កម្មវិធីបណ្តុះបណ្តាលផ្លាស់ប្តូរជីវិតស្ដ្រីនៅឃុំកំពង់ឃ្លាំងដោយផ្តល់ឱកាសរៀនជំនាញត្បាញចាក់ តាមរយៈកិច្ចសហប្រតិបត្តិការជាមួយ Cambodia Knits (CK)។ រូបថត សហការី
ខេត្ដសៀមរាប៖ ដើម្បីផ្គត់ផ្គង់គ្រួសារ គំនិតផ្តួចផ្តើមថ្មីមួយគឺការផ្ដល់វគ្គបណ្ដុះបណ្ដាលបំណិនជីវិតស្ត្រីក្នុងការបង្កើតមុខរបរ និងគិតគូរនិរន្តរភាពសម្រាប់គ្រួសាររបស់ពួកគេ។
ភាពជាដៃគូរវាង Ability Fair Trade Village (AFTV) ជាផ្សារសម្រាប់សិប្បករ និងសិល្បករមានពិការភាពក្នុងការលក់ផលិតផល និង Global Envirotech Initiative (GEI) ជាក្របខណ្ឌអន្តរជាតិដែលមានគោលបំណងដោះស្រាយបញ្ហាប្រឈមបរិស្ថាននិងការលើកកម្ពស់បច្ចេកវិទ្យាស្អាត បានចាប់ផ្តើមកម្មវិធីបណ្តុះបណ្តាលផ្លាស់ប្តូរជីវិតស្ដ្រីនៅឃុំកំពង់ឃ្លាំង ដោយផ្តល់ឱកាសរៀនជំនាញត្បាញចាក់ តាមរយៈកិច្ចសហប្រតិបត្តិការជាមួយ Cambodia Knits (CK)។
កម្មវិធីដែលបានធ្វើឡើងក្នុងខែកក្កដា និងសីហា ឆ្នាំ២០២៤ បានផ្តល់អាហារូបករណ៍ដល់ស្ត្រីចំនួន ៤០ នាក់មកពីភូមិចំនួន ២ ដែលពួកគេទទួលការបណ្តុះបណ្តាលរយៈពេល ១៦ ថ្ងៃ ដែលបើកផ្លូវសម្រាប់ការងារប្រកបដោយនិរន្តរភាព។
ស្ត្រីទាំងនេះដែលភាគច្រើនមិនមានបទពិសោធន៍ពីមុនក្នុងការធ្វើសិប្បកម្ម ឥឡូវនេះមានឱកាសទទួលបានប្រាក់ចំណូលសមរម្យតាមរយៈការងារនៅផ្ទះ ជាឱកាសសំខាន់នៅក្នុងតំបន់ដែលជម្រើសការងារផ្លូវការខ្វះខាត។
ពីការបណ្តុះបណ្តាលដល់ការងារ
វគ្គបណ្តុះបណ្តាលនេះ ចែកចេញជាពីរដំណាក់កាលដំបូងបានណែនាំអ្នកចូលរួមអំពីបច្ចេកទេស ត្បាញចាក់ជាមូលដ្ឋាន។
ដំណាក់កាលទី ២ ផ្តោតលើការផលិតផលិតផលជាក់លាក់សម្រាប់ Cambodia Knits ជាសហគ្រាសសង្គមដែលស្គាល់ជាថ្នាលផ្តល់ការងារដល់សហគមន៍ដែលខ្វះខាត។
កម្មវិធីនេះត្រូវបានរៀបចំឡើងមិនត្រឹមតែផ្ដល់ឱ្យស្ត្រីនូវជំនាញបច្ចេកទេសប៉ុណ្ណោះទេ ប៉ុន្តែថែមទាំងផ្តល់ឱ្យពួកគេមានលទ្ធភាពផ្គត់ផ្គង់គ្រួសារផងដែរ។
អ្នកស្រី វូវ៉ាកហ្ស៊ី ម៉ូនីកា នាយកប្រតិបត្តិ និងជាស្ថាបនិកនៃសហគ្រាសសង្គម Cambodia Knits បាននិយាយថា៖ «សិក្ខាកាមបានបង្ហាញនូវភាពខ្នះខ្នែងក្នុងការរៀនសូត្រ និងបានចូលរួមយ៉ាងសកម្មដោយការសួរសំណួរជាច្រើនដើម្បីធ្វើឱ្យការយល់ដឹងរបស់ពួកគេកាន់តែស៊ីជម្រៅ»។
