កម្មវិធីម៉ូបាលអេប «ដើរលេងស្រុកយើង» នៅក្នុង Playstore។ រូបថត សហការី
ភ្នំពេញៈ ក្រសួងបរិស្ថានប្រកាសដាក់ឱ្យប្រើប្រាស់ជាផ្លូវការនូវកម្មវិធីទូរស័ព្ទ «ដើរលេងស្រុកយើង» ដើម្បីគាំទ្រដល់ជីវភាពសហគមន៍ និងជំរុញឱ្យការផ្សព្វផ្សាយពីគោលដៅអេកូទេសចរណ៍កាន់តែទូលំទូលាយទៅដល់អ្នកទេសចរក្នុងការស្វែងរកព័ត៌មានច្បាស់លាស់អំពីគោលដៅអេកូទេសចរណ៍។
ការដាក់ឱ្យដំណើរការកម្មវិធីទូរស័ព្ទ «ដើរលេងស្រុកយើង» បានធ្វើឡើងនៅទីស្ដីការក្រសួងបរិស្ថាន កាលពីរសៀលថ្ងៃទី ១៥ ខែសីហា ដោយមានការចូលរួមពីថ្នាក់ដឹកនាំ មន្ត្រីរាជការក្រសួងបរិស្ថាន តំណាងធនាគារពិភពលោក, អង្គការជាតិ-អន្តរជាតិ និងដៃគូអភិវឌ្ឍន៍ ជាច្រើនរូបទៀតផងដែរ។
យោងតាមក្រសួងបរិស្ថានបានលើកឡើងថា កម្មវិធីទូរស័ព្ទ«ដើរលេងស្រុកយើង»ជាផ្នែកមួយនៃគម្រោង«និរន្តរភាពតំបន់ទេសភាព និងទេសចរណ៍ធម្មជាតិកម្ពុជា» បង្កើតឡើងដើម្បីគាំទ្រនិងជំរុញឱ្យការផ្សព្វផ្សាយពីគោលដៅអេកូទេសចរណ៍បានកាន់តែទូលំទូលាយនិងបង្កើនភាពងាយស្រួលដល់អ្នកទេសចរក្នុងការស្វែងរកព័ត៌មានច្បាស់លាស់ពីគោលដៅអេកូទេសចរណ៍ និងសម្រួលដល់ការធ្វើដំណើរកម្សាន្តជាមួយនឹងមុខងារសំខាន់ៗ។
មុខងារកម្មវិធីនោះ មានដូចជា ផែនទីនាំផ្លូវ ការរៀបចំផែនការធ្វើដំណើរ និងការចែករំលែកព័ត៌មានអំពីតំបន់ទេសភាពតាមរយៈរូបថត និងសារខ្លីៗ។
ក្រសួងបានបន្តថា កម្មវិធីទូរស័ព្ទនេះក៏ជាការឆ្លើយតបមួយទៅនឹងគោលនយោបាយអភិវឌ្ឍន៍អេកូទេសចរណ៍ ក្រោមពាក្យស្លោក«ទេសចរណ៍ផ្សារភ្ជាប់ទឹកដី»ដែលនឹងជំរុញឱ្យជីវភាពរបស់ប្រជាពលរដ្ឋនៅតាមតំបន់ការពារធម្មជាតិមានភាពប្រសើរឡើងជាលំដាប់តាមរយៈចំណូលពីភ្ញៀវទេសចរដែលមកទស្សនាកម្សាន្ត រួមចំណែកពង្រឹងជីវភាពសហគមន៍ ដូចជាឱកាសសម្រាប់អភិវឌ្ឍទេសចរណ៍ធម្មជាតិ ហើយរួមចំណែកកាត់បន្ថយសកម្មភាពទាំងឡាយណាដែលធ្វើឱ្យប៉ះពាល់ដល់ធនធានធម្មជាតិ។
លោកសាយ សំអាល់ រដ្ឋមន្ត្រីក្រសួងបរិស្ថានបានថ្លែងក្នុងពិធីនោះដោយលោកបានកោតសរសើរ និងវាយតម្លៃខ្ពស់ចំពោះក្រុមការងារនិងបានថ្លែងអំណរគុណដល់អង្គការដៃគូដែលបានចូលរួមយ៉ាងសកម្មបង្កើតបានជាកម្មវិធីទូរស័ព្ទ «ដើរលេងស្រុកយើង»។
