សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាអម្ចាស់ ស្តេចសព្វព្រះរាជហឫទ័យព្រះរាជទានសៀវភៅ ១០ ក្បាល ដ៏មានសារៈសំខាន់បំផុតជាប្រវត្តិសាស្ត្រ ជូនដល់សារព័ត៌មានភ្នំពេញប៉ុស្ដិ៍ កាលពីថ្ងៃទី ១១ ខែមករា ឆ្នាំ២០២៤។ ហុង មិនា
តាមរយៈព្រះរាជខុទ្ទកាល័យ សម្តេចព្រះមហាក្សត្រី នរោត្តម មុនិនាថ សីហនុ នៃកម្ពុជា កាលពីថ្ងៃទី ១១ ខែមករា ឆ្នាំ២០២៤ ព្រះវររាជមាតាជាតិខ្មែរ ជាអម្ចាស់ ស្តេចសព្វព្រះរាជហឫទ័យព្រះរាជទានសៀវភៅ ១០ ក្បាល ដ៏មានសារៈសំខាន់បំផុតជាប្រវត្តិសាស្ត្រ ជូនដល់សារព័ត៌មានភ្នំពេញប៉ុស្ដិ៍។
ព្រះរាជកាយវិការដ៏ថ្លៃថ្លានេះមិនត្រឹមតែបញ្ជាក់ពីព្រះរាជកិច្ចដើម្បីប្រទេសជាតិរបស់ព្រះមាតាជាតិខ្មែរប៉ុណ្ណោះទេ ប៉ុន្តែថែមទាំងផ្តល់ជាប្រភពចំណេះដឹងដល់កូនចៅដែលមិនអាចកាត់ថ្លៃបានចំពោះព្រះរាជតួនាទីសំខាន់របស់រាជវង្សក្នុងសម័យទំនើបនេះផងដែរ។
ហុង មិនា
«សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្លូរ និងសុភមង្គល៖ ព្រះរាជដំណើរជីវិតពោរពេញទៅដោយព្រឹត្ដិការណ៍»-ព្រះរាជជីវប្រវត្តិ ៨០ ព្រះវស្សា
សៀវភៅ ១ គូ ដំបូង ដែលមានចំណងជើងថា «សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្លូរ និងសុភមង្គល៖ ព្រះរាជដំណើរជីវិតពោរពេញទៅដោយព្រឹត្ដិការណ៍»ចងក្រងដោយឯកអគ្គរដ្ឋទូត Julio A. Jeldres, PhD គឺជាស្នាដៃជីវប្រវត្តិដែលមានទាំងភាសាអង់គ្លេស ចំនួន ៧៦ ទំព័រ និងភាសាខ្មែរ ៨០ ទំព័រ។ សៀវភៅ២ ភាសានេះ ត្រូវបានបោះពុម្ពឡើងសម្រាប់ទស្សនិកជនកាន់តែទូលំទូលាយដើម្បីស្វែងយល់ពីព័ត៌មានលម្អិតចំពោះព្រះរាជដំណើរជីវិតរបស់ព្រះអង្គ។
សៀវភៅនេះ គឺមិនមែនជាការរៀបរាប់តែព្រះជីវប្រវត្តិរបស់សម្ដេចព្រះមហាក្សត្រី នរោត្តម មុនិនាថសីហនុ ព្រះវររាជមាតាជាតិខ្មែរក្នុងសេរីភាព សេចក្តីថ្លៃថ្នូរ និងសុភមង្គលប៉ុណ្ណោះនោះទេ។ ផ្ទុយទៅវិញ សៀវភៅនេះគឺជាការពណ៌នារំលេចឡើងនូវព្រះរាជហឫទ័យភក្ដី និងប្តេជ្ញាចំពោះព្រះរាជកាតព្វកិច្ចរបស់ព្រះអង្គដែលជាស្ត្រីដ៏ឆ្នើម ១ រូប ក្នុងឱកាសព្រះរាជពិធីចម្រើនព្រះជន្មរបស់សម្តេចព្រះវររាជមាតាជាតិខ្មែរគម្រប់ជន្មាយុ ៨០ ព្រះវស្សា។
