រូបថតពិពណ៌នាដំណើរផ្សងព្រេងលើភ្នំទឹកកកនៃវិថី នៅតំបន់អាស៊ីកណ្ដាល ប៉ាមៀហាយវ៉េ (M41) ដែលមានសីតុណ្ហភាពធ្លាក់ដល់ -៣០អង្សាសេ។ រូបថត សហការី
ភ្នំពេញ៖ បេសកកម្មជិះកង់របស់លោក ទីវ តារារិទ្ធិលើផ្លូវ Pamir Highway តំបន់អាស៊ីកណ្តាល គឺជាដំណើរដ៏ពុះពារបំផុត ការរស់រានមានជីវិត និងការប្តេជ្ញាចិត្តចំពោះបុព្វហេតុធំជាងខ្លួនឯង។
អ្វីដែលចាប់ផ្តើមដូចជាសុបិនបានក្លាយទៅជាបទពិសោធន៍ស្ទើរតែលែងបានវិលត្រឡប់មកមាតុភូមិកំណើតវិញ នៅពេលអ្នកផ្សងព្រេងកម្ពុជាក្លាហានឆ្លងកាត់តំបន់ដែលមានសីតុណ្ហភាព -៣០អង្សាសេ។
ក្នុងដំណើរជិះកង់រយៈពេលប្រាំមួយខែលើដំណើរមួយឆ្នាំពីកម្ពុជាទៅអឺរ៉ុប អ្នកជិះកង់ផ្លូវឆ្ងាយកម្ពុជា និងសប្បុរសជនបានចាប់ផ្ដើមមហិច្ឆតារៃអង្គាសថវិកាដល់កុមារកម្ពុជាកំពុងព្យាបាលជំងឺមហារីក។
លោក ទីវ តារារិទ្ធិ បានរៀបរាប់អំពីបទពិសោធធ្វើដំណើរលើផ្លូវសូត្រតំបន់អាស៊ីកណ្តាល (Pamir Highway) ជាផ្លូវតភ្ជាប់តំបន់ភ្នំនៃប្រទេសកៀហ្សីស្ថាន (Kyrgyzstan) ជាមួយប្រទេសតាជីគីស្ថាន (Tajikistan) និងស្ថិតនៅតាមបណ្តោយព្រំដែនប្រទេសចិន (China) ប៉ាគីស្ថាន (Pakistan) និងអាហ្គានីស្ថាន (Afghanistan)។
ផ្លូវសូត្រតំបន់អាស៊ីកណ្តាល ឬ ប៉ាមៀហាយវ៉េ (M41) គឺជាឈ្មោះនៃតំបន់ទេសភាពដ៏ស្រស់ស្អាតអស្ចារ្យជាមួយនឹងរសជាតិសម្រាប់ការធ្វើដំណើរផ្សងព្រេង។
វាជាទីកន្លែងដែលនៅផ្តាច់ចេញពីអ្វីៗទាំងអស់ និងជាតំបន់ដាច់ស្រយ៉ាលបំផុតមួយ។ M41 ជាលេខផ្លូវហាយវ៉េ ដែលស្ថិតនៅរយៈកម្ពស់ខ្ពស់ជាងគេបង្អស់ លេខ ២ នៅលើលោក បន្ទាប់ពីផ្លូវហាយវ៉េ ខារ៉ាកូរ៉ូម។
លោក តារារិទ្ធិ បានប្រាប់ភ្នំពេញប៉ុស្ដិ៍ពីប្រទេសតាជីគីស្ថានថា៖ «នៅទីនេះមានសីតុណ្ហភាពអាក្រក់បំផុត ហើយខ្ញុំត្រូវជិះកង់គេចកន្លែងដែលខ្ពស់ៗបំផុត។ ពេលដឹងខ្លួនថា កំពុងជិះកន្លែងខ្ពស់ ខ្ញុំត្រូវជិះចុះឱ្យបានលឿនតាមដែលអាចធ្វើទៅបាន»។