លោកបានបន្តថាមិនត្រឹមតែជាសមិទ្ធផលមួយទេ ប៉ុន្តែកម្មវិធីនេះបង្ហាញឱ្យឃើញថាជីវភាពរបស់ប្រជាជនកម្ពុជាបានងាកទៅរកភាពសុខដុមរមនា និងសុភមង្គល ព្រមទាំងមានឱកាសពេញលេញក្នុងការធ្វើដំណើរកម្សាន្តជាមួយក្រុមគ្រួសារ មិត្តភក្តិនៅគ្រប់ទីកន្លែង។
លោកសាយ សំអាល់ បានបញ្ជាក់ថា៖«កម្មវិធីទូរស័ព្ទនេះ ជាការបញ្ជាក់មួយទៀតពីរបត់ថ្មីរបស់សង្គមកម្ពុជា ងាករកទំនើបកម្ម បច្ចេកវិទ្យា ស៊ីវិល័យ ស្រឡាញ់គ្រួសារ សង្គម ផ្សារភ្ជាប់នឹងបរិស្ថានផងដែរ»។
រដ្ឋមន្ត្រីក្រសួងបរិស្ថានបានបន្តថា កម្ពុជាផ្លាស់ប្តូរពីសង្គមជាតិមួយដែលធ្លាប់បែកបាក់ដោយសារសង្គ្រាមមកជាសង្គមជាតិមួយដែលមានជីវភាពល្អប្រសើរ សង្គមរស់រវើក ប្រជាជនមានចំណេះដឹងទូលំទូលាយ ចេះចែករំលែកក្តីសុខ និងសុភមង្គលតាមរយៈ លម្ហែជាមួយនឹងធម្មជាតិ។
លោកសាយ សំអាល់ បានបន្ថែមថា ទាំងនេះជាផ្លែផ្កានៃសុខសន្តិភាពដែលកម្ពុជាកំពុងទទួលបាន ហើយវប្បធម៌នៃសន្តិភាព ក៏បានចាក់ឫសយ៉ាងមាំក្នុងក្រអៅបេះដូងប្រជាជនខ្មែរគ្រប់រូបផងដែរ។
ទាក់ទងនឹងកម្មវិធីនេះលោក ហូ វណ្ណឌី ទីប្រឹក្សាសមាគមទេសចរណ៍កម្ពុជាបានថ្លែងនៅថ្ងៃទី១៥ ខែសីហាថា វាជាការល្អមែនទែន ព្រោះកន្លងមកកម្មវិធីនេះក្រសួងបានរៀបចំត្រៀមជាយូរមកហើយ ដូច្នេះការប្រកាសឱ្យប្រើប្រាស់ជាផ្លូវការនេះ វាបានរួមចំណែកយ៉ាងធំធេងសម្រាប់អ្នកទេសចរ និងសហគមន៍នៅក្នុងមូលដ្ឋាន។
លោកបានប្រាប់ដែរថា ក្រៅពីនេះទៀត កម្មវិធីទូរស័ព្ទនេះក៏បានចូលរួមចំណែកក្នុងការជួយផ្សព្វផ្សាយ និងពង្រីកសក្ដានុពលផ្នែកទេសចរណ៍ធម្មជាតិទៅដល់អ្នកវ័យជំទង់ព្រោះពួកគាត់មានថវិកាគ្រប់គ្រាន់សម្រាប់ដំណើរកម្សាន្តនៅតំបន់នានាៗ។
លោកហូ វណ្ណឌី បានបញ្ជាក់ថា៖ «ដូច្នេះប្រសិនបើក្រសួងបានដាក់ឱ្យប្រើប្រាស់កម្មវិធីហ្នឹង មិនត្រឹមតែជាគោលដៅក្នុងតំបន់មួយនោះទេ ក៏ប៉ុន្តែជាគោលដៅឆ្លើយតបទូទាំងប្រទេសតែម្ដង ព្រោះវាផ្ដល់ភាពងាយស្រួលដល់អ្នកទេសចរស្វែងរកព័ត៌មានការធ្វើដំណើរកម្សាន្តរបស់ខ្លួនពីកន្លែង១ទៅកន្លែង១»។
លោកបន្ថែមថា កម្មវិធីទូរស័ព្ទនេះក៏ជំរុញឱ្យមានកំណើនទេសចរដោយស្វ័យប្រវត្តិផងដែរទៅដល់ចង្វាក់សេវាកម្មផ្សេងៗដែលអ្នកផ្គត់ផ្គង់បានត្រៀមរៀបចំសម្រាប់បម្រើដល់វិស័យទេសចរណ៍៕