សម្តេចព្រះមហាក្សត្រី ព្រះវររាជមាតា ព្រះអង្គមានព្រះជន្មាយុច្រើនពិតមែន ប៉ុន្តែព្រះជន្មាយុពុំបានធ្វើឱ្យភាពក្លៀវក្លាស្រស់ស្រាយរបស់ព្រះអង្គចុះស្រអាប់ ហើយក៏មិនអាចលុបបំបាត់ព្រះរាជសមិទ្ធផលគួរឱ្យកត់សម្គាល់របស់ព្រះអង្គបានដែរ។ ក្នុងព្រះរាជដំណើរជីវិតរបស់ព្រះអង្គ សម្តេចព្រះមហាក្សត្រី ព្រះវររាជមាតា ព្រះអង្គបានឆ្លងកាត់សង្គ្រាម និងភាពវឹកវរក្នុងសង្គម ហើយមិនត្រឹមតែប៉ុណ្ណោះសោត ព្រះអង្គរក្សាបានយ៉ាងខ្ជាប់ខ្ជួននូវព្រះរាជហឫទ័យភក្តី បរិច្ចាគ និងប្តេជ្ញាចំពោះព្រះករុណាព្រះបាទសម្ដេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរព្រះបរមរតនកោដ្ឋ ក៏ដូចជាចំពោះជាតិប្រជាជនកម្ពុជាទាំងមូល។
នៅពេលដែលព្រះករុណាព្រះបាទសម្តេច ព្រះនរោត្តម សីហនុ ព្រះអង្គសោយព្រះទិវង្គតនៅក្នុងខែតុលា ឆ្នាំ២០១២ សម្ដេចព្រះមហាក្សត្រី ព្រះវររាជមាតា ព្រះអង្គបានយាងទទួលស្វាគមន៍ប្រជាជនកម្ពុជានៅខាងមុខព្រះបរមរាជវាំងក្នុងព្រះភក្ត្រស្រងូតស្រងាត់ដើម្បីតំណាងជាការកាន់ទុក្ខថ្វាយដល់ព្រះករុណាព្រះមហាវីរក្សត្រនៅទូទាំងប្រទេស។
នៅពេលដែលសម្តេចព្រះមហាក្សត្រី ព្រះវររាជមាតា យកព្រះហស្តជូតព្រះអស្សរបស់ព្រះអង្គព្រះវត្តមានរបស់ព្រះអង្គអមដោយព្រះកាយវិការនេះបានញ៉ាំងឱ្យមានបរិយាកាសពោរពេញទៅដោយភាពសោកសង្រេងជ្រាលជ្រៅសម្រាប់មនុស្សគ្រប់រូប។
ហុង មិនា
«សាក្សីប្រវត្តិសាស្ត្រ-កំណត់ហេតុរបស់ព្រះមហាក្សត្រីនរោត្តម មុនិនាថ សីហនុ ព្រះវររាជមាតាជាតិខ្មែរ»
សៀវភៅ១ក្បាលទៀតដែលមានចំណងជើងថា «សាក្សីប្រវត្តិសាស្ត្រ - កំណត់ហេតុរបស់ព្រះមហាក្សត្រីនរោត្តម មុនិនាថ សីហនុ ព្រះវររាជមាតាជាតិខ្មែរ» ចងក្រងដោយមជ្ឈមណ្ឌលឯកសារកម្ពុជា គឺជាព្រះរាជដំណើររឿងដ៏ស៊ីជម្រៅនៃការសង្កេត និងព្រះរាជបទពិសោធន៍របស់ព្រះមហាក្សត្រី។
សៀវភៅនេះ ក៏មានជាភាសាអង់គ្លេសដែលមាន ៩៩ ទំព័រ និង ភាសាខ្មែរ ១១៨ ទំព័រផងដែរ។ ឯកសារទាំងនេះ កត់ត្រាអំពីព្រះរាជជីវិតរបស់ព្រះវររាជមាតាជាតិខ្មែរជាមួយព្រះបរមរតនកោដ្ឋ សម្ដេចព្រះបាទ នរោត្តម សីហនុ អំឡុងពេលទ្រង់រស់នៅក្នុងតំបន់រំដោះនៃរណសិរ្សរួបរួមជាតិកម្ពុជា។
