ទិដ្ឋភាពការរៀបចំតម្លើងខ្លោងទ្វារព្រះរាជពិធីបុណ្យអុំទូកនៅវត្ដភ្នំដែលត្រូវបានឆ្លាក់ឡើងយ៉ាងពិសេស។ រូបថត សហការី
ភ្នំពេញ៖ នៅពេលព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ចាប់ផ្តើមពីថ្ងៃស្អែកទី ១៤ដល់ថ្ងៃទី១៦ ខែវិច្ឆិកានេះ រាជធានីភ្នំពេញក៏បានបង្ហាញខ្លោងរបារកាត់ទទឹងផ្លូវ ឬខ្លោងទ្វាររំលេចសិល្បៈប្រពៃណីខ្មែរដ៏ប្លែកអស្ចារ្យសម្រាប់ឆ្នាំ២០២៤នេះ។
ចំណុចសំខាន់នៃការប្រារឰព្រះរាជពិធីនៅឆ្នាំនេះគឺ ការរចនាក្បាច់បំភ្លឺដ៏គួរឱ្យចាប់អារម្មណ៍នៅទីតាំងចំនួន ៣ ដែលត្រូវបានឆ្លាក់ដោយចម្លាក់ដ៏ប្រណិត ពីបេតិកភណ្ឌវប្បធម៌របស់កម្ពុជា។
ខុសពីឆ្នាំមុនៗ នៅពេលដែលខ្លោងទ្វារព្រះរាជពិធីបុណ្យត្រូវបានបោះពុម្ពជាស្ទីកឃ័រ ការតុបតែងនៅឆ្នាំនេះត្រូវបានឆ្លាក់ ដោយបញ្ចូលនូវភាពវិសេសនៃសិល្បៈចម្លាក់សម័យអង្គរដ៏រុងរឿង។
លោក ណាក់ ណាង ជាអ្នកទទួលការងារចម្លាក់ក្បាច់រចនាខ្លោងរបារកាត់ទទឹងផ្លូវ (ខ្លោងទ្វារ) សម្រាប់ពិធីបុណ្យអុំទូកឆ្នាំ២០២៤ នេះ បានឱ្យដឹងថា លោកទទួលការងារនេះជាលើកដំបូង និងមានលក្ខណៈពិសេសជាងរាល់ៗឆ្នាំ។
ក្រោយការឌីហ្សាញក្បាច់រចនារបស់វិចិត្រករ ថៃ សាន ផ្នែកចម្លាក់មានតួនាទីឆ្លាក់រូបភាពទាំងនោះមុនពេលត្រូវបានតម្លើងទៅតាមទីតាំងទាំង ៣។
លោកបានប្រាប់ភ្នំពេញប៉ុស្ដិ៍ថា៖ «កន្លងមក ខ្លោងទ្វារស្វាគមន៍បុណ្យអុំទូកនេះ គ្រាន់តែត្រូវបានព្រីនក្រោយការឌីហ្សាញ រួចបិទតែម្ដង។ ប៉ុន្ដែឆ្នាំនេះ ស្លាកអុំទូកត្រូវបានធ្វើចេញជាចម្លាក់វិញ ដែលជាលើកទីមួយ»។
ទិដ្ឋភាពការរៀបចំតម្លើងខ្លោងទ្វារព្រះរាជពិធីបុណ្យអុំទូកនៅវិថីព្រះសុធារស ក្បែរវត្ដឧណ្ណាលោម ដែលរចនាឡើងពីអ្នកឌីហ្សាញថៃ សាន និងជាងចម្លាក់ ណាក់ ណាង។ រូបថត សហការី
គំនិតផ្ដួចផ្ដើមបង្កើតជាចម្លាក់នេះ ទើបត្រូវបានសម្រេចដោយសាលារាជធានីភ្នំពេញក្នុងរយៈពេលខ្លី ដែលទាមទារក្រុមការងារចម្លាក់ និងតម្លើងញាប់ដៃញាប់ជើងទាំងយប់ទាំងថ្លៃ។
លោក ណាង បានឱ្យដឹងថា ក្រោយបញ្ចប់ការតម្លើងនៅទីតាំងវត្ដឧណ្ណាលោម រួចបន្ដទៅទីតាំងវត្ដភ្នំ និងរៀបចំទីតាំងចុងក្រោយនៅវិមានឯករាជ្យ ដែលត្រូវបញ្ចប់នារាត្រីនេះ មុនពេលពិធីបុណ្យអុំទូកចាប់ផ្ដើមនៅថ្ងៃស្អែក។
