កញ្ញា Leona Chin អ្នកមានឥទ្ធិពល (influencer) ដ៏ល្បីជនជាតិម៉ាឡេស៊ី ចូលរួមបើករថយន្តប្រណាំងក្នុងព្រឹត្តិការណ៍ត្រៀម Gumball 3000 Rally ធ្វើឡើងនៅខេត្តសៀមរាបកាលពីចុងសប្ដាហ៍។ រូបថត Gumball
តារាប្រណាំងរថយន្តនិងជាអ្នកមានឥទ្ធិពល (influencer) ដ៏ល្បីជនជាតិម៉ាឡេស៊ី កញ្ញា Leona Chin បានទាក់ទាញការចាប់អារម្មណ៍តាមរយៈការបង្ហាញជំនាញបើករថយន្តប្រណាំងក្នុងព្រឹត្តិការណ៍ត្រៀម Gumball 3000 Rally ធ្វើឡើងនៅខេត្តសៀមរាបកាលពីចុងសប្ដាហ៍ មុនពេលព្រឹត្តិការណ៍លំដាប់ពិភពលោកនេះមកដល់កម្ពុជា២សប្ដាហ៍ខាងមុខ។
នៅក្នុងព្រឹត្តិការណ៍កាលពីថ្ងៃអាទិត្យ សូម្បីតែតារាចម្រៀងលោក ខេមរៈ សិរីមន្ត ក៏បានសរសើរកញ្ញាដែរ ដោយលោកថា៖ «កញ្ញា Leona Chin drift ឡានសាហាវណាស់ សូមសរសើរ ស្អាតហើយពូកែទៀត»។
ក្រៅពីចូលរួមក្នុងព្រឹត្តិការណ៍ត្រៀមនេះ កញ្ញា Leona ក៏បានទៅទស្សនាប្រាសាទអង្គរវត្តដ៏ល្បីល្បាញរបស់ខ្មែរផងដែរ បន្ទាប់ពីបានស្នាក់ទីក្រុងភ្នំពេញ ដែលជាបទពិសោធន៍ដ៏ល្អមួយ។
កញ្ញាបានប្រាប់ភ្នំពេញប៉ុស្តិ៍ថា៖ «ដំណើរទស្សនកិច្ចចុងក្រោយរបស់ខ្ញុំទៅកម្ពុជា គឺជាបទពិសោធន៍ដ៏អស្ចារ្យ ចាប់ផ្តើមតាំងពីការស្នាក់នៅក្នុងសណ្ឋាគារ Hyatt Regency នៅ Phnom Penh ដែលសេវាកម្មនៅសណ្ឋាគារនេះគឺល្អមិនគួរឱ្យជឿ ហើយមានបារនៅលើអាកាសផ្តល់ទិដ្ឋភាពអស្ចារ្យនៃទីក្រុងភ្នំពេញ។ នេះជាការចាប់ផ្តើមដំណើរកម្សាន្តដ៏ល្អ»។
កញ្ញាបន្តថា៖ «ដំណើរកម្សាន្តនេះពិសេសណាស់ ព្រោះវាប្រព្រឹត្តទៅរួមជាមួយព្រឹត្តិការណ៍ Rev Up Cambodia ដែលសហការជាមួយ ជីប ម៉ុង។ យើងបានធ្វើដំណើរជាមួយរថយន្តលំដាប់ខ្ពស់ជាង ៦០ គ្រឿង ហើយព្រឹត្តិការណ៍នៅព្រលានយន្តហោះចាស់សៀមរាបគឺពិតជាអស្ចារ្យណាស់។ អ្នកគាំទ្របានមកប្រមូលផ្តុំនៅទីនោះដើម្បីមើលការប្រណាំងរថយន្ត ហើយទាំងអស់គ្នាបានបង្កើតបរិយាកាសដ៏រីករាយមួយ»។
ព្រឹត្តិការណ៍ត្រៀម Gumball 3000 Rally ធ្វើឡើងនៅខេត្តសៀមរាបកាលពីចុងសប្ដាហ៍។ រូបថត Gumball
Gumball 3000 Rally គឺជាព្រឹត្តិការណ៍រថយន្តលំដាប់អន្តរជាតិនៅលើផ្លូវសាធារណៈ ដែលធ្វើដំណើរឆ្លងកាត់ប្រទេសជាច្រើន។
សម្រាប់ឆ្នាំ ២០២៤នេះ គឺជាខួបទី២៥ឆ្នាំនៃការរៀបចំព្រឹត្តិការណ៍នេះ ដែលអ្នកចូលរួមនឹងបើកបរលើចម្ងាយផ្លូវ ៣០០០ គីឡូម៉ែត្រចេញទីក្រុងហូជីមិញប្រទេសវៀតណាម ឆ្លងកាត់រាជធានីភ្នំពេញ និងសៀមរាប បន្តទៅប្រទេសថៃ ម៉ាឡេស៊ី និងបញ្ចប់នៅប្រទេសសិង្ហបុរី ចាប់ពីថ្ងៃទី ១៤ ដល់ ២២ ខែកញ្ញា។ នេះបើតាមការជូនដំណឹងរបស់ក្រុមហ៊ុន Gumball 3000។