សៀវភៅនេះ បានបង្ហាញព្រះរាជទស្សនៈអំពីប្រវត្តិសាស្ត្ររបស់ប្រទេសកម្ពុជា ក្នុងអំឡុងពេលមានជម្លោះប្រដាប់អាវុធ។ សៀវភៅព្រះរាជនិពន្ធរបស់ទ្រង់ដែលចាប់យកខ្លឹមសារនៃព្រះរាជដំណើរនេះ ត្រូវបានបោះពុម្ព និងចែកចាយជូនសាធារណជនដោយឥតគិតថ្លៃ ក្នុងចំនួន ៣៥ ០០០ ច្បាប់ជារៀងរាល់ឆ្នាំពីឆ្នាំ២០២៣ ដល់ឆ្នាំ២០២៥។
ពិធីគោរពព្រះវិញ្ញាណក្ខន្ធព្រះបរមរតនកោដ្ឋសម្តេចព្រះនរោត្តម សីហនុ
សៀវភៅដែលមានកម្រាស់១៣២ទំព័រភាគច្រើនរំលេចរូបថតព្រះរាជពិធីបុណ្យ ដែលត្រូវបានបោះពុម្ពជា៣ភាសាគឺខ្មែរ បារាំង និងអង់គ្លេស ផ្តោតលើការរំឭកព្រះរាជពិធីបុណ្យ ១០០ ព្រះវស្សានៃការប្រសូត ១៩២២-២០២២ និងព្រះរាជពិធីគោរពព្រះវិញ្ញាណក្ខន្ធខួបឆ្នាំទី១០ នៃការយាងចូលព្រះទិវង្គត ២០១២-២០២២ ព្រះករុណាព្រះបាទសម្ដេច ព្រះនរោត្ដម សីហនុ។
ព្រឹត្តិការណ៍ដ៏អស្ចារ្យមួយដែលបានប្រារឰធ្វើឡើងនៅថ្ងៃទី១៥ ខែកញ្ញា ឆ្នាំ២០២២ នៅទីក្រុងប៉េកាំង និងរៀបចំដោយអនុប្រធានាធិបតី Wang Qishan នៃប្រទេសចិនបានប្រារឰពិធីគោរពព្រះវិញ្ញាណក្ខន្ធរបស់សម្តេចព្រះនរោត្តម សីហនុ ទាំងនៅក្នុងប្រទេសកម្ពុជា និងប្រទេសចិន និងការរួមចំណែករបស់ព្រះអង្គចំពោះទំនាក់ទំនងចិន-កម្ពុជា។
ព្រះករុណាព្រះបាទសម្តេច ព្រះបរមនាថ នរោត្តម សីហមុនី និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ បានសម្តែងនូវអំណរគុណចំពោះការគាំទ្រ និងឆន្ទៈរបស់ប្រទេសចិនក្នុងការពង្រឹងកិច្ចសហប្រតិបត្តិការដោយសង្ឃឹមលើចំណងមិត្តភាពដ៏យូរអង្វែងរវាងប្រទេសទាំង២។
ព្រឹត្តិការណ៍មួយទៀតពិធីរំឭកព្រះរាជពិធីបុណ្យខួបលើកទី១០ព្រះមហាវីរក្សត្រនរោត្តម សីហនុ ព្រះមហាវីរក្សត្រ ព្រះវររាជបិតាពុទ្ធសាសនានៃពិភពលោកជាទីគោរពសក្ការៈដ៏ខ្ពង់ខ្ពស់បំផុតនៅកិច្ចប្រជុំកំពូលពុទ្ធសាសនា និងនេនប៊ុតស៊ូ។
ហុង មិនា
ព្រះរាជសកម្មភាព និងព្រះរាជសមិទ្ធផល សម្ដេចព្រះមហាក្សត្រី ព្រះវររាជមាតា នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុតនៅរាជធានី-ខេត្ដនានាទូទាំងព្រះរាជាណាចក្រកម្ពុជា
