ស្រ្តីជាប់ចោត Darya Trepova។ AFP
កាលពីទី ២៥ ខែមករា ឆ្នាំ ២០២៤ ស្ត្រីវ័យក្មេងជនជាតិរុស្ស៊ីម្នាក់ត្រូវបានកាត់ទោសឱ្យជាប់ពន្ធនាគារចំនួន ២៧ ឆ្នាំ ដោយសារតែលោកស្រីបានកាន់គ្រាប់បែក យកទៅឱ្យអ្នកសរសេរប្លុកគាំទ្រយោធារុស្ស៊ីម្នាក់ ហើយក៏បានផ្ទុះស្លាប់អ្នកសរសេរនោះភ្លាមៗ បន្ទាប់ពីជនរងគ្រោះបានទទួលយកទៅកាន់ក្នុងដៃរបស់គាត់ ដែលហេតុការណ៍នេះបានកើតឡើងកាលពីថ្ងៃទី២ ខែមេសា ឆ្នាំ ២០២៣។
ស្ត្រីវ័យក្មេងជនជាតិរុស្ស៊ីរូបនេះមានឈ្មោះថា ដាយ៉ា ត្រេប៉ូវ៉ា (Darya Trepova) និងមានអាយុ ២៦ ឆ្នាំ។ តុលាការប្រឆាំងអំពើភេរវកម្មនៅទីក្រុងសាំងពេទឺប៊ឺគ (Saint Petersburg) បានចោទលោកស្រីពីបទផ្ដល់គ្រឿងផ្ទុះ និងប្រើប្រាស់ឯកសារក្លែងក្លាយពាក់ព័ន្ធនឹងការស្លាប់របស់អ្នកសរសេរប្លុករូបនោះដែលមានឈ្មោះថា វ្ល៉ាដឡេន តាតាស្គី (Vladlen Tatarsky)។
ជាការកត់សម្គាល់ ស្ត្រីរូបនេះមិនបានបង្ហាញអារម្មណ៍ភ្ញាក់ផ្អើលអ្វីឡើយនៅពេលដែលតុលាការកំពុងប្រកាសកាត់ទោស។ យោងតាមការរាយការណ៍របស់ប្រព័ន្ធផ្សព្វផ្សាយរុស្ស៊ី នេះគឺជាការដាក់ទោសស្ត្រីដ៏ធ្ងន់ធ្ងរបំផុតមិនធ្លាប់មានក្នុងប្រវត្តិសាស្ត្រទំនើបរបស់រុស្ស៊ី។ ដោយឡែក ក្រុមមេធាវីការពារក្តីរបស់លោកស្រី កំពុងរៀបចំប្ដឹងឧទ្ធរណ៍បន្ត។
លោក តាតាស្គី បានស្លាប់ដោយសារតែគ្រាប់បែកដែលលាក់នៅក្នុងរូបចម្លាក់ដែលដូចទៅនឹងរូបគាត់។ លោកស្រី ត្រេប៉ូវ៉ា បានជូនរូបចម្លាក់នេះជាកាដូដល់លោក តាតាស្គី ក្នុងអំឡុងពេលដែលពួកគេកំពុងជជែកគ្នានៅហាងកាហ្វេមួយកន្លែងក្នុងទីក្រុងសាំងពេទឺប៊ឺគ។ យ៉ាងណាក៏ដោយ លោកស្រី ត្រេប៉ូវ៉ា បានអះអាងថា លោកស្រីត្រូវបានគេបោកប្រើ ដោយយល់ច្រឡំថារូបសំណាកនោះផ្ទុកឧបករណ៍ស្រូបសំឡេង ដោយមិនគិតថាវាជាគ្រាប់បែកនោះទេ។
ក្នុងអំឡុងពេលបើកសវនាការ លោកស្រីបានរៀបរាប់ថា លោកស្រីបានធ្វើតាមការបញ្ជារបស់បុរសម្នាក់នៅប្រទេសអ៊ុយក្រែន ដែលទំនងជាប្រើឈ្មោះក្លែងក្លាយថា ហ្គេស្ទល់ (Gestalt) ។ លោកស្រីបានបន្តថា បុរសម្នាក់នោះបានផ្តល់ប្រាក់ និងការណែនាំដល់រូបលោកស្រីអស់ជាច្រើនខែមកហើយ មុននឹងហេតុការណ៍ផ្ទុះនៅហាងកាហ្វេកើតឡើង។
ក្រោយហេតុការណ៍ផ្ទុះនោះកើតឡើង រុស្ស៊ីបានប្រកាសចោទប្រកាន់អ៊ុយក្រែនថា ជាអ្នករៀបចំសម្លាប់លោក តាតាស្គី ដែលមានឈ្មោះពិតថា លោក ម៉ាស្ស៊ីម ហ្វូមីន (Maxim Fomin)។ លោកគឺជាសមាជិកម្នាក់ក្នុងក្រុមអ្នកសរសេរប្លុកដ៏មានឥទ្ធិពល ដែលតែងតែគាំទ្រការធ្វើសង្គ្រាមរបស់រុស្ស៊ីនៅអ៊ុយក្រែន ប៉ុន្តែពេលខ្លះក៏បានសរសេររិះគន់ចំពោះយុទ្ធសាស្ត្ររបស់រុស្ស៊ីផងដែរ។