កម្មវិធីនេះត្រូវបានរៀបចំឡើងមិនត្រឹមតែផ្ដល់ឱ្យស្ត្រីនូវជំនាញបច្ចេកទេសប៉ុណ្ណោះទេ ប៉ុន្តែថែមទាំងផ្តល់ឱ្យពួកគេមានលទ្ធភាពផ្គត់ផ្គង់គ្រួសារផងដែរ។ រូបថត សហការី
ជនជាតិប៉ូឡូញ-កាណាដា អ្នកស្រី ម៉ូនីកា បានមកធ្វើការនៅក្នុងប្រទេសកម្ពុជាជាលើកដំបូងក្នុងឆ្នាំ ២០០០ ដោយត្រឡប់មកវិញក្នុងឆ្នាំ ២០០៦។
អ្នកស្រីធ្វើការនៅក្នុងប្រទេសកម្ពុជាជាអ្នកប្រឹក្សាផ្នែកអប់រំ ដោយព្យាយាមជួយបង្កើតឱកាសសេដ្ឋកិច្ចសម្រាប់ស្ត្រី។
អ្នកស្រី ម៉ូនីកា បានបង្កើត CK ជាសហគ្រាសសង្គមដែលធ្វើការជាមួយសហគមន៍ក្នុង និងជិតទីក្រុងភ្នំពេញ និងនៅតំបន់ជនបទក្នុងឆ្នាំ ២០០៩ ដោយជឿថា ស្ត្រីបានដើរតួនាទីយ៉ាងសំខាន់ក្នុងការជួយគ្រួសារងើបចេញពីភាពក្រីក្រ។
អ្នកស្រីបានប្រាប់ភ្នំពេញប៉ុស្ដិ៍ថា៖ «គោលដៅរបស់យើងគឺផលិតផលិតផលធ្វើដោយដៃដ៏ស្រស់ស្អាត គុណភាពខ្ពស់ និងតែមួយគត់ ខណៈពេលផ្តល់ឱកាសការងារដោយយុត្តិធម៌ និងអាចបត់បែនបាន»។
អ្នកស្រី ក៏បានកត់សម្គាល់ថា អ្នកចូលរួមជាច្រើនបានបន្ដរៀនលើសពីម៉ោង ដោយនៅចុងបញ្ចប់នៃកម្មវិធី គំរូផលិតផលដំបូងរបស់ស្ត្រីបានបង្ហាញពីជំនាញរបស់ពួកគេដ៏ល្អ។
ចំណែកអ្នកស្រី សុខ ញ៉ី អាយុ៥៨ឆ្នាំ ជាសិប្បករម្នាក់បានត្បាញចាក់តុក្កតាជាច្រើន ដូចជា សត្វក្រពើដើម្បីចិញ្ចឹមគ្រួសាររួមទាំងកូនស្រីពីរនាក់។
បន្ទាប់ពីការបិទសហគ្រាសសង្គម Nyemo Cambodia អ្នកស្រី ញ៉ី បានចូលរួមជាមួយក្រុមគាំទ្រស្ត្រីកម្ពុជា (CWSG) ដែលបង្កើតឡើងដោយអ្នកស្រី គី កាណារី ដើម្បីបន្តចាក់តុក្កតា និងប្រដាប់ក្មេងលេងដែលផលិតដោយដៃ ដែលដាក់លក់ដោយសហការជាមួយ CK។
ភាពជាដៃគូនេះផ្តល់នូវប្រាក់ចំណូលដែលត្រូវការច្រើនដល់ស្ត្រី ដូចជា ញ៉ី ទោះបីជាការបញ្ជាទិញនៅតែមិនទៀងទាត់ ដោយកំណត់ស្ថិរភាពហិរញ្ញវត្ថុរបស់ពួកគេ។
អ្នកស្រី ញ៉ី បាននិយាយថា៖ «ប្រសិនបើមានអតិថិជនក្នុងស្រុកច្រើន យើងនឹងអាចរកប្រាក់បានគ្រប់គ្រាន់ដើម្បីទិញអង្ករ»។
ការទទួលស្គាល់សមិទ្ធផល