ជាព្រះរាជសកម្មភាពដ៏ទូលំទូលាយបំផុត សៀវភៅនេះ មាន ៤ ក្បាល ចាប់ពីឆ្នាំ២០១៣ ដល់ឆ្នាំ២០២២ គឺជាសក្ខីភាពមួយចំពោះការប្ដេជ្ញាចិត្តឥតងាករេរបស់ព្រះវររាជមាតាជាតិខ្មែរចំពោះកម្ពុជា។
ការបោះពុម្ពនីមួយៗចងក្រងយ៉ាងល្អិតល្អន់បង្ហាញពីការចូលរួមនិងការរួមចំណែករបស់ទ្រង់ទាំងក្នុងរាជធានីនិងទូទាំងខេត្ត។
ព្រះរាជកិច្ចមនុស្សធម៌៖បន្តការចូលរួមនៅក្នុងព្រះរាជគំនិតផ្តួចផ្តើមសប្បុរសធម៌និងមនុស្សធម៌ផ្សេងៗនៅទូទាំងប្រទេសកម្ពុជាគាំទ្រកម្មវិធីថែទាំសុខភាព ការអប់រំ និងសុខុមាលភាព។
ការអភិរក្សវប្បធម៌៖ព្រះបវររាជមាតាបានផ្សព្វផ្សាយនិងចូលរួមយ៉ាងសកម្មនៅក្នុងព្រឹត្តិការណ៍នានាក្នុងគោលបំណងថែរក្សា និងអបអរសាទរវប្បធម៌ និងបេតិកភណ្ឌកម្ពុជា។
ការបង្ហាញព្រះភក្ដ្រជាសាធារណៈ៖ទ្រង់បានបង្ហាញព្រះភក្ដ្រជាសាធារណៈជាច្រើននៅក្នុងព្រឹត្តិការណ៍ជាតិ និងពិធីនានាក្នុងព្រះរាជវត្ដមានដ៏ថ្លែថ្លា។
ព្រះរាជកិច្ចជាមួយអ្នកការទូត៖ទ្រង់ចូលរួមក្នុងសកម្មភាពការទូតផ្សេងៗរួមទាំងការជួបជាមួយឥស្សរជនបរទេស និងតំណាងប្រទេសកម្ពុជាក្នុងវេទិកាអន្តរជាតិ។
ព្រះរាជមុខងារ៖ព្រះបវររាជមាតាបានយាងចូលរួមក្នុងព្រះរាជពិធីសំខាន់ៗរួមទាំងពិធីបុណ្យប្រពៃណី និងពិធីបុណ្យនានារក្សានូវទំនៀមទម្លាប់វប្បធម៌ និងប្រវត្តិសាស្ត្រនៃរបបរាជានិយមកម្ពុជា។
ព្រះរាជគាំទ្រសិល្បៈ៖ព្រះមហាក្សត្រីបានលើកទឹកចិត្តនិងគាំទ្រសិល្បៈក្នុងប្រទេសកម្ពុជារួមទាំងការសម្តែងបែបប្រពៃណីខ្មែរ និងការបង្ហាញសិល្បៈសហសម័យ។
ព្រះរាជសកម្មភាពលើកកម្ពស់ការអប់រំ៖ទ្រង់មានព្រះហឫទ័យគាំទ្រការអភិវឌ្ឍការអប់រំដែលអាចពាក់ព័ន្ធនឹងការផ្តួចផ្តើមគំនិតដើម្បីកែលម្អអក្ខរកម្ម និងការទទួលបានការអប់រំ ជាពិសេសសម្រាប់សហគមន៍ក្រីក្រ។
ព្រះរាជវត្ដមានក្នុងការអភិរក្សបរិស្ថាន៖ព្រះមហាក្សត្រីយាងចូលរួមនៅក្នុងកិច្ចខិតខំប្រឹងប្រែងអភិរក្សបរិស្ថានដែលឆ្លុះបញ្ចាំងពីការរីកលូតលាស់នៃការយល់ដឹងជាសកលអំពីបញ្ហាបរិស្ថាន។
