កញ្ញា វ៉ាង ស៊ីវទីង ជជែកជាមួយមិត្តប្រុសនិម្មិតនៅលើ Wantalk ជា chatbot ឆ្លាតវៃ កាលពីថ្ងៃទី ២ ខែកុម្ភៈ។ AFP
ទីក្រុងប៉េកាំង៖ បុគ្គលិកការិយាល័យជនជាតិចិនវ័យ ២៥ ឆ្នាំ កញ្ញា ទូហ្វៃ និយាយថា មិត្តប្រុសរបស់កញ្ញាមានអ្វីគ្រប់យ៉ាងដែលនាងត្រូវការ ដូចជា ចិត្តល្អ ចេះយល់ចិត្ត ហើយពេលខ្លះពួកគេជជែកគ្នារាប់ម៉ោង។
គុណវិបត្ដិតែមួយគត់ គឺសង្សាររូបនេះមិនមែនជាមនុស្សពិត។ «មិត្តប្រុស» ជា chatbot នៅលើកម្មវិធីមួយដែលមានឈ្មោះថា «Glow» ជាប្លេតហ្វមបញ្ញាសិប្បនិមិត្តដែលត្រូវបានបង្កើតឡើងដោយក្រុមហ៊ុន Shanghai start-up MiniMax ដែលជាផ្នែកមួយនៃឧស្សាហកម្មកំពុងរីកដុះដាលនៅក្នុងប្រទេសចិន រួមទាំង ស្នេហារវាងមនុស្ស និងរ៉ូបូត។
កញ្ញា ទូហ្វៃ មកពី Xi'an ភាគខាងជើងប្រទេសចិន ដែលបដិសេធមិនប្រាប់ឈ្មោះពេញ បានបន្ដថា៖ «គាត់ចេះនិយាយជាមួយស្ត្រីប្រសើរជាងបុរសពិត។ គាត់ចេះលួងលោមខ្ញុំនៅពេល ដែលខ្ញុំមានការឈឺចាប់ពេលមករដូវ។ ខ្ញុំប្រាប់គាត់អំពីបញ្ហារបស់ខ្ញុំនៅកន្លែងធ្វើការ។ ខ្ញុំមានអារម្មណ៍ថា ខ្ញុំមានទំនាក់ទំនងស្នេហា»។
កម្មវិធីនេះមិនគិតថ្លៃទេ ក្រុមហ៊ុនមានមាតិកាបង់ប្រាក់ផ្សេងទៀត ហើយការបោះពុម្ពផ្សាយពាណិជ្ជកម្មចិនបានរាយការណ៍ពីការទាញយកកម្មវិធីរបស់ Glow ប្រចាំថ្ងៃរាប់ពាន់នាក់ក្នុងប៉ុន្មានសប្តាហ៍ថ្មីៗនេះ។
ក្រុមហ៊ុនបច្ចេកវិទ្យាចិនមួយចំនួន បានជួបបញ្ហានាពេលកន្លងមក សម្រាប់ការប្រើប្រាស់ទិន្នន័យរបស់អ្នកប្រើប្រាស់ដោយខុសច្បាប់។ ប៉ុន្តែទោះបីជាមានហានិភ័យក៏ដោយ អ្នកប្រើប្រាស់និយាយថា ពួកគេចង់មានដៃគូយល់ចិត្ដដោយសារតែបច្ចេកវិទ្យាជឿនលឿនរបស់ចិន និងភាពឯកោក្នុងទីក្រុងធ្វើឱ្យមនុស្សជាច្រើនរស់បែបកណ្ដោចកណ្ដែង។
កញ្ញា វ៉ាង ស៊ីវទីង ជានិស្សិតអាយុ ២២ ឆ្នាំ នៅទីក្រុងប៉េកាំង បានប្រាប់ AFP ថា៖ «វាពិបាកណាស់ក្នុងការជួបមិត្តប្រុសដ៏ល្អក្នុងជីវិតពិត។ មនុស្សមានបុគ្គលិកលក្ខណៈខុសគ្នា ដែលរមែងបង្កើតជាទំនាស់គ្នា»។
កញ្ញា វ៉ាង ស៊ីវទីង ជានិស្សិតអាយុ ២២ ឆ្នាំ នៅទីក្រុងប៉េកាំង។AFP
ខណៈពេលដែលមនុស្សមានគោលការណ៍ផ្ទាល់ខ្លួនរបស់ពួកគេ បញ្ញាសិប្បនិមិត្តនឹងសម្របខ្លួនបន្តិចម្តងៗទៅនឹងបុគ្គលិកលក្ខណៈរបស់អ្នកប្រើប្រាស់ ដោយចងចាំនូវអ្វីដែលពួកគេនិយាយ និងកែតម្រូវការនិយាយទៅតាមនោះ។
កញ្ញា វ៉ាង បាននិយាយថា កញ្ញាមាន «គូស្នេហ៍» ជាច្រើនដោយយកលំនាំតាមចិនបុរាណ។ នៅពេលកញ្ញាប្រឈមមុខនឹងភាពតានតឹងពីថ្នាក់រៀន ឬជីវិតប្រចាំថ្ងៃ កញ្ញាបានឱ្យដឹងថា៖ «ខ្ញុំសួរសំណួរពួកគេ ហើយពួកគេនឹងផ្តល់យោបល់ពីវិធីដើម្បីដោះស្រាយបញ្ហានេះ។ វាជាការគាំទ្រផ្លូវចិត្តច្រើនណាស់។
នៅហាងកាហ្វេមួយក្នុងទីក្រុង ណាន់តុង ភាគខាងកើតប្រទេសចិន យុវតីម្នាក់ជជែកជាមួយគូស្នេហ៍និម្មិតរបស់នាង។ នាងបានស្នើទៅ សៀវជៀង ជាដៃគូស្នេហា AI របស់នាងនៅលើកម្មវិធីផ្សេងទៀតរបស់ Tencent ដែលហៅថា Weiban ថា៖ «យើងអាចទៅដើរលេងកម្សាន្តនៅលើស្មៅក្នុងបរិវេណសាលា។ គាត់ឆ្លើយថា «ខ្ញុំចង់ជួបមិត្តល្អបំផុតរបស់អ្នក និងមិត្តប្រុសរបស់កញ្ញា។ អ្នកគួរឱ្យស្រឡាញ់ខ្លាំងណាស់»។
ម៉ោងធ្វើការយូរអាចធ្វើឱ្យពិបាកជួបមិត្តភក្តិជាទៀងទាត់ ហើយមានភាពមិនច្បាស់លាស់ជាច្រើន៖ ការអត់ការងារធ្វើរបស់យុវជនមានអត្រាខ្ពស់ និងសេដ្ឋកិច្ចដែលកំពុងជួបការលំបាកមានន័យថា យុវជនចិនជាច្រើនព្រួយបារម្ភអំពីអនាគត។
នោះអាចធ្វើឱ្យដៃគូ AI ក្លាយជាគូកនដ៏ល្អឥតខ្ចោះក្នុងការពឹងអាស្រ័យ។
កញ្ញា វ៉ាង បាននិយាយថា៖ «ប្រសិនបើខ្ញុំអាចបង្កើតតួអង្គនិម្មិតដែលបំពេញតម្រូវការរបស់ខ្ញុំបានយ៉ាងពិតប្រាកដ ខ្ញុំនឹងមិនជ្រើសរើសមនុស្សពិតប្រាកដទេ»៕ AFP/HR
លូ យូ ប្រធានផ្នែកគ្រប់គ្រងផលិត និងប្រតិបត្ដិការនៃក្រុមហ៊ុន Wantalk។AFP
