មហាជនទស្សនាស្នាដៃសិល្បៈក្នុងកម្មវិធីមហោស្រពអក្សរសិល្ប៍ខ្មែរ ឆ្នាំ២០១៩ នៅបណ្ណាល័យជាតិ។ រូបថត សហការី
ភ្នំពេញ: មហោស្រពអក្សរសិល្ប៍ខ្មែរនឹងត្រឡប់មកវិញជាលើកទី៦ ដែលជាការបន្តបេសកកម្មរបស់ខ្លួន ដើម្បីអបអរសាទរសិល្បៈអក្សរសិល្ប៍កម្ពុជា។
ប្រធានបទនៅឆ្នាំនេះគឺ «សំឡេងចម្រុះពណ៌» បំភ្លឺលើការនិទានរឿងដែលគេមើលរំលងជាញឹកញាប់នៅក្នុងអក្សរសិល្ប៍កម្ពុជា។ វាអាចជាសំឡេងធម្មជាតិមនុស្សសត្វឬអ្វីផ្សេងទៀតដែលកើតចេញពីការស្រមើស្រមៃរបស់អ្នកឬក៏ជាសំឡេងរបស់អ្នកផ្ទាល់ដែលមិនធ្លាប់បានបន្លឺឬក៏បន្លឺហើយតែពុំមានអ្នកឮ ឬក៏យកចិត្តទុកដាក់ស្តាប់។ឥឡូវនេះជាឱកាសសម្រាប់អ្នកហើយក្នុងការបន្លឺសំឡេងនោះ។
មហោស្រពដែលត្រូវបានបង្កើតតាំងពីចាប់ផ្តើមក្នុងឆ្នាំ ២០១៧ នឹងប្រព្រឹត្តទៅចាប់ពីថ្ងៃទី ២០ ដល់ថ្ងៃទី ២២ ខែតុលា ឆ្នាំ ២០២៣ នៅមុខសាលាខេត្តកោះកុង។
មហោស្រពអក្សរសិល្ប៍ខ្មែរដែលមានចក្ខុវិស័យក្នុងការលើកកម្ពស់និងផ្សព្វផ្សាយអំពីអក្សរសិល្ប៍ខ្មែរ មានគោលបំណងសំខាន់ចំនួន ៣ គឺបណ្តុះស្មារតីស្រឡាញ់អក្សរសិល្ប៍ជាតិលើកកម្ពស់កិត្តិយសនិងគុណតម្លៃរបស់អ្នកនិពន្ធក៏ដូចជាបង្កើនឱកាសទំនាក់ទំនងនិងពង្រីកវិសាលភាពទីផ្សារដល់អ្នកនិពន្ធនិងវិស័យបោះពុម្ព និងអក្សរសិល្ប៍។
លោកស្រី ហួត សុជាតា ស្ថាបនិក និងជាសមាជិកក្រុមប្រឹក្សានៃមហោស្រពអក្សរសិល្ប៍ខ្មែរបានសម្តែងមោទនភាពក្នុងការរួមចំណែកដល់វិស័យអក្សរសាស្ត្រកម្ពុជា។
លោកស្រី សុជាតា ដែលស្រឡាញ់ការអភិវឌ្ឍប្រកបដោយនិរន្តរភាពនិងលើកកម្ពស់ជីវភាពរស់នៅបានឱ្យដឹងថា៖ «ខ្ញុំមានមោទនភាពដែលជាតំណក់ទឹក ១ តំណក់ជួយបំពេញអាងនៃវិស័យអក្សរសិល្ប៍នៅកម្ពុជា»។
លោកឥន្ទសម៉ាណាក់ប្រធានកម្មវិធីដែលបានចូលរួមរៀបចំមហោស្រពសម្រាប់ឆ្នាំទី២ បានសង្កត់ធ្ងន់លើបទពិសោធន៍មហោស្រពមានការផ្លាស់ប្ដូរពី ១ ឆ្នាំ ទៅ ១ ឆ្នាំ។
លោកបានថ្លែងថា៖ «ខ្ញុំបន្តចូលរួមដោយសារខ្ញុំនឹកអនុស្សាវរីយ៌កាលពីឆ្នាំមុនដែលឃើញអ្នកនិពន្ធកវីអ្នកស្រឡាញ់អក្សរសិល្ប៍គ្រូ និងសិស្សនិស្សិតបានចូលរួមយ៉ាងច្រើននិងទទួលបានបទពិសោធន៍ល្អៗពីកម្មវិធី។ ដូច្នេះសូមនិមន្ត និងអញ្ជើញចូលរួមឱ្យបានច្រើនកុះករ ដើម្បីទទួលបានបទពិសោធន៍ចំណេះដឹង និងបង្ហាញពីការគាំទ្រដល់ផ្នែកអក្សរសិល្ប៍»។
មហោស្រពនេះមានកិត្តិយសដែលមានលោក ម៉ុង ម៉ានិត អ្នកនិពន្ធតារាចម្រៀង និងជាអ្នកនិពន្ធបទចម្រៀងល្បី ១ រូប ជាឯកអគ្គរដ្ឋទូតសុច្ឆន្ទៈមហោស្រពអក្សរសិល្ប៍ខ្មែរសម្រាប់ឆ្នាំ ២០២៣។