ចម្លាក់ក្បាលនាគពីស្នោ មុនពេលត្រូវយកទៅលាប និងតម្លើងនៅតាមគោលដៅ ដែលខុសពីឆ្នាំកន្លងមក ខ្លោងទ្វារត្រូវបានធ្វើឡើងជារូបភាពព្រីន។ រូបថត សហការី
ជាមួយក្រុមការងារជាអ្នកសិល្បៈចម្លាក់ប្រមាណ ២០នាក់ លោក ណាង បានបញ្ជាក់ថា ពួកគេស្ម័គ្រចិត្ដចូលរួមក្នុងគម្រោងនេះសម្រុកការងាររហូតដល់អាធ្រាត្រដើម្បីសម្រេចគោលបំណងចម្លាក់ស្វាគមន៍ព្រះរាជពិធីបុណ្យអុំទូកទាន់ពេលវេលា។
លោក ថៃ សាន ជាវិចិត្រកររចនាក្បាច់រូបភាព និងក្បាច់បុរាណខ្មែរ បាននិយាយថា ឆ្នាំនេះ ក្រុមការងាររបស់លោកធ្វើការឌីហ្សាញលើស្នោរ ខុសពីឆ្នាំកន្លងទៅ ដែលធ្វើឡើងលើស្ទីកឃ័រ និងបិទលើបន្ទះរឹង។
លោកបានឱ្យដឹងថា ឆ្នាំនេះ គណកម្មាធិការបុណ្យជាតិ និងអន្ដរជាតិរៀបចំធំ ហើយខាងសាលារាជធានីភ្នំពេញបានចាត់ចែកឱ្យលោកឌីហ្សាញលើស្នោរវិញដើម្បីឱ្យប្លែកជាងឆ្នាំមុនៗ។
លោក ណាក់ ណាង ថតរូបសែលហ្វីអំឡុងពេលបំពេញការងារទាំងយប់ ទាំងថ្ងៃក្នុងការឆ្លាក់ក្បាច់រចនាបុរាណខ្មែរសម្រាប់អបអរព្រះរាជពិធីបុណ្យអុំទូក។ រូបថត សហការី
ជាអ្នកឌីហ្សាញខ្លោងទ្វារសង្ក្រានព្រៃវែងដ៏ល្បីល្បាញ លោក សាន បានប្រាប់ភ្នំពេញប៉ុស្ដិ៍ថា៖ «ចំពោះការឌីហ្សាញនេះ វាជាគំនិតរបស់ខ្ញុំផ្ទាល់ ពីព្រោះខ្ញុំបានធ្វើកិច្ចការនេះយូរឆ្នាំដែរហើយ ហើយមានការកែតម្រូវដោយអភិបាលរងរាជធានីភ្នំពេញ ដែលលោកបានកែសម្រួល»។
លោកបានបន្ថែមថា៖ «ជាទូទៅ ក្បាច់បុរាណដែលខ្ញុំជ្រើសរើសយកមកនេះ ជាក្បាច់សម័យអង្គរ ដែលជាសម័យកាលដ៏រុងរឿងមួយរបស់ខ្មែរ ដែលជាទូទៅ គេក្រឡេកមើលឃើញប្រាកដជាស្គាល់»។
សង្ក្រាន្តឆ្នាំ២០១៨ វិចិត្រករ ថៃ សាន បានទាញយកចំណាប់អារម្មណ៍មហាជន បន្ទាប់ពីបានឌីហ្សាញគំនូរខ្លោងទ្វារសង្ក្រាន្តព្រៃវែង ដែលរំលេចនូវរចនាប័ទ្មគួស្រូវធំ និងទេវតាពីរអង្គ។
ដោយសារតែពេលវេលាខ្លី ក្នុងរយៈពេលមួយសប្ដាហ៍ ក្រុមការងារទាំងអស់ត្រូវរៀបចំតុបតែងខ្លោងទ្វារ ៣គោលដៅ លោក សាន បានអរគុណដល់ក្រុមសមាជិកទាំអស់ រួមទាំង ក្រុមការងាររបស់លោក ណាង៕