យ៉ាងណាមិញ មន្ត្រីជាន់ខ្ពស់អ៊ុយក្រែនមិនបានប្រកាសទទួលស្គាល់ ឬបដិសេធការទទួលខុសត្រូវចំពោះការស្លាប់របស់លោក តាតាស្គី នោះទេ។ ជំនួយការប្រធានាធិបតីអ៊ុយក្រែន លោក មីខៃឡូ ផូដូលយ៉ាក់ (Mykhailo Podolyak) បានហៅព្រឹត្តិការណ៍មួយនេះថាជាអំពើភេរវកម្មផ្ទៃក្នុងប្រទេសរុស្ស៊ី ប៉ុន្តែលោកស្រី ត្រេប៉ូវ៉ា បានពន្យល់ថា លោកស្រីបានធ្វើតាមការណែនាំរបស់លោក ហ្គេស្ទល់ ដោយគិតថាគោលបំណងគឺដើម្បីលួចស្តាប់សំឡេងនិយាយរបស់លោក តាតាស្គី ដើម្បីប្រមូលព័ត៌មានដែលលោកបានដឹងពីសង្គ្រាម ដោយសារតែលោកស្រីមិនគាំទ្រការធ្វើសង្គ្រាមនៅអ៊ុយក្រែននោះទេ។
នៅដើមសប្តាហ៍នេះ លោកស្រីបានសម្តែងការសោកស្តាយយ៉ាងខ្លាំងនៅតុលាការ ដោយបានទទួលស្គាល់ថាដោយសារតែការទុកចិត្ត និងភាពឆោតល្ងង់របស់លោកស្រី បានបណ្តាលឱ្យមានគ្រោះថ្នាក់យ៉ាងធ្ងន់ធ្ងររហូតដល់ស្លាប់មនុស្សម្នាក់។ ថ្លែងដោយផ្ទាល់ទៅកាន់អ្នកដែលរងរបួសនៅក្នុងការបំផ្ទុះគ្រាប់បែកនោះ និងដែលពួកគេកំពុងទារសំណងយ៉ាងច្រើន លោកស្រីបាននិយាយថា ចេតនារបស់លោកស្រីគឺមិនមែនដើម្បីបង្កគ្រោះថ្នាក់ដល់នរណាម្នាក់ឡើយ។
មេធាវីការពារក្តីរបស់លោកស្រីបានអះអាងថា លោកស្រីក៏ជាជនរងគ្រោះម្នាក់ផងដែរ ដោយសារតែពេលកំពុងផ្ទុះ លោកស្រីក៏ស្ថិតនៅជិតនឹងកន្លែងផ្ទុះ ហើយក៏រងរបួសដូចគ្នា។ ប៉ុន្តែ តំណាងអយ្យការបានអះអាងថា លោកស្រីបានដឹងហើយថាមានគ្រាប់បែកនៅក្នុងរូបសំណាកនោះ ហើយមានចេតនាចង់ធ្វើឱ្យរុស្ស៊ីមានអស្ថិរភាព និងបង្ខូចកេរ្តិ៍ឈ្មោះប្រតិបត្តិការយោធារបស់ខ្លួននៅអ៊ុយក្រែន។
បន្ទាប់ពីការផ្ទុះ លោកស្រី ត្រេប៉ូវ៉ា បានភ័យស្លន់ស្លោ ហើយដឹងយ៉ាងច្បាស់ថាលោកស្រីនឹងត្រូវប៉ូលិសចាប់ខ្លួន ដូច្នេះលោកស្រីក៏លែងស្ដាប់តាមការណែនាំរបស់លោក ហ្គេស្ទល់ ដែលបានប្រាប់លោកស្រីឱ្យធ្វើដំណើរទៅកាន់ព្រលានយន្តហោះ ដើម្បីរត់គេចខ្លួនទៅក្រៅប្រទេស។
ជំនួសឱ្យការធ្វើតាមការណែនាំឱ្យភៀសខ្លួន លោកស្រីបានទូរសព្ទហៅប្តី បន្ទាប់មក ប្ដីរបស់លោកស្រីបានសុំផ្ទះល្វែងមិត្តភក្ដិរបស់លោក ឈ្មោះថា ឌីមីទ្រី កាស៊ីនសេវ (Dmitry Kasintsev) ស្នាក់នៅមួយយប់។ នៅថ្ងៃបន្ទាប់ លោកស្រីក៏ត្រូវបានចាប់ខ្លួន រីឯលោក កាស៊ីនសេវ អាយុ ២៧ ឆ្នាំ ក៏បានទទួលការកាត់ទោសឱ្យជាប់ពន្ធនាគាររយៈពេល ១ ឆ្នាំ ៩ ខែ ពីបទជួយលាក់ខ្លួនជនល្មើស បើទោះបីជាមានសក្ខីកម្មពីលោកស្រី ត្រេប៉ូវ៉ា ថា លោកស្រីមិនធ្លាប់បានជួបគាត់ពីមុនមក ហើយគាត់ក៏មិនមានជាប់ពាក់ព័ន្ធជាមួយនឹងគ្រាប់បែកនោះក៏ដោយ៕
