![](https://pppkhmer.sgp1.digitaloceanspaces.com/image/main/20245/9_5_2024_dance_with_me_exibition.jpg)
ការតាំងពិព័រណ៍បណ្ណសាររូបថតនៃរបាំបុរាណ និងប្រជាប្រិយខ្មែរ។ រូបថត សហការី
ភ្នំពេញ៖ វិទ្យាស្ថានបារាំងនៅកម្ពុជាត្រៀមប្រារព្ធពិធីសិល្បៈរបាំជាមួយរដូវកាលវប្បធម៌របស់ខ្លួន «រាំជាមួយខ្ញុំ» ដែលនឹងចាប់ផ្តើមពីថ្ងៃទី ៩ ខែឧសភា ដល់ថ្ងៃទី ២៦ ខែមិថុនា។
នៅមុនពេលនៃព្រឹត្តិការណ៍កីឡាអូឡាំពិក និងប៉ារ៉ាអូឡាំពិកនៅទីក្រុងប៉ារីស ការរាំបែបកីឡានឹងត្រូវអញ្ជើញជាកិត្តិយសជាលើកដំបូង៖ ការរាំ Break Dance នឹងក្លាយជាវិញ្ញាសាអូឡាំពិកមួយក្នុងចំណោមវិញ្ញាសាអូឡាំពិកនានាក្នុងឆ្នាំ២០២៤។
វិទ្យាស្ថានបារាំងនៅកម្ពុជា នឹងប្រារព្ធការប្រកួតកីឡាអូឡាំពិក ជាមួយនឹងការប្រកួតការរាំ Break Dance នៅថ្ងៃទី៣១ ខែឧសភា និងថ្ងៃទី១ ខែមិថុនា ជាមួយនឹងវង្វាន់ជាការធ្វើដំណើររយៈពេល ១០ ថ្ងៃទៅកាន់ទីក្រុងប៉ារីស សម្រាប់ការជួបជុំបែបរបាំវប្បធម៌ តាមរយៈកម្មវិធីបោះជំរុំនៅមជ្ឈមណ្ឌលជាតិដើម្បីរបាំ។
បើតាមវិទ្យាស្ថានបារាំងនៅកម្ពុជា បានឲ្យដឹងថា៖ «ការប្រកួតនេះបើកឱ្យចុះឈ្មោះចូលរួមដោយឥតគិតថ្លៃ លើការចុះឈ្មោះសម្រាប់ B-Boys និង ក្រុម B-Girls ជាជនជាតិខ្មែរ មានអាយុលើសពី ១៨ ឆ្នាំ ឬ អ្នកដែលស្នាក់នៅក្នុងប្រទេសកម្ពុជាចាប់ពី ៥ ឆ្នាំឡើងទៅ»។
ក្រុមរាំដែលចូលរួមប្រកួតប្រជែងនឹងត្រូវឆ្លងកាត់ជាច្រើនដំណាក់កាល ដោយម្ចាស់ជ័យលាភីកំពូលទាំងបីនឹងទទួលបានរង្វាន់។ អ្នកឈ្នះរង្វាន់ធំនឹងទទួលបានការធ្វើដំណើររយៈពេល ១០ ថ្ងៃទៅកាន់ទីក្រុងប៉ារីសឆ្នាំ ២០២៤។ នេះរួមបញ្ចូលទាំងការហោះហើរទៅមក ការស្នាក់នៅសណ្ឋាគាររយៈពេលប្រាំបួនយប់ និងការចូលរួមក្នុងសិក្ខាសាលារាំនៅមជ្ឈមណ្ឌលជាតិដើម្បីរបាំ។
![](https://pppkhmer.sgp1.cdn.digitaloceanspaces.com/image/main/20245/9_5_2024_tiny_toones_cambodia_volunteers_and_participants_perform_an_open_show_in_phnom_penh_facebook.jpg)
ក្រុមរាំ Break Dance របស់ក្រុម Tiny Toones Cambodia នៅរាជធានីភ្នំពេញនាពេលកន្លងមក។ Facebook
លើសពីនេះ អ្នកឈ្នះនឹងទៅទស្សនាកន្លែងវប្បធម៌នានា នៃទីក្រុងប៉ារីសដែលផ្សារភ្ជាប់នឹងរបាំ (Opéra de Paris, Cent Quatre et CND។
លោក Valentin Rodriguez នាយក IFC និង Cultural Attaché បានប្រាប់ភ្នំពេញប៉ុស្ដិ៍ថា៖ «Breakdancing នឹងក្លាយជាកីឡារាំដំបូងគេដែលមិនធ្លាប់មានក្នុងការប្រកួតកីឡាអូឡាំពិក។ យើងបានគិតថា គ្មានវិធីល្អក្នុងការអបអរសិល្បៈក្បាច់រាំត្រូវបានដាក់បញ្ចូលជាលើកដំបូងនេះជាងការរៀបចំការប្រកួតដែលអ្នករាំល្អបំផុតនឹងមានឱកាសទៅលេងទីក្រុងប៉ារីសនោះទេ»។
