ស្តេច Charles និងម្ចាស់ក្សត្រី Camilla យាងចេញពី Clarence House ទីក្រុងឡុងដ៍កាលពីថ្ងៃទី ៦ ខែកុម្ភៈ។ AFP
ក្រុងឡុងដ៍: ស្តេច Charles កំពុងប្រឈមមុខនឹងព្រះរាជសុខភាពមួយផ្សេងទៀត។ បន្ទាប់ពីឆ្លងកាត់ការព្យាបាលក្រពេញប្រូស្តាតរីកធំកាលពីខែមុនវិមាន Buckingham បានលាតត្រដាងកាលពីថ្ងៃចន្ទថា ព្រះមហាក្សត្រព្រះជន្ម ៧៥ វស្សា មានជំងឺមហារីក។
ព្រះបរមរាជវាំងបានឱ្យនៅក្នុងសេចក្តីថ្លែងការណ៍មួយថា៖«ក្នុងអំឡុងពេលព្យាបាលព្រះរាជសុខភាពនៅមន្ទីរពេទ្យថ្មីៗនេះចំពោះបញ្ហាក្រពេញប្រូស្តាតក្តីបារម្ភថ្មីមួយ ស្រាប់តែផុសឡើង។ ការធ្វើតេស្តព្រះរោគវិនិច្ឆ័យជាបន្តបន្ទាប់បានកំណត់ទម្រង់នៃជំងឺមហារីក»។
ព្រះបរមរាជវាំងបានបន្ដថា៖ «ថ្ងៃនេះព្រះមហាក្សត្របានចាប់ផ្តើមទទួលការព្យាបាលជាប្រចាំក្នុងអំឡុងពេលនោះទ្រង់ត្រូវបានគ្រូពេទ្យណែនាំឱ្យផ្អាកព្រះរាជសាវនាការសិន។ពេញមួយរយៈពេលនេះព្រះអង្គនឹងបន្តព្រះរាជកិច្ចការរដ្ឋនិងការងារផ្លូវការជាធម្មតា»។
ប្រភពពីព្រះបរមរាជវាំង បានបន្ថែមថា៖ «ព្រះមហាក្សត្រទ្រង់បានជ្រើសរើសចែករំលែកព័ត៌មាន ព្រះរាជអាការរោគវិនិច្ឆ័យរបស់ទ្រង់ដើម្បីមន្ទិលសង្ស័យនិងដោយសង្ឃឹមថាវាអាចជាចំណេះដឹងសាធារណៈសម្រាប់អ្នកទាំងអស់នៅជុំវិញពិភពលោកដែលរងផលប៉ះពាល់ដោយជំងឺមហារីក»។
ប្រជាជនយល់ថាស្តេច Charles មានព្រះរាជបន្ទូលប្រាប់បុត្រាទាំងពីរអង្គព្រះអង្គម្ចាស់ William និងព្រះអង្គម្ចាស់ Harry អំពីជំងឺមហារីករបស់ទ្រង់។ ប្រភពមួយនិយាយថាព្រះអង្គម្ចាស់ William ព្រះជន្ម ៤១ ព្រះវិស្សា បន្ដមានទំនាក់ទំនងជាព្រះរាជបិតា ខណៈពេល ដែលព្រះអង្គម្ចាស់ Harry ព្រះជន្ម ៣៩ ព្រះវស្សា ដែលបានផ្លាស់ទៅរដ្ឋកាលីហ្វ័រនីញ៉ា ជាមួយនឹងមហេសី Meghan Markle ក្នុងឆ្នាំ២០២០ ត្រូវបានរំពឹងថា នឹងធ្វើដំណើរទៅចក្រភពអង់គ្លេស ក្នុងរយៈពេលប៉ុន្មានថ្ងៃខាងមុខនេះ។
ព្រះមហាក្សត្រក៏បានជូនដំណឹងដោយផ្ទាល់ទៅកាន់ព្រះរាជវង្សានុវង្ស គឺម្ចាស់ក្សត្រី Anne ព្រះអង្គម្ចាស់ Andrew និងព្រះអង្គម្ចាស់ Edward មុនពេលព័ត៌មាននេះ ត្រូវបានផ្សព្វផ្សាយជាសាធារណៈ។
ស្តេច Charles ត្រូវបានគេឃើញជាមួយម្ចាស់ក្សត្រី Camilla ចូលរួមព្រះវិហារកាលពីថ្ងៃអាទិត្យនៅវិហារ St. Mary Magdalene ក្បែរ Sandringham ជាកន្លែងដែលរាជវង្សចូលរួមពិធីដ៏ធំមួយ នៅថ្ងៃបុណ្យណូអែល។ វាជាការបង្ហាញព្រះភក្ដ្រលើកដំបូងរបស់ព្រះមហាក្សត្រ ចាប់តាំងពីបានយាងចេញពីមន្ទីរពេទ្យកាលពីថ្ងៃទី២៩ខែមករា បន្ទាប់ពីការស្នាក់នៅរយៈពេលបីថ្ងៃបន្ទាប់ពីការវះកាត់ក្រពេញប្រូស្តាតរបស់ព្រះអង្គ។
ស្តេច Charles បានត្រឡប់មកទីក្រុងឡុងដ៍ពី Sandringham កាលពីថ្ងៃចន្ទដើម្បីចាប់ផ្តើមការព្យាបាល។ ព្រះអង្គម្ចាស់ William នឹងត្រឡប់មកបំពេញព្រះរាជកាតព្វកិច្ចសាធារណៈក្នុងសប្តាហ៍នេះ។
ព្រះអង្គម្ចាស់នៃប្រទេស Wales និងជាព្រះទាយាទព្រះជន្ម ៤១ ព្រះវស្សា បានបង្ហើយព្រះរាជកិច្ចរបស់ព្រះអង្គ ខណៈដែលព្រះមហេសី Kate Middleton បានធ្វើការវះកាត់ពោះកាលពីថ្ងៃទី១៦ ខែមករា៕AFP/HR
