![](https://pppkhmer.sgp1.digitaloceanspaces.com/image/main/20247/26_7_2024_transforming_faces_changing_lives_nob_dane_s_journey_in_special_effects_makeup1.jpg)
កញ្ញា ណុប ដាណេ បានប្រែក្រឡាខ្លួនតារាចម្រៀង ទេព បូព្រឹក្ស ទៅជាតួអង្គក្បាលត្រងោលដ៏ចម្លែកសម្រាប់ការគម្រោងថតរូបចុងក្រោយបំផុត។ រូបថត សហការី
ភ្នំពេញ៖ ក្នុងការបង្ហាញពីជំនាញគួរឱ្យភ្ញាក់ផ្អើល កញ្ញា ណុប ដាណេ បានប្រែក្រឡាខ្លួនតារាចម្រៀង ទេព បូព្រឹក្ស ទៅជាតួអង្គក្បាលត្រងោលដ៏ចម្លែកសម្រាប់ការគម្រោងថតរូបចុងក្រោយបំផុត។
ការតុបតែងនេះមិនគ្រាន់តែជាការបញ្ជាក់អំពីទេពកោសល្យរបស់ ដាណេ ប៉ុណ្ណោះទេ ប៉ុន្តែក៏ជាកិច្ចការសំខាន់មួយនៅក្នុងដំណើរលើកស្ទួយឧស្សាហកម្មភាពយន្តកម្ពុជាផងដែរ។
កញ្ញា ដាណេ អ្នកជំនាញផាត់មុខអាជីពដែលបើកហាងសម្អាងការផ្ទាល់ខ្លួន បាននិយាយថា៖ «ខ្ញុំចាប់អារម្មណ៍រៀនជំនាញផាត់មុខបែបប្រឌិតក្នុងភាពយន្ដ ឬ Special Effects នៅពេលអ្នកជំនាញផាត់មុខអាជីពនៅក្រុងឡូសអេនជឺលេស បាននាំយកជំនាញនេះមកបង្ហាត់សិស្សនៅកម្ពុជា»។
ឥទ្ធិពលអ្នកជំនាញតុបតែងកាយខ្មែរមកពីអាមេរិក
នៅពីក្រោយភាពជោគជ័យរបស់កញ្ញា ដាណេ គឺជាស្នាដៃរបស់សិល្បករខ្មែររស់នៅក្រុងឡូសអេនជឺលេស អ្នកនាង ឌូ ពុតម៉ូលីកា ឬ Apple Love។ អ្នកស្រីជាអ្នកផាត់មុខជាតួអង្គប្លែកៗដែលទទួលបានជោគជ័យយ៉ាងខ្លាំងនៅហូលីវូដ។
កើតនៅខេត្តស្ទឹងត្រែង Apple Love បានរកឃើញចំណង់ចំណូលចិត្តក្នុងការផាត់មុខអំឡុងពេលរៀននៅមហាវិទ្យាល័យ ហើយបានបន្តវាបើទោះបីជាមិនសូវទទួលបានការគាំទ្រពីក្រុមគ្រួសារក៏ដោយ។
ដំបូងឡើយ Apple Love ត្រូវបានទទួលស្គាល់សម្រាប់ការងារលើគម្រោងភាពយន្តក្នុងស្រុក ហើយនៅទីបំផុតបានទទួលអាហារូបករណ៍ទៅសិក្សាផ្នែកតុបតែងមុខបែបភាពយន្ដនៅសាលា Cinema Makeup School ក្នុងសហរដ្ឋអាមេរិក។
ចាប់តាំងពីពេលនោះមក Apple Love បានធ្វើការលើគម្រោងភាពយន្ត និងទូរទស្សន៍ជាច្រើន រួមទាំងកិច្ចសហការគួរឱ្យកត់សម្គាល់ជាមួយតារាល្បី ៗ ដូចជា Kim Kardashian និង Angelina Jolie ។