លោកមិនអាចចំណាយពេលយប់នៅលើរយៈកម្ពស់ចាប់ពី ៤៦០០ម៉ែត្រនោះទេ ពីព្រោះវាប្រាកដជាគ្រោះថ្នាក់បំផុត។
ប៉ុន្ដែឧបសគ្គកើតឡើង មិនអាចសន្មត់ទុកបានទេ ដោយសារពេលខ្លះ ការជិះកង់មានល្បឿនយឺត និងមិនអាចត្រឡប់ក្រោយវិញទេ។
លោកបានអះអាថា ដំណើរផ្សងព្រេងនៅអាស៊ីកណ្ដាលនេះពិតជាលំបាក គឺលំបាកឥតគណនា ដោយសារវាជាតំបន់ជួរភ្នំខ្ពស់ៗដូចនៅហេមពាន្ដដែរ។ ប៉ុន្ដែលើសពីនេះ វាមានអាកាសធាតុត្រជាក់ខ្លាំងមែនទែន។
លោកបានប្រាប់ថា៖ «តំបន់អាស៊ីកណ្ដាលនេះគឺជាស្នូលនៃបេសកកម្មដើម្បីកុមារកម្ពុជា ដែលខ្ញុំមិនអាចរំលងទីនេះបាន ហើយណាមួយវាជាទីកន្លែងតែមួយគត់នៅក្នុងក្ដីស្រមៃរបស់ខ្ញុំ ដែលខ្ញុំចង់ធ្វើដំណើរឆ្លងកាត់ ទោះត្រូវប្រថុយប្រថានជីវិតក៏ដោយ»។
នេះជាដំណើរផ្សងព្រេងដែលមានតែមួយគត់ក្នុងឆាកជីវិតរបស់អ្នកជិះកង់ដើម្បីកុមារកម្ពុជារូបនេះ ដែលលោក តារារិទ្ធិ នៅតែកោតស្ញប់ស្ញែងចំពោះសម្រស់ធម្មជាតិនៅតំបន់អាស៊ីកណ្ដាលនេះ។
លោកបានសរសេរនៅលើហ្វេសប៊ុកថា៖ «នៅផ្លូវហាយវ៉េនេះ គឺហាក់បីដូចជាមានតែខ្ញុំតែម្នាក់ទេដែលកំពុងធ្វើដំណើរ វាដូចជាពិភពពណ៌សមួយ និងផ្តាច់ចេញពីពិភពមនុស្ស។ ល្ងាចមួយខ្ញុំបានឈប់សម្រាក អង្គុយមើលព្រះអាទិត្យលិចនៅលើភ្នំ ទឹកភ្នែកខ្ញុំរលីងរលោង ហើយខ្សឹបខ្សួលប្រាប់ខ្លួនឯង ប្រហែលនេះជាមូលហេតុដែលខ្ញុំហ៊ានប្រថុយជីវិតធ្វើដំណើរមកកាន់ទីនេះ។ ទេសភាពទាំងអស់នេះនឹងឆ្លើយប្រាប់អ្នកទាំងអស់គ្នា»។
លោកបានរំឭកពេលធ្វើដំណើរកាត់យប់ថា៖ «វាជាប់យប់ដ៏រន្ធត់ ទាំងភ័យខ្លាច និងគួរឲ្យចងចាំ។ ជាយប់ដែលមានសំឡេងសត្វឆ្កែចចកពីចម្ងាយ និងមានសីតុណ្ហភាពត្រជាក់ដល់ទៅ -៣០អង្សាសេ (នៅពាក់កណ្តាលអាធ្រាត្រ)។ ខ្ញុំមានអារម្មណ៍ថាដូចជារស់ឡើងវិញម្តងទៀតអញ្ចឹង នៅពេលក្តីសង្ឃឹមរបស់ខ្ញុំទាបបំផុតនៅក្នុងយប់មួយនោះ»។