លោក Rodriguez បាននិយាយថា៖ «ពួកគេក៏នឹងទៅទស្សនាកន្លែងវប្បធម៌នានាដ៏ល្បីល្បាញជាច្រើនសតវត្សរ៍»។
ក្រុមទទួលបានរង្វាន់ទី ២ និងទី ៣ នឹងមិនទៅផ្ទះដោយដៃទទេទេ ដោយទទួលបានកាដូជាច្រើនដែលទាក់ទងនឹងការរាំ និងប័ណ្ណទិញទំនិញ។
វិទ្យាស្ថានបារាំង បានឱ្យដឹងថា៖ «រដូវកាលនេះមិនមែនគ្រាន់តែជាការប្រកួតប៉ុណ្ណោះទេ ប៉ុន្តែក៏មានការប្រារព្ធពិធីអបអរ និងការអប់រំផងដែរ។ វាចាប់ផ្តើមជាមួយនឹងការតាំងពិព័រណ៍ដែលឧទ្ទិសដល់ប្រវត្តិនៃរបាំនៅក្នុងប្រទេសកម្ពុជា ការរួបផ្សំគ្នារវាងគំនូរ រូបថត និងបំណែកបុរាណវិទ្យានៃកាយវិការរបាំ»។
ដោយសារកំណាយបុរាណវិទ្យា និងបណ្ណសាររបស់សាលាបារាំងចុងបូព៌ា ការតាំងពិព័រណ៍នេះនឹងបង្ហាញបណ្ណសាររូបថតនៃរបាំបុរាណ និងប្រជាប្រិយខ្មែរ។
![](https://pppkhmer.sgp1.cdn.digitaloceanspaces.com/image/main/20245/9_5_2024_dance_with_me_exibition1.jpg)
ការតាំងពិព័រណ៍បណ្ណសាររូបថតនៃរបាំបុរាណ និងប្រជាប្រិយខ្មែរ។ រូបថត សហការី
ស្នាដៃរបស់លោក រ៉ូម៉ាំង ប៊ែនីនី បង្កប់នូវអត្ថន័យព្រលឹងក្បាច់រាំ ជាមួយនឹងកាយវិការដ៏ប្រណិតរបស់អ្នករបាំ។ របាំជាបេតិកភណ្ឌអរូបី លេចឡើង និងបាត់ទៅវិញក្នុងពេលដ៏ខ្លីនៃពេលនេះ នៅចន្លោះពេលទៀងទាត់ ឬមិនទៀងទាត់។ គ្រាដ៏កម្រនឹងបង្ហាញដោយមិនអាចពិពណ៌នាបាន។
រដូវកាលនេះនឹងមានភាពចម្រុះ ដោយមានការសម្តែងរបាំបុរាណរបស់សាលាសម្ដេចរាជបុត្រី ព្រះរៀម នរោត្តម បុប្ផាទេវី របាំប្រជាប្រិយខ្មែរ ដូចជា របាំគោះត្រឡោក របាំចាក់គ្រើល របាំត្រុដិ និងរបាំទន្សោងគោព្រៃ។
![](https://pppkhmer.sgp1.cdn.digitaloceanspaces.com/image/main/20245/9_5_2024_dance_with_me_exibition2.jpg)
ការតាំងពិព័រណ៍បណ្ណសាររូបថតនៃរបាំបុរាណ និងប្រជាប្រិយខ្មែរ។ រូបថត សហការី
លោក Rodriguez បានឱ្យដឹងថា៖ «មិនថាកីឡា ពិធីសាសនា ប្រពៃណី ឬទម្រង់ថ្មីនៃការបញ្ចេញមតិ ការរាំគឺជាបេះដូងនៃការអនុវត្តវប្បធម៌ខ្មែរជាច្រើន»។
ក្រុមរាំដែលមានបំណងចូលរួមប្រកួតត្រូវបានលើកទឹកចិត្តឱ្យចុះឈ្មោះមុនថ្ងៃទី ១៥ ខែឧសភា ដើម្បីទទួលបានកន្លែងរបស់ពួកគេនៅក្នុងការប្រកួតប្រជែងដែលរៀបចំឡើងដោយវិទ្យាស្ថានបារាំងនៅកម្ពុជានេះ។
គួរបញ្ជាក់ថាពិព័រណ៍បណ្ណសាររូបថតនៃរបាំបុរាណនិងប្រជាប្រិយខ្មែរចាប់ផ្ដើមបើកនាល្ងាចនេះ រួមជាមួយ ការសម្ដែងល្ខោនអូប៉េរ៉ាងផងដែរ។
![](https://pppkhmer.sgp1.cdn.digitaloceanspaces.com/image/main/20245/9_5_2024_dance_with_me_exibition3.jpg)
ការតាំងពិព័រណ៍បណ្ណសាររូបថតនៃរបាំបុរាណ និងប្រជាប្រិយខ្មែរ។ រូបថត សហការី