Apple Love បានប្រាប់ភ្នំពេញប៉ុស្ដិ៍កាលពីឆ្នាំ២០២២ ថា៖ «ខ្ញុំបានតុបតែងខ្លួនឱ្យគាត់ [Kardashian] និងកូនៗរបស់គាត់។ ខ្ញុំត្រូវប្រុងប្រយ័ត្នក្នុងការរៀបចំសក់របស់កូនស្រីគាត់ ឈ្មោះ North West»។
ការងាររបស់អ្នកស្រីបានបង្ហាញស្នាដៃជាច្រើននៅទូទាំងទ្វីបអាស៊ី ហើយនៅឆ្នាំ ២០២៦ អ្នកស្រីបានធ្វើការលើខ្សែភាពយន្ត «មុនដំបូង ពួកគេសម្លាប់ប៉ារបស់ខ្ញុំ» របស់ Angelina Jolie ដែលជាប់ក្នុងបញ្ជីសម្រាំងក្នុងការដណ្ដើមពានរង្វាន់ Golden Globe។
អ្នកស្រី Apple Love ត្រូវបានស្គាល់ជាពិសេសសម្រាប់ការតុបតែងមុខបែបប្រឌិតពិសេស ដែលរួមបញ្ចូលទាំងការប្រែក្លាយតួសម្តែងឱ្យទៅជាសត្វចម្លែកសម្រាប់ផលិតកម្មភាពយន្ដផ្សេងៗ។
Apple Love ប្តេជ្ញាចែករំលែកជំនាញ និងចំណេះដឹងរបស់ខ្លួនជាមួយសិល្បករតុបតែងមុខបែបប្លែកៗនេះដល់ប្រជាជនកម្ពុជា ហើយសង្ឃឹមថានឹងរួមចំណែកដល់ការអភិវឌ្ឍន៍ឧស្សាហកម្មភាពយន្តក្នុងស្រុក ដោយផ្តល់ជូននូវថ្នាក់រៀនពិសេស និងសិក្ខាសាលាបណ្តុះបណ្តាល។
ណុប ដាណេ លើវិថីសិល្បៈភាពយន្ដ
ដោយបានបំផុសគំនិតដោយដំណើររបស់ Apple Love និងការលះបង់ចំពោះវិថីសិល្បៈនេះ កញ្ញា ដាណេ បានឃើញឱកាសសិក្សា និងចាប់ផ្ដើមអាជីពជាអ្នកតុបតែងមុខបែបប្លែកៗ។
![](https://pppkhmer.sgp1.cdn.digitaloceanspaces.com/image/main/20247/26_7_2024_nob_dane.jpg)
នៅអាយុ ៣៨ ឆ្នាំ កញ្ញា ដាណេ មានអាជីពជោគជ័យជាអ្នកតុបតែងមុខជំនាញរួចហើយ ប៉ុន្តែមានបំណងចង់ពង្រីកជំនាញទៅក្នុងវិស័យតុបតែងបែបភាពយន្ដ។
កញ្ញាបាននិយាយថា៖ «ខ្ញុំចាប់អារម្មណ៍ជំនាញផាត់មុខបែបអាក្រក់ៗនេះ ដោយសារតែខ្ញុំមានជំនាញជាអ្នកផាត់មុខសម្អាងកាយស្រាប់ ហើយសំខាន់បំផុត វាជាក្ដីស្រឡាញ់ចេញពីបេះដូងពិតៗរបស់ខ្ញុំ»។
កញ្ញាជឿជាក់ថា ឧស្សាហកម្មភាពយន្តកម្ពុជាមានសក្ដានុពលក្នុងការរីកចម្រើនដោយពង្រឹងលើសិល្បៈតុបតែងតួអង្គបែបប្រឌិតដ៏ទាក់ទាញបន្ថែមទៀត។