វគ្គបណ្ដុះបណ្ដាលនេះបានបញ្ចប់ជាមួយកម្មវិធីចែកវិញ្ញាបនបត្រនៅថ្ងៃទី ២៣ ខែសីហា ឆ្នាំ ២០២៤ ដែលអភិបាលស្រុកសូទ្រនិគម គីម វណ្ណៈ ប្រគល់វិញ្ញាបនបត្រដល់ស្ត្រីចំនួន ៣១នាក់ ដែលបានបញ្ចប់វគ្គបណ្តុះបណ្តាល។
លោកបានប្រាប់អ្នកចូលរួមដោយជំរុញឱ្យពួកគេចែករំលែកជំនាញនេះទៅកាន់អ្នកដទៃនៅក្នុងភូមិថា៖ «អ្នកទាំងអស់គ្នាមានសក្តានុពលក្នុងការក្លាយជាគំរូសម្រាប់អ្នកដទៃ»។
ការគាំទ្ររបស់ថ្នាក់ដឹកនាំមូលដ្ឋានមានសារៈសំខាន់ចំពោះភាពជោគជ័យនៃគំនិតផ្តួចផ្តើមនេះ។ អ្នកដឹកនាំសហគមន៍មិនត្រឹមតែបានលើកទឹកចិត្តស្ត្រីឱ្យចុះឈ្មោះក្នុងកម្មវិធីប៉ុណ្ណោះទេ ប៉ុន្តែថែមទាំងជំរុញពួកគេឱ្យបន្តវគ្គសិក្សានេះផងដែរ។
ការគាំទ្រនេះនឹងបន្តមានសារៈសំខាន់នៅពេលដែលស្ត្រីទាំងនេះចាប់ផ្តើមដំណើររបស់ពួកគេក្នុងនាមជាសិប្បករជំនាញ ដោយជួយពួកគេបង្កើតប្រាក់ចំណូលប្រកបដោយនិរន្តរភាព ខណៈពេលដែលរួមចំណែកដល់សេដ្ឋកិច្ចក្នុងតំបន់។
ស្ត្រីនៅសហគ្រាសសង្គម Cambodia Knits (CK) ផលិតតុក្កតាសត្វ និងប្រដាប់ប្រដាក្មេងលេងនីមួយៗដែលមានឈ្មោះ និងរឿងប្លែកៗ ដែលផ្តល់ឱ្យពួកគេនូវភាពជាបុគ្គល និងទាក់ទាញ។
សុវណ្ណ ជាតុក្កតាគេងលក់ស្កប់ស្កល់ពណ៌ខ្មៅ ឆ្លុះបញ្ចាំងពីចរិតទន់ភ្លន់នៃឈ្មោះខ្មែរ។ ធ្វើឡើងដោយក្តីស្រឡាញ់ និងការយកចិត្តទុកដាក់ដោយស្ត្រីខ្មែរក្នុងស្រុក តុក្កតានេះគឺជាដៃគូដ៏ល្អឥតខ្ចោះសម្រាប់ទារក។
អ្នកស្រី ម៉ូនីកា បានពន្យល់ថា៖ «តុក្កតាជួយដំណេកកុមាររបស់យើងទាំងអស់មានឈ្មោះចាប់ផ្តើមដោយ 'ស' ដែលភាគច្រើនជាឈ្មោះខ្មែរ»។
អ្នកស្រីបានបន្ថែមថា៖ «ខ្ញុំសង្កេតឃើញថា កូនខ្មែរជាច្រើនមានឈ្មោះដោយចាប់ផ្តើមដោយសំឡេងដូចគ្នា ហើយខ្ញុំចង់គោរពប្រពៃណីនោះ»។
ស្ត្រីនិងកូនៗសើច ខណៈកំពុងចាក់ត្បាញតុក្កតា។ រូបថត សហការី
បំបែកវដ្តនៃភាពក្រីក្រ
កិច្ចសហការរបស់ AFTV ជាមួយ Cambodia Knits គឺជាផ្នែកមួយនៃបេសកកម្មធំជាងនេះ ដើម្បីដោះស្រាយភាពក្រីក្រនៅតំបន់ជនបទ តាមរយៈការផ្តល់ឱកាសការងារដ៏ស្ដ្រីមេផ្ទះ។
បើតាមអ្នកស្រី ឈុយ សារេត នាយិកា AFTV គំនិតផ្តួចផ្តើមនេះគឺជាជំហានដ៏សំខាន់មួយឆ្ពោះទៅរកការផ្លាស់ប្តូរជីវិតនៅក្នុងឃុំកំពង់ឃ្លាំង។