ក្បួនរថយន្តនេះ នឹងមកដល់ទីក្រុងភ្នំពេញនៅថ្ងៃទី ១៥ ខែកញ្ញា និងទៅដល់មុខប្រាសាទអង្គរវត្តនៅថ្ងៃបន្ទាប់។
ព្រឹត្តិការណ៍នេះក៏នឹងមានការចូលរួមរបស់រថយន្តលំដាប់ខ្ពស់ជាង ១០០ គ្រឿង ដែលបើកបរដោយតារាជាតិ និងអន្តរជាតិ ជាតិ និងអ្នកមានឥទ្ធិពល។ ក្នុងនោះក៏រួមមានទាំងវីរបុរសបាល់ទាត់អតីតក្រុមបិសាចក្រហម Manchester United លោក Patrice Evra ផងដែរ រួមជាមួយតារាចម្រៀងអាមេរិក Ja Rule និង Bun B និងតារាល្បីៗជាច្រើនទៀត។
លោក Patrice Evra វីរបុរសបាល់ទាត់អតីតក្រុមបិសាចក្រហម Manchester United។ រូបថត Gumball
ក្រុមហ៊ុន Gumball 3000 បានថ្លែងនៅក្នុងសេចក្ដីប្រកាសព័ត៌មានថា៖ «ចេញពីភ្នំពេញទៅ យើងនឹងធ្វើដំណើរទៅទិសខាងជើងឆ្ពោះទៅកាន់តំបន់ដ៏អស្ចារ្យដែលមានប្រាសាទបុរាណជាច្រើនក្នុងខេត្តសៀមរាប នៅថ្ងៃទី១៦។ យប់នោះយើងនឹងមានពិធីអាហារពេលល្ងាចនិងព្រឹត្តិការណ៍រៃអង្គាស ដោយសហការជាមួយដៃគូ Christie’s នៅឯប្រាសាទអង្គរវត្តដែលជាអច្ឆរិយៈទី៨ នៅលើពិភពលោក»។
នៅក្នុងសេចក្ដីប្រកាសព័ត៌មានថ្ងៃទី៣០ ខែសីហា ក្រសួងទេសចរណ៍បានឱ្យដឹងថា ព្រឹត្តិការណ៍នេះក៏មានបំណងបង្កើតកំណត់ត្រាពិភពលោកថ្មី Guinness World Record សម្រាប់ការចតរថយន្តលំដាប់ខ្ពស់ច្រើនបំផុតនៅតំបន់បេតិកភណ្ឌពិភពលោក ដែលនឹងធ្វើឡើងនៅថ្ងៃទី១៧ ខែកញ្ញា។
លោកនាយករដ្ឋមន្ត្រី ហ៊ុន ម៉ាណែត បានថ្លែងនៅលើហ្វេសប៊ុករបស់លោក ដោយចាត់ទុកព្រឹត្តិការណ៍នេះ ថាជា «កាតាលីករបន្ថែមទៀត ក្នុងការបង្ហាញកិត្យានុភាព និងសក្ដានុពលរបស់កម្ពុជា»។
Gumball 3000 Rally គឺជាព្រឹត្តិការណ៍រថយន្តលំដាប់អន្តរជាតិនៅលើផ្លូវសាធារណៈ ដែលធ្វើដំណើរឆ្លងកាត់ប្រទេសជាច្រើន។ រូបថត Gumball
សម្រាប់កញ្ញា Leona ដំណើរកម្សាន្តរបស់នាងមកកាន់ប្រទេសកម្ពុជា និងការទស្សនាអង្គរវត្តធ្វើឲ្យកញ្ញាមានអារម្មណ៍រីករាយតាមរយៈវប្បធម៌សម្បូរបែប អាហារឆ្ងាញ់ៗ និងការនិយាយភាសាអង់គ្លេសនិងភាសាផ្សេងទៀតបានស្ទាត់ជំនាញរបស់ពលរដ្ឋក្នុងស្រុក។ កញ្ញាក៏សង្កេតឃើញមានចំណាប់អារម្មណ៍របស់ពលរដ្ឋទៅលើឡាន តន្ត្រី ដែលស្រដៀងទៅនឹងពលរដ្ឋនៅប្រទេសម៉ាឡេស៊ីដែរ។
កញ្ញាថ្លែងថា៖ «និយាយរួម ដំណើរកម្សាន្តរបស់ខ្ញុំទៅខេត្តសៀមរាប និង ប្រទេសកម្ពុជាគឺជាការរួមបញ្ចូលគ្នារវាងការស្វែងយល់អំពីវប្បធម៌ និងព្រឹត្តិការណ៍រំភើបរីករាយ។ ខ្ញុំទទួលបានបដិសណ្ឋារកិច្ចល្អ និងបទពិសោធន៍មិនអាចភ្លេចបាន។ ខ្ញុំរំភើបសម្រាប់ព្រឹត្តិការណ៍ដែលនឹងមកដល់នៅថ្ងៃទី១៥ និង ១៦ ខែកញ្ញានេះ ហើយខ្ញុំទន្ទឹងរង់ចាំត្រឡប់មកម្ដងទៀត»៕