ព្រះរាជគំនិតផ្តួចផ្តើមផ្នែកសុខភាព៖ទ្រង់មានព្រះរាជហឫទ័យផ្សារភ្ជាប់ជាមួយនឹងការលើកកម្ពស់គម្រោងថែទាំសុខភាពដោយផ្តោតលើការកែលម្អសេវាសុខភាព និងការទទួលបានសេវាកម្មជាពិសេសនៅតំបន់ជនបទ។
សកម្មភាពទាំងនេះបង្ហាញពីការប្តេជ្ញាចិត្តរបស់សម្តេចព្រះមហាក្សត្រីនរោត្តម មុនិនាថ សីហនុ ចំពោះសុខុមាលភាព និងបេតិកភណ្ឌវប្បធម៌របស់ប្រទេសកម្ពុជាតួនាទីរបស់ព្រះអង្គក្នុងទំនាក់ទំនងការទូត និងការរួមចំណែករបស់ព្រះអង្គក្នុងការអភិវឌ្ឍសង្គមរបស់ប្រទេស។
ហុង មិនា
ព្រះរាជពិធីបុណ្យចម្រើនព្រះជន្មព្រះករុណាព្រះបាទ សម្តេចព្រះបរមនាថ នរោត្តម សីហមុនី គម្រប់ ៧០ ព្រះវស្សា
សៀវភៅដែលមានចំនួន ១០១ ទំព័រ រំឭកព្រះរាជពិធីបុណ្យចម្រើនព្រះជន្ម ៧០ ព្រះវស្សាព្រះករុណាព្រះបាទសម្តេចព្រះបរមនាថនរោត្តម សីហមុនី ដែលប្រារព្ធនៅថ្ងៃទី១៣-១៤ ខែឧសភា ឆ្នាំ២០២៣ រំលេចនូវបណ្តុំរូបថតដ៏ព្រះរាជសកម្មភាពក្នុងព្រះរាជពិធីបុណ្យនេះ។
យើងខ្ញុំជាថ្នាក់ដឹកនាំ និងសហការីទាំងអស់នៃសារព័ត៌មាន ភ្នំពេញ ប៉ុស្ដិ៍ (The Phnom Penh Post) សូមថ្លែងអំណរព្រះរាជគុណយ៉ាងជ្រាលជ្រៅដែលសម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ សព្វព្រះរាជហឫទ័យព្រះរាជទានសៀវភៅជាច្រើនដ៏មានគុណតម្លៃនិងជាប្រយោជន៍ដល់សង្គមជាតិ។
សៀវភៅទាំងនេះជាភ័ស្តុតាងរស់រវើកនៃព្រះរាជកិច្ចរបស់ទ្រង់ ដែលជំរុញទឹកចិត្ដ និងផ្ដល់ជាព័ត៌មានសព្វគ្រប់ជ្រុងជ្រោយដល់អ្នកដឹកនាំនយោបាយ បញ្ញវន្ត ប្រជានុរាស្ដ្រកម្ពុជា ក៏ដូចជាមនុស្សជុំវិញពិភពលោកផងដែរ។
ខ្ញុំម្ចាស់ យើងខ្ញុំ សូមលំឱនកាយលើកហត្ថប្រណមឧទ្ទិសបួងសួងដល់គុណបុណ្យព្រះរតនត្រ័យ តេជះបារមីនៃវត្ថុស័ក្តិសិទ្ធិក្នុងលោក សូមប្រោះព្រំព្រះពរជ័យ បវរសួស្តី សិរីមង្គល វិបុលសុខមហាប្រសើរ ថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ សូមទ្រង់មានព្រះកាយពលមាំមួន ព្រះបញ្ញាញាណវាងវៃ ព្រះរាជសុខភាពល្អបរិបូរណ៍ព្រះជន្មាយុយឺនយូរ ដើម្បីគង់ប្រថាប់ជាម្លប់ដ៏ត្រជាក់ត្រជំ ដល់ប្រជារាស្ត្រទូទាំងប្រទេស ជានិច្ចនិរន្តរ៍តរៀងទៅ៕
ហុង មិនា
ហុង មិនា