អ្នកស្រីបាននិយាយទៅកាន់អ្នកចូលរួមថា៖ «អ្នកគឺជាវីរបុរសរបស់ខ្ញុំ ។ អ្នកគឺជាអ្នកដឹកនាំដំបូងគេក្នុងការផ្លាស់ប្តូរអនាគតនៃភូមិរបស់អ្នក។ អនាគតដែលមានការងារល្អសម្រាប់គ្រប់គ្រួសារ និងមិនមានប័ណ្ណក្រីក្រ»។
កម្មវិធីមិនឈប់នៅវគ្គបណ្តុះបណ្តាលទេ។ អ្នកដែលបង្ហាញពីសមត្ថភាពរបស់ពួកគេដោយជោគជ័យ នឹងត្រូវបានផ្តល់ជូនរយៈពេលសាកល្បងរយៈពេល ៣ ខែជាមួយសហគ្រាសសង្គម Cambodia Knits ដែលនាំទៅដល់លទ្ធភាពនៃការងាររយៈពេលវែង។
ពួកគេនឹងទទួលបានប័ណ្ណ បេឡាជាតិរបបសន្តិសុខសង្គម (ប.ស.ស.) របស់កម្ពុជា ដែលផ្តល់អត្ថប្រយោជន៍ ដូចជា ការធានារ៉ាប់រងរបួសការងារ ការថែទាំសុខភាព និងប្រាក់សោធននិវត្តន៍។
អ្នកស្រី ម៉ូនីកា បានសង្កត់ធ្ងន់ថា៖ «ដោយសារឱកាសសេដ្ឋកិច្ច ស្ត្រីវិនិយោគប្រាក់ចំណូលរបស់ពួកគេទៅក្នុងសុខភាព ការអប់រំ និងអនាគតនៃគ្រួសាររបស់ពួកគេ»។
នេះជាការរំឭកដ៏មានឥទ្ធិពលដែលការផ្តល់សិទ្ធិអំណាចដល់ស្ត្រីគឺអំពីការផ្តល់ការងារច្រើនជាងការផ្តល់ការងារ។ វាគឺអំពីការកសាងអនាគតដ៏ភ្លឺស្វាងសម្រាប់សហគមន៍ទាំងមូល។
សិក្ខាកាម ៣១នាក់ក្នុងចំណោម ៤០នាក់ទទួលបានវិញ្ញាបនបត្របញ្ជាក់ការសិក្សាជំនាញត្បាញចាក់តុក្កតាពីអំបោះ។ រូបសហការី
ការពង្រីកឱកាស
ភាពជោគជ័យនៃកម្មវិធីបណ្តុះបណ្តាលនេះគ្រាន់តែជាការចាប់ផ្តើមប៉ុណ្ណោះ។ AFTV បានប្រកាសរួចហើយថានឹងបង្កើតឱកាសការងារកាន់តែច្រើននៅឆ្នាំខាងមុខ ដោយមានគំនិតផ្តួចផ្តើមថ្មីៗ ដូចជា ហាងកាត់ដេរ ហាងកង់ កសិដ្ឋានចង្រិត និងផ្ទះកញ្ចក់។
គម្រោងទាំងនេះនឹងផ្តល់នូវមធ្យោបាយបន្ថែមសម្រាប់គ្រួសារក្នុងតំបន់ក្នុងការទទួលបានប្រាក់ចំណូលប្រកបដោយនិរន្តរភាព ដោយជួយពួកគេក្នុងការលើកកម្ពស់គុណភាពជីវិតរបស់ពួកគេ។
Cambodia Knits ក៏បន្តដើរតួនាទីយ៉ាងសំខាន់ក្នុងការជួយដល់ស្ត្រីទាំងនេះ។ អង្គការនេះផលិត និងលក់របស់របរធ្វើដោយដៃជាច្រើនប្រភេទ ចាប់ពីតុក្កតា Sleepy Snoogus ដល់តុក្កតាអប់រំ ដែលត្រូវបានអតិថិជនជាទីស្រឡាញ់សម្រាប់គុណភាព និងផ្ដល់ឥទ្ធិពលជាវិជ្ជមានដល់សង្គម។
រាល់ការទិញផលិតផលទាំងនេះជួយផ្តល់ការងារប្រកបដោយស្ថិរភាពសម្រាប់សិប្បករទាំងនេះ រួមចំណែកដល់វដ្តនៃការផ្តល់អំណាច និងការកាត់បន្ថយភាពក្រីក្រ៕