លោក ម៉ានិត បានសម្តែងភាពសប្បាយរីករាយក្នុងការចូលរួមពិធីបុណ្យ និងការប្តេជ្ញាចិត្តក្នុងការលើកកម្ពស់សិល្បៈអក្សរសិល្ប៍ និងអក្ខរកម្ម។
លោកបានថ្លែងថា៖ «ខ្ញុំបាទរីករាយណាស់ដែលបានចូលរួមចំណែកជាផ្នែកមួយនៃមហោស្រពនៅឆ្នាំនេះ។ ការចូលរួមនេះនឹងជួយជំរុញការផ្សព្វផ្សាយអំពីមហោស្រពឱ្យសាធារណជនបានជ្រាបក៏ដូចជាអភិវឌ្ឍវិស័យអក្សរសិល្ប៍វិស័យអំណានជំរុញ និងបង្កើនស្នាដៃនិពន្ធព្រមទាំងផ្សារភ្ជាប់យ៉ាងជិតស្និទ្ធជាមួយអ្នកអាន និងប្រជាជនកម្ពុជាឱ្យយល់ច្បាស់ពីសក្ដានុពលនៃអក្សរសិល្ប៍ខ្មែរ»។
មហោស្រពអក្សរសិល្ប៍ខ្មែរលើកទី៦ នេះមានរយៈពេល ៣ ថ្ងៃ ដែលមានកម្មវិធីពិសេសៗជាច្រើនដូចជាពិព័រណ៍មរតកអក្សរសិល្ប៍វេទិកាពិភាក្សាអំពីអក្សរសិល្ប៍នៃខេត្តកោះកុង សិក្ខាសាលានិពន្ធច្នៃប្រឌិតទស្សនកិច្ចវប្បធម៌វេទិកាពិភាក្សា និងបទបង្ហាញអំពីវប្បធម៌អក្សរសិល្ប៍នៃខេត្តកោះកុង កម្មវិធីកំណាព្យបញ្ចាំងភាពយន្តឯកសារកម្មវិធីប្រកួតប្រជែងស្នាដៃអក្សរសិល្ប៍ និងកម្មវិធីទស្សនីយភាព ល្ខោននិយាយ «ឃុនឆាងឃុនផែន» របាំចម្រៀង និងចាប៉ីដងវែងផងដែរ។
មហោស្រពអក្សរសិល្ប៍ខ្មែរផ្តួចផ្តើមគំនិតដោយអ្នកនិពន្ធ សូ ភីណា ក្នុងឆ្នាំ ២០១៧ មានគោលបំណងលើកកម្ពស់អក្សរសិល្ប៍ខ្មែរ និងកិត្តិយសអ្នកនិពន្ធខ្មែរ។ វាក៏ស្វែងរកការជំរុញទំនាក់ទំនងនៅក្នុងឧស្សាហកម្មផងដែរ។
គួរបញ្ជាក់ថា មហោស្រពអក្សរសិល្ប៍ខ្មែរលើកទី៥ ឆ្នាំ ២០២២ រៀបចំឡើងនៅខេត្តពោធិ៍សាត់ចាប់ពីថ្ងៃទី ២១ ដល់ថ្ងៃទី ២៣ ខែតុលា ដោយផ្តោតសំខាន់លើការបណ្តុះចិត្ដស្រឡាញ់អក្សរសិល្ប៍ក្នុងស្រុកផ្ដល់កិត្តិយសដល់អ្នកនិពន្ធខ្មែរ និងជួយសម្រួលបណ្តាញរវាងអ្នកនិពន្ធអ្នកអាន និងអ្នកបោះពុម្ពផ្សាយ។
ព្រឹត្តិការណ៍នេះបង្ហាញពីសារៈសំខាន់នៃអក្សរសិល្ប៍ក្នុងការអភិវឌ្ឍប្រទេស និងមានគោលបំណងទាក់ទាញយុវជនឱ្យចូលសិល្បៈ និងវប្បធម៌តាមរយៈការរៀបចំមហោស្រពនៅក្នុងខេត្តមួយនៃប្រទេសកម្ពុជា។
មហោស្រពនេះ រួមមានការសម្ដែង ការតាំងពិព័រណ៌រូបភាពពីប្រលោមលោកខ្មែរមុនឆ្នាំ ១៩៧៥ ការលក់សៀវភៅ និងសិក្ខាសាលាដែលមានទាំងអ្នកនិពន្ធជើងចាស់ និងអ្នកនិពន្ធថ្មី។
ដើម្បីស្វែងយល់កាន់តែច្បាស់អំពីការប្រព្រឹត្តទៅកម្មវិធីមហោស្រព ភ្ញៀវទាំងអស់ចូលរួមកម្មវិធីសន្និសីទសារព័ត៌មាននាថ្ងៃទី ៣០ ខែកញ្ញា ឆ្នាំ ២០២៣ ម៉ោង ៤:០០ រសៀល នៅមជ្ឈមណ្ឌលធនធានសោតទស្សន៍បុប្ផាណា។ ចុះឈ្មោះជាមុនតាមរយៈតំណភ្ជាប់ lynakourn77@gmail.com។
មហោស្រពអក្សរសិល្ប៍បានទទួលការគាំទ្រពីសហគមន៍អ្នកនិពន្ធសមាគមអក្សរសិល្ប៍នានាក្រសួងវប្បធម៌ និងវិចិត្រសិល្បៈ និងសប្បុរសជនជាច្រើននាក់ទៀត៕
