​ច្នៃ​ប្រឌិត​របស់​កម្ពុជា​នឹងដើរ​តួយ៉ាង​សំខាន់​នៅ​ក្នុង​គំនិត​ផ្តួចផ្តើម​នេះ»។

ក្នុង​​នា​ម​ជា​​ស្ថាបនិក១​​រូប​​នៃ​គំនិត​ផ្តួច​ផ្តើម«Write and Eat»លោកសុខវិសាលដែល​នាយក​ផ្នែក​សិល្បៈ​និង​ច្នៃប្រឌិត ជា​ផលិតករ​តន្ត្រីនិង​ជា​ស្ថាបនិក​នៃផលិតកម្មKlapYaHandzបាន​​ប្ដេជ្ញា​ចិត្ត​​​​​លើក​​កម្ពស់​​​វិស័យ​​ភាពយន្ត​​កម្ពុជា។

​​ស្ថាបនិក​​ផលិតកម្ម​ 802 Films ​​រូប​នេះបាន​​​សាង​កេរ្ដិ៍​ឈ្មោះ​ក្នុង​​​ខ្សែភាពយន្ត​ចំនួន ៥​រឿង​នា​​រយៈ​ពេល ១០​ឆ្នាំ​កន្លង​មក​នេះហើយ​​លោកបាន​​រៀបចំ​​ព្រឹត្តិការណ៍​​កម្សាន្ត​​ធំៗ​និង​​​គាំទ្រ​​ផលិតកម្ម​​ភាពយន្ត​អន្តរជាតិ​​​ជា​​ច្រើន​ទៀត​។

សម្រាប់ព័ត៌មាន​លម្អិត​អំពី​វគ្គ​បណ្ដុះ​បណ្ដាល​សិក្ខាកាម​ក្នុង​វិស័យ​ភាពយន្ដ​វ័យ​ក្មេង និងការ​ឧបត្ថម្ភ​ បំណង​លើក​ស្ទួយ​សិល្បៈ​ភាពយន្ដ​ទាំង​នៅ​តំបន់​ទន្លេ​មេគង្គជា​ពិសេសសិល្បៈ​នៅ​កម្ពុជា​ ចំពោះ​​​​​​គំនិត​ផ្តួច​ផ្តើមWrite and Eat នេះ​​ទាក់​ទង​មក​​​កាន់​អាសយ​ដ្ឋានអ៊ីមែល​info@writeandeat.com៕