ទិដ្ឋភាពអ័ព្ទខ្យល់ពុលគ្របដណ្ដប់ទីក្រុងបាងកកដែលអូសបន្លាយដល់ថ្ងៃសុក្រ។ AFP
ក្រុងបាងកក:បុគ្គលិកបម្រើការងារនៅទីក្រុងបាងកក ត្រូវបានជូនដំណឹងឱ្យធ្វើការពីផ្ទះ ដើម្បីជៀសវាងការបំពុលខ្យល់ដែលបង្កគ្រោះថ្នាក់ ខណៈស្រទាប់អ័ព្ទដ៏អាក្រក់បានគ្របដណ្តប់រាជធានីថៃកាលពីថ្ងៃព្រហស្បតិ៍។
អាជ្ញាធរក្រុងបានស្នើសុំកិច្ចសហប្រតិបត្តិការពីនិយោជកដើម្បីជួយនយោជិកនៅក្នុងទីក្រុងដែលមានប្រជាជនប្រមាណ ១១ លាននាក់ជៀសវាងការបំពុល ដែលត្រូវបានគេរំពឹងថានឹងអូសបន្លាយរហូតដល់ថ្ងៃសុក្រ។
គេហទំព័រត្រួតពិនិត្យខ្យល់ IQAir បានដាក់ចំណាត់ថ្នាក់ទីក្រុងបាងកក ក្នុងចំណោមទីក្រុងទាំង ១០ ដែលមានការបំពុលខ្លាំងបំផុតនៅលើពិភពលោកកាលពីព្រឹកថ្ងៃព្រហស្បតិ៍។
យោងតាម IQAir បានឱ្យដឹងថា កម្រិតនៃភាគល្អិត PM2.5 ដ៏គ្រោះថ្នាក់បំផុត ដែលពួកវាអាចចូលទៅក្នុងចរន្តឈាម គឺមានច្រើនជាង ១៥ ដងនៃការណែនាំប្រចាំឆ្នាំរបស់អង្គការសុខភាពពិភពលោក។
អភិបាលក្រុងបាងកក លោក ChadchartSittipuntបាននិយាយកាលពីល្ងាចថ្ងៃពុធថា បុគ្គលិកទីក្រុងទាំងអស់នឹងធ្វើការពីផ្ទះនៅថ្ងៃព្រហស្បតិ៍ និងថ្ងៃសុក្រ។
លោកបាននិយាយនៅក្នុងសេចក្តីថ្លែងការណ៍មួយថា៖«ខ្ញុំចង់ស្នើសុំកិច្ចសហប្រតិបត្តិការពីបណ្តាញ BMA (អក្សរកាត់សម្រាប់រដ្ឋបាលក្រុងបាងកក)នៃក្រុមហ៊ុន និងអង្គការប្រហែល ១៥១ ទាំងការិយាល័យរដ្ឋាភិបាល និងវិស័យឯកជនដោយមនុស្សជាង ៦ម៉ឺននាក់បានរងផលប៉ះពាល់»។
លោក Chadchartបាននិយាយថា យ៉ាងហោចណាស់សង្កាត់ចំនួន ២០ នៃសង្កាត់ចំនួន ៥០ របស់ទីក្រុងបាងកក ត្រូវបានគេរំពឹងថានឹងមានកម្រិតនៃភាគល្អិត PM2.5 ដែលមិនល្អសម្រាប់សុខភាព ហើយបញ្ហានេះ នឹងបន្តកើតមានដោយសារតែអាកាសធាតុស្ងប់ស្ងាត់។
គុណភាពខ្យល់នៅក្នុងប្រទេសថៃធ្លាក់ចុះជាប្រចាំនៅដើមឆ្នាំ ដោយសារផ្សែងពីកសិករដែលកំពុងឆេះចំបើងនៅក្នុងវាលស្រែបន្ថែមការបំភាយឧស្ម័នឧស្សាហកម្ម និងផ្សែងរថយន្ត។
បាងកក និងទីក្រុងឈៀងម៉ៃ ភាគខាងជើងជាប់ចំណាត់ថ្នាក់ក្នុងចំណោមទីក្រុងដែលបំពុលខ្លាំងបំផុតក្នុងពិភពលោកក្នុងរយៈពេលប៉ុន្មានថ្ងៃកាលពីឆ្នាំមុន។
វិបត្តិសុខភាពសាធារណៈកំពុងផ្ទុះឡើងជុំវិញបញ្ហានេះ ដោយមានមនុស្សយ៉ាងហោចណាស់ពីរលាននាក់ នៅក្នុងប្រទេសថៃត្រូវការការព្យាបាលវេជ្ជសាស្ត្រដោយសារតែការបំពុលនៅឆ្នាំ ២០២៣។
រដ្ឋាភិបាលរបស់លោកស្រី SretthaThavisin ដែលបានចូលកាន់តំណែងកាលពីខែសីហា បានសន្យាថានឹងធ្វើឱ្យការដោះស្រាយការបំពុលបរិយាកាសជា «របៀបវារៈជាតិ» ហើយសេចក្តីព្រាងច្បាប់ខ្យល់ស្អាតត្រូវបានអនុម័តដោយគណៈរដ្ឋមន្ត្រីរបស់លោកកាលពីខែមុន។
ប៉ុន្តែបញ្ហានៅតែបន្តកើតមាន ហើយតុលាការនៅឈៀងម៉ៃកាលពីខែមុនបានបញ្ជាឱ្យរដ្ឋាភិបាលបង្កើតផែនការបន្ទាន់មួយដើម្បីដោះស្រាយការបំពុលបរិយាកាសត្រឹមរយៈពេល ៩០ ថ្ងៃ៕ AFP/HR
AFP
