កងទ័ពជើងទឹកកូឡុំប៊ី បានសង្គ្រោះជនជាតិប៉ាណាម៉ា ៣នាក់ ដែលបានជាប់លើមហាសមុទ្រប៉ាស៊ីហ្វិក ១១ថ្ងៃ។ AFP
ក្រុងបូហ្គោតាៈ កងទ័ពជើងទឹកកូឡុំប៊ី បាននិយាយ កាលពីថ្ងៃសុក្រ ថា ពួកគេបានជួយសង្គ្រោះជនជាតិប៉ាណាម៉ា ៣ នាក់ ដែលបានរសាត់អណ្ដែតក្នុងមហាសមុទ្រប៉ាស៊ីហ្វិក អស់រយៈពេល ១១ ថ្ងៃ បានរួចរស់រានមានជីវិតដោយសារការផឹកទឹកភ្លៀង និងបរិភោគដូង ដែលអណ្តែតលើផ្ទៃទឹក។
អ្នកទាំងបីបានធ្វើដំណើរប្រហែល ៦០០ គីឡូម៉ែត្រ តាមទម្លាប់ចេញពីតំបន់វើរ៉ាគ្រូស (Veracruz) ដែលមានចម្ងាយប្រហែល ២៥ គីឡូម៉ែត្រនៅខាងក្រៅទីក្រុងប៉ាណាម៉ាដើម្បីចាក់ប្រេងទូកនេសាទ។
លោក Blas Olivardia អាយុ ៣០ ឆ្នាំ បាននិយាយនៅក្នុងវីដេអូមួយ ដែលបានចេញផ្សាយ ទៅកាន់ប្រព័ន្ធផ្សព្វផ្សាយថា៖ «យើងបានចាក់ប្រេងនៅម៉ោង ៥-៦ ល្ងាច ហើយបន្ទាប់មកនៅពេលដែលមនុស្សគ្រប់គ្នាបានចេញទូកទៅឆ្ងាយរៀងៗខ្លួន ម៉ាស៊ីនរបស់យើងបានជាប់គាំង»។
លោកបានបន្ថែមថា៖ ចាប់ពីពេលនោះមក ការធ្វើដំណើររបស់យើងអាស្រ័យលើខ្យល់បើកពីទិសខាងជើង។ យើងចំណាយពេល ១១ ថ្ងៃ»។
ដោយគ្មានស្បៀងផ្គត់ផ្គង់ ពួកគេបានរស់រានមានជីវិត ដោយយកទឹកភ្លៀង និងដូងអណ្ដែតតាមទឹកមកបំពេញក្រពះ។
លោក Rey Arturo Torres អាយុ ២៧ ឆ្នាំ ដែលត្រូវបានជាប់គាំងនៅលើទូកជាមួយ Jose Olivardia អាយុ ២១ឆ្នាំបាននិយាយថាល «ផ្លែដូងបានអណ្ដែតតាមចរន្តទឹក ហើយយើងបានចាប់វា បំបែកយកមកហូបជាអាហារ»។
ការល្បាតរបស់កងទ័ពជើងទឹកកូឡុំប៊ី បានប្រទះឃើញទូកដែលអណ្តែតជាមួយនឹងមនុស្សនៅលើទូក ដែលមានចម្ងាយប្រហែល ២៩០ គីឡូម៉ែត្រ ពីកំពង់ផែ Buenaventura របស់ប្រទេសកូឡុំប៊ី។
គ្រូពេទ្យពិនិត្យសុខភាពបុរស ដែលទើបរស់រានមានជីវិតពីការអណ្ដែតលើសមុទ្រ។AFP
ដោយ មេបញ្ជាការកងទ័ពជើងទឹកកូឡុំប៊ី លោក Juan David Rendon បានប្រាប់ AFP ថា បុរសទាំង ៣ នាក់ ស្ថិតក្នុងស្ថានភាពប្រក្រតី បើទោះជាពួកគេអណ្តែតលើសមុទ្រ ១១ ថ្ងៃក៏ដោយ។
នៅក្នុងរូបភាពដែលចេញដោយកងទ័ពជើងទឹក គេឃើញបុរសទាំងបីនាក់កំពុងឈរក្បែរទូកមួយ។ ម្នាក់ជើងទទេ ម្នាក់ទៀតមានតែស្រោមជើង ហើយម្នាក់ទៀតពាក់ស្បែកជើងស៊ក។
ជនជាតិប៉ាណាម៉ាបានរំឭកគុណបុណ្យដល់ផ្លែដូងសំណាង ដែលជួយឱ្យមនុស្សបន្តជីវិតលើមហាសមុទ្រ។ គួររំឭកផងដែរថា កាលពីខែមករា ឆ្នាំ ២០២៣ កងទ័ពជើងទឹកកូឡុំប៊ី ក៏បានជួយសង្គ្រោះបុរសម្នាក់ពីកោះការ៉ាបៀន នៃប្រទេសសាធារណរដ្ឋដូមីនិក ដែលបរិភោគតែទឹកប៉េងប៉ោះ ឱ្យបានរួចរស់រានមានជីវិតពីការជិះទូកក្ដោងរសាត់អណ្តែតលើមហាសមុទ្ររយៈពេល ២៤ ថ្ងៃ៕ AFP
កងទ័ពជើងទឹកកូឡុំប៊ី បានសង្គ្រោះជនជាតិប៉ាណាម៉ា ៣ នាក់ ដែលបានជាប់លើមហាសមុទ្រប៉ាស៊ីហ្វិក ១១ថ្ងៃ។AFP
