សេវាកម្មទូកកាយៈ មានតម្លៃ ៤ម៉ឺនរៀល (១០ដុល្លារ) ដែលភ្ញៀវទេសចរអាចជិះលម្ហែតាមដងព្រែកប្រវែង ១៣០០ម៉ែត្រ ធ្លាយទៅដល់សមុទ្រ ទស្សនាកោះសង្សារដ៏ប្រណិត។ រូបថត សហការី
ក្រុងកោះរ៉ុង៖ ស្ថិតនៅផ្នែកខាងក្រោយដែនកោះរ៉ុង ជាព្រែកកោងកាងដ៏ស្ងប់សុខនៅក្នុងឧទ្យានជាតិសមុទ្រកោះរ៉ុង ដែលរំលេចនូវសម្រស់ធម្មជាតិ និងការកម្សាន្តដែលមិនប៉ះពាល់ដល់បរិស្ថាន។
សហគមន៍អេកូទេសចរណ៍ ព្រែកកោងកាង កោះរ៉ុង បានឱ្យដឹងថា សហគមន៍បានចាប់កំណើតនៅក្នុងខែមេសា ឆ្នាំ២០២១ ដែលមានផ្ទៃដីសរុប ៤០ហិកតា បានក្លាយជាចំណុចសំខាន់នៃវិស័យទេសចរណ៍ប្រកបដោយនិរន្តរភា។
ក្រោមការចុះអនុស្សារណៈនៃការយោគយល់រវាងសមាគមអភិរក្សបរិស្ថាន និងក្រុមប្រឹក្សាជាតិអភិវឌ្ឍដោយចីរភាព ការបង្កើតសហគមន៍នេះក្នុងគោលដៅដើម្បីជួយដល់សេដ្ឋកិច្ចរបស់ប្រជាសហគមន៍មូលដ្ឋាន បង្កើតចំណូល និងមុខរបរ។
លោក សុខ ស្រេង ប្រធានសហគមន៍អេកូទេសចរណ៍ ព្រែកកោងកាង កោះរ