លោកបានជួបជនជាតិកៀហ្សីស្ថាន និងមានមិត្តភក្តិថ្មីៗជាច្រើនដែលពួកគេបានហាមឃាត់លោកពីការធ្វើដំណើរប្រថុយប្រថានជិះកង់ឡើងទៅលើភ្នំក្រោមអាកាសធាតុអាចធ្លាក់ចុះដល់ -៣០ ឬ -៤០អង្សាសេ។
លោកបានបន្ដថា៖ «ខ្ញុំជាអ្នកធ្វើដំណើរម្នាក់ដែលមានចិត្តមានៈខ្លាំងណាស់ គឺមិនងាយស្តាប់យោបល់គេនោះទេ ហើយតែងតែធ្វើអ្វីមួយដោយជឿលើខ្លួនឯង»។
ពេលវេលាមួយនោះមកដល់ ដែលលោកមិនអាចចាកចេញពីកំពូលភ្នំទាន់ពេល រហូតបង្ខំចិត្តបោះមូលដ្ឋានដេកនៅលើភ្នំមួយ ក្នុងសីតុណ្ហភាពជិត -២៥អង្សាសេដែលធ្វើឱ្យលោកស្ទើរកកស្លាប់នៅលើភ្នំមួយនោះ។
លោកបានបន្ថែមថា៖ «ប៉ុន្តែសំណាងល្អណាស់ ដោយសារខ្ញុំមានកាយសមប្បទានរឹងរាំ ហើយធន់ទ្រាន់ខ្លាំងណាស់ ទើបអាចបន្តទប់ទល់រហូតដល់ថ្ងៃរះ និងមានឈើងាប់ៗជាច្រើនដើម្បីឱ្យខ្ញុំដុតកម្តៅខ្លួនប្រាណឡើងវិញ»។
លោក តារារិទ្ធិ នៅមានឱកាសសរសេរចោទជាសំណួរថា៖ «តើអ្នកដឹងឬទេហេតុអ្វីទើបខ្ញុំហ៊ានប្រថុយប្រថាននឹងរឿងទាំងអស់នេះ? ពីព្រោះខ្ញុំតែងតែចង់យកឈ្នះលើភាពភ័យខ្លាចរបស់ខ្លួនឯង ដើម្បីឈប់ខ្លាចរឿងអ្វីមួយ អ្នកត្រូវតែធ្វើរឿងមួយនោះ។ សូមឱ្យសេចក្តីខិតខំប្រឹងប្រែងទាំងអស់នេះ អាចពាំនាំអត្ថប្រយោជន៍ទៅដល់កុមារកម្ពជាជាច្រើននៅក្នុងមន្ទីពេទ្យ»។
លោកបានបញ្ជាក់ថា បើទោះជាមានរឿងអ្វីកើតឡើងក៏ដោយ លោកនឹងបន្តដំណើរទៅមុខរហូត ពីព្រោះលោកធ្វើកិច្ចការងារមួយនេះដើម្បីកុមារកម្ពុជាជាច្រើននៅក្នុងមន្ទីពេទ្យ និងបុព្វហេតុកុមារដែលកំពុងមានជំងឺមហារីក។
លោក តារារិទ្ធិ បានបង្ហាញរូបថតមួយចំនួននៅក្នុងទីក្រុង Bishkek រដ្ឋធានីនៃប្រទេសកៀហ្ស៊ីស៊ីស្ថាន ភូមិភាគអាស៊ីកណ្តាល។ លោកត្រូវជិះកង់ទៅកាន់ទីក្រុង Osh ជាទីក្រុងធំទី ២ នៃភូមិភាគខាងត្បូងប្រទេស និងបន្តធ្វើដំណើរលើផ្លូវ Pamir Highway ឆ្លងដែនចូលទៅកាន់ប្រទេសតាជីគីស្ថាន តាមបណ្តោយព្រំដែនប្រទេសអាហ្វហ្កានីស្ថាន៕