កញ្ញាបានឱ្យដឹងថា កញ្ញាចង់ឱ្យវិស័យភាពយន្ដនៅក្នុងស្រុកមានធនធានផ្នែកតុបតែងតួអង្គប្លែកៗលើសពីភាពស្រស់ស្អាត។ ថ្វីដ្បិតតែប្រកបអាជីពជាអ្នកសម្អាងកាយជាប្រចាំយ៉ាងណាក៏ដោយ ក៏កញ្ញា ដាណេ បានត្រៀមខ្លួនជាស្រេចក្នុងការបង្ហាញស្នាដៃតុបតែងមុខបែបភាពយន្ដនេះ ពេលមានតម្រូវការ។
កញ្ញាទទួលស្គាល់ថា ការតុបតែងបែបអាក្រក់ បែបប្រឌិតមានការលំបាកម្យ៉ាងម្នាក់ពីការតុបតែងមុខស្អាតៗ។ ប៉ុន្ដែអ្វីដែលធ្វើឱ្យអ្នកស្រឡាញ់ជំនាញផាត់មុខប្លែកៗនេះយល់ថាលំបាកបំផុតនាពេលបច្ចុប្បន្ន គឺសម្ភារសម្រាប់តុបតែង។
កញ្ញា ដាណេ បានប្រាប់ភ្នំពេញប៉ុស្ដិ៍ថា៖ «ការតុបតែងបែប special effect ទាក់ទងនឹងរបួសស្នាម បិតសក់ វាទាមទារការប្រើប្រាស់សម្ភារមានគុណភាព ដែលមិនប៉ះពាល់ដល់ស្បែក។ សម្ភារទាំងនេះមិនលក់នៅក្នុងស្រុកយើងនោះទេ។ សូម្បីតែនៅអាមេរិក សម្ភារសម្រាប់ថតកុនក៏មានតិចតួចផងដែរ»។
យ៉ាងណាមិញ កញ្ញាមិនមែនរៀនជំហាននេះដើម្បីតម្រូវការទីផ្សារនោះទេ ដោយសារនៅកម្ពុជាហាក់មិនទាន់មានការចាប់អារម្មណ៍លើជំនាញតុបតែងមុខប្លែកៗនេះ ឬផ្ដល់តម្លៃឱ្យការងារនេះពេញលេញនៅឡើយទេ។
កញ្ញាបានរំឭកថា ធ្លាប់មានខាងផលិតកម្មភាពយន្ដទាក់ទងឱ្យតុបតែងក្បាលត្រងោលដល់តួសម្ដែង ហើយការងារនេះត្រូវបានបញ្ចប់ទៅវិញនៅពេលខាងផលិតកម្មមិនអាចផ្ដល់ការចំណាយលើការតុបតែងនេះ ដោយសារវាមានតម្លៃថ្លៃ។
កញ្ញា ដាណេ បានពន្យល់ថា៖ «តម្លៃដើមនៃសម្ភារគឺជារឿងមួយ ហើយមួយទៀត ការចំណាយពេលលើការបិតក្បាលត្រងោលឱ្យថែមទៀត។ បើស្ថិតក្នុងបន្ទប់ម៉ាស៊ីនត្រជាក់ ការបិតចំណាយប្រមាណជាងមួយម៉ោង ហើយបើបិតនៅបរិយាកាសខាងក្រៅ គឺនៅកន្លែងថតផ្ទាល់ វាចំណាយពេលមិនក្រោមពីរម៉ោងឡើយ»។
![](https://pppkhmer.sgp1.cdn.digitaloceanspaces.com/image/main/20247/26_7_2024_transforming_faces_changing_lives_nob_dane_s_journey_in_special_effects_makeup.jpg)
កញ្ញា ណុប ដាណេ បានប្រែក្រឡាខ្លួនតារាចម្រៀង ទេព បូព្រឹក្ស ទៅជាតួអង្គក្បាលត្រងោលដ៏ចម្លែកសម្រាប់ការគម្រោងថតរូបចុងក្រោយបំផុត។ រូបថត សហការី
ដោយសារតែក្ដីស្រឡាញ់សិល្បៈតុបតែងកាយប្រភេទនេះ និងចង់ឱ្យវិស័យភាពយន្ដមានគុណភាព កញ្ញា ដាណេ មិនប្រកាន់ថា ការតុបតែងខ្លួនបែបអាក្រក់ ដែលទាមទារការចំណាយខ្ពស់ ទទួលបានកម្រៃទាបជាងការតុបតែងកាយបែបស្អាតនោះទេ។
កញ្ញាបាននិយាយថា តារាចម្រៀង ទេព បូព្រឹក្ស ចង់ឱ្យមានឈុតឆាកមួយរំលេចនូវក្បាលត្រងោលក្នុងចម្រៀងរបស់ខ្លួន តែអាចរកអ្នកជំនាញផ្នែកនេះបាន។
ទាក់ទងនឹងការតុបតែងបែបរបួស កញ្ញា ដាណេ ទទួលស្គាល់ថា មានអ្នកជំនាញក្នុងស្រុកជាច្រើនអាចធ្វើបាន តែអ្វីដែលធ្វើឱ្យកញ្ញាលេចធ្លោជាងគេគឺសិល្បៈនៃការបិតក្បាលត្រងោលនេះ។
ជាក់ស្ដែង ការងារចុងក្រោយបំផុត គឺការបិតត្រងោលឱ្យតារាចម្រៀង ទេព បូព្រឹក្ស ដែលធ្វើឱ្យអ្នកជុំវិញខ្លួនទទួលស្គាល់ស្នាដៃមួយនេះ។
កញ្ញាបានបន្ដថា៖ «ការបិតក្បាលត្រងោលនេះពិបាក ត្រូវការពេលវេលា និងមានចិត្ដអំណត់ ដោយការបិតកាវបន្ដិចម្ដងៗ ដូចជាការសាងសង់មួយ។ ការបិតកាវធ្វើឱ្យស៊ីជាមួយស្បែកក្បាល ដែលទាមទារពេលវេលាយូរមែនទែន»។
ក្ដីសង្ឃឹមទៅអនាគត
អាជីពរបស់កញ្ញា ដាណេ កើតចេញពីចំណង់ចំណូលចិត្ត ការលះបង់ និងអំណាចផ្លាស់ប្តូរនៃការណែនាំ។ ក្រោមការដឹកនាំរបស់ Apple Love កញ្ញា ដាណេ បានបង្កើតជំនាញរបស់ខ្លួន ហើយក្លាយជាអ្នកផាត់មុខដែលកំពុងរះ។
នៅពេលដែល ដាណេ បន្តពុះពារក្នុងអាជីពដែលបម្រើឱ្យវិស័យសិល្បៈភាពយន្ដ កញ្ញានៅតែប្តេជ្ញាចិត្តក្នុងការចែករំលែកចំណេះដឹង និងជំនាញរបស់ខ្លួនទៅកាន់អ្នកដទៃ។
កញ្ញា ដាណេ បានបង្ហាញពីក្តីប្រាថ្នាដោយបញ្ជាក់ថា៖ «ខ្ញុំលើកទឹកចិត្ដអ្នកផាត់មុខជំនាន់ក្រោយនៅកម្ពុជាដើមតាមផ្លូវរបស់ Apple Love ដូចជាដែលគាត់បានបំផុសគំនិតខ្ញុំ។ ជាមួយនឹងទេពកោសល្យ ការតាំងចិត្ត និងការគាំទ្រពីអ្នកណែនាំរបស់ខ្ញុំ ខ្ញុំនៅតែបន្ដធ្វើកិច្ចការនេះ និងសុំឱ្យមហាជនគាំទ្រដល់ចំណែកមួយនៃផ្នែកសិល្បៈភាពយន្ដនៅកម្ពុជា»៕