លោក ប៉ោយ ឈុនលី រៀបរាប់ដំណើររឿងស្ដីពីគំនូរលើភូមិបណ្ដែតទឹកនៃបឹងទន្លេសាបរបស់លោកដល់ភ្ញៀវ។ រូបថត ហុង រស្មី
ភ្នំពេញ៖ សមាគមន៍គំនូរសិល្បៈពណ៌ទឹកកម្ពុជា សហការជាមួយសម្ព័ន្ធគំនូរសិល្បៈពណ៌ទឹកអាស៊ី និងសម្ព័ន្ធសិល្បៈអាស៊ី បង្ហាញមោទនភាពចំពោះ «ការតាំងពិព័រណ៍សិល្បៈអច្ឆរិយៈ» "Wonder Art Exhibition" រួមនឹង «ពិព័រណ៍ពិសេសសម្ព័ន្ធសិល្បៈអាស៊ីលើកទី១៦ ឆ្នាំ២០២៤»។
ព្រឹត្តិការណ៍នេះដែលមានស្នាដៃសិល្បៈចំនួន ១៧៧ផ្ទាំង ពីវិចិត្រករចំនួន ៨២ តំណាងឱ្យ ១៧ ប្រទេស បានបើកដំណើរការនៅថ្ងៃនេះនៅសាលតាំងពិព័រណ៍បណ្តោះអាសន្នរបស់សារមន្ទីរ ព្រះស្រីឦសានវរ្ម័ន (ស.ស.រ)។
ចាប់ពីថ្ងៃនេះរហូតដល់ថ្ងៃទី ១០ ខែវិច្ឆិកា ឆ្នាំ ២០២៤ ការតាំងពិព័រណ៍នេះផ្តល់ជូននូវការបង្ហាញដ៏រស់រវើកនៃទម្រង់សិល្បៈចម្រុះ រួមទាំងគំនូរ រូបចម្លាក់ និងប្រព័ន្ធផ្សព្វផ្សាយចម្រុះ ដែលនីមួយៗឆ្លុះបញ្ចាំងពីប្រធានបទនៃបច្ចេកវិទ្យា ធម្មជាតិ និងបទពិសោធន៍របស់មនុស្សជាតិ។
លោក Chong Pak Jit ប្រធានសមាគមន៍គំនូរសិល្បៈពណ៌ទឹកកម្ពុជា បានថ្លែងក្នុងពិធីបើកពិព័រណ៍ថា៖ «យើងជឿជាក់ថា ការតាំងពិព័រណ៍នេះនឹងបង្ហាញពីការភ្ជាប់ទំនាក់ទំនងរវាងប្រទេសនានា និងជំរុញការសន្ទនាប្រកបដោយអត្ថន័យ»។
លោក Pak Jit បានស្វាគមន៍អ្នកចូលរួមដោយប្រារឰការតាំងពិព័រណ៍ជាវេទិកាសម្រាប់ការផ្លាស់ប្តូរវប្បធម៌ និងការទទួលស្គាល់សិល្បៈ។
លោកបានបន្ដថា៖ «បេតិកភណ្ឌដ៏សម្បូរបែប និងចក្ខុវិស័យតែមួយគត់របស់សិល្បករខ្មែរ សមនឹងទទួលបានការអបអរសាទរ និងចែករំលែកទៅកាន់ពិភពលោក។ តាមរយៈព្រឹត្តិការណ៍បែបនេះ យើងផ្តល់នូវវេទិកាមួយសម្រាប់អ្នកមានទេពកោសល្យបញ្ចេញសមត្ថភាព និងទទួលបានការទទួលស្គាល់»។
លោក Blaise Kilian សហនាយកនៃសារមន្ទីរ ស.ស.រ បាននិយាយថា សាលតាំងពិព័រណ៍បណ្ដោះអាសន្ននេះត្រូវបានរៀបចំឡើងក្នុងគោលបំណងបំណងផ្សព្វផ្សាយស្នាដៃសិល្បៈមកពីមជ្ឈដ្ឋានផ្សេងៗគ្នាដែលផ្ដល់ជូននូវការទស្សនា ការផ្លាស់ប្តូរ និងទស្សនវិស័យចម្រុះ។
លោក Kilian បាននិយាយថា លោកចង់ឱ្យកន្លែងនេះក្លាយជាកន្លែងទាក់ទាញចំណាប់អារម្មណ៍មហាជន និងជាមជ្ឈមណ្ឌលនៃការផ្លាស់ប្តូរសិល្បៈ។
លោកបានបន្ថែមថា៖ «ខ្ញុំមើលឃើញសិល្បករមានចំនួន ៨២ នាក់មកពី ១៧ ប្រទេសដែលដាក់តាំងគំនូរចំនួន ១៧៧ ផ្ទាំង ក្នុងនោះមាន ២ នាក់ តំណាងឱ្យទេសាភិបាលធនាគារជាតិរបស់យើង។ ដូច្នេះខ្ញុំពិតជាមានអំណរគុណណាស់ដែលអ្នកទាំងអស់គ្នាបានមកពីកន្លែងផ្សេងៗដើមប្រមូលផ្ដុំគ្នានៅប្រទេសកម្ពុជា និងនៅក្នុងសារមន្ទីរនេះ ដែលមិនត្រឹមតែជាសារមន្ទីរក្មេងខ្ចីជាងគេប៉ុណ្ណោះទេ ប៉ុន្តែក៏ជាសារមន្ទីរទំនើប និងបើកទូលាយបំផុតនៅក្នុងប្រទេសផងដែរ។ ស្វាគមន៍អ្នករាល់គ្នា»។
អ្នកស្ម័គ្រចិត្តមកពីសាកលវិទ្យាល័យភូមិន្ទវិចិត្រសិល្បៈបានជួយរៀបចំព្រឹត្តិការណ៍នេះ ហើយទំនងជាបានសិក្សាស្វែងយល់ក្នុងនាមជានិស្សិតសិល្បៈវ័យក្មេង ដែលថ្ងៃណាមួយពួកគេអាចនឹងដាក់តាំងនៅទីនេះ ឬកន្លែងផ្សេងទៀត។
ពិព័រណ៍នេះបើកជាសាធារណៈចាប់ពីថ្ងៃទី ៦ ដល់ថ្ងៃទី ១០ ខែវិច្ឆិកា រួមទាំងទិវាបុណ្យឯករាជ្យជាតិនៅថ្ងៃទី ៩ ខែវិច្ឆិកា ត្រូវបានរំពឹងថានឹងទាក់ទាញអ្នកទស្សនាជាច្រើន។
លោក ឈុនលី បានផ្លាស់ប្តូរបច្ចេកទេសគំនូរ និងចែករំលែកចំណេះដឹងជាមួយវិចិត្រករដទៃ។ រូបថត ហុង រស្មី
លោក Kilian បានបញ្ចប់ថា៖ «ខ្ញុំលើកទឹកចិត្តសាធារណជនឱ្យចូលទស្សនាច្រើនកុះករ។ ខ្ញុំប្រាកដថា នេះជាព្រឹត្តិការណ៍មួយទៀតដែលនឹងជួយអភិវឌ្ឍវិស័យវប្បធម៌ និងសិល្បៈរបស់ប្រទេសកម្ពុជាដែលមានភាពរីកចម្រើនក្នុងរយៈពេលប៉ុន្មានឆ្នាំចុងក្រោយនេះ ហើយបន្តកើនឡើងជារៀងរាល់ថ្ងៃ»។
លោក ប៉ោយ ឈុនលី ជាសិល្បករមកពីខេត្តបាត់ដំបង ដែលល្បីល្បាញខាងការងារគំនូរជីវចល គំនូរ និងការអប់រំសិល្បៈ។
និស្សិតបញ្ចប់ការសិក្សានៅសាលាសិល្បៈ ហ្វាពន្លឺសិល្បៈ ខេត្តបាត់ដំបង និង Ecole Pivaut នៃប្រទេសបារាំង លោក ឈុនលី បានសិល្បករផ្នែកគំនូរវិស័យសិល្បៈកម្ពុជា។
ភ្ញៀវចូលទស្សនា «ការតាំងពិព័រណ៍សិល្បៈអច្ឆរិយៈ» "Wonder Art Exhibition" រួមនឹង «ពិព័រណ៍ពិសេសសម្ព័ន្ធសិល្បៈអាស៊ីលើកទី១៦ ឆ្នាំ២០២៤»។ រូបថត ហុង រស្មី
នៅក្នុង "Wonder Art Exhibition" លោក ឈុនលី បង្ហាញស្នាដៃបុរសម្នាក់ពាក់ក្រមា នៅក្នុងផ្ទះចាស់មួយនៅជាយភូមិបណ្តែតទឹក។
លោក ឈុនលី ប្រាប់ភ្នំពេញប៉ុស្តិ៍ថា៖ «ប្រជាជននៅក្នុងរាជធានី និងទីប្រជុំជនមើលឃើញរថយន្ត និងអគារជាច្រើន ដូច្នេះផ្ទះនៅឆ្ងាយដាច់ស្រយាលលើបឹងទន្លេសាប គឺជាទិដ្ឋភាពដ៏កម្រសម្រាប់ពួកគេ»។
លោកបានបន្ថែមថា៖ «ពាក្យចាស់ដែលពោលថា ទីណាមានទឹក ទីនោះមានត្រី លែងជាការពិតហើយ ហើយប្រជាជននាំគ្នាចាកចេញពីភូមិជាបន្ដបន្ទាប់»។
លោក ឈុនលី បានផ្លាស់ប្តូរបច្ចេកទេសគំនូរ និងចែករំលែកចំណេះដឹងជាមួយវិចិត្រករដទៃ។ រូបថត ហុង រស្មី
ក្នុងពេលតាំងពិព័រណ៍នេះ លោក ឈុនលី ក៏បានផ្លាស់ប្តូរបច្ចេកទេសគំនូរជាមួយវិចិត្រករដទៃទៀត ដោយអាចឱ្យពួកគេចែករំលែកចំណេះដឹងដល់គ្នាទៅវិញទៅមក។
សារមន្ទីរ ស.ស.រ មានទីតាំងនៅអគារលេខ១៦ រុក្ខវិថីលេខ១០៦ ព្រះមហាក្សត្រីយានីកុសមៈ សង្កាត់វត្តភ្នំ រាជធានីភ្នំពេញ៕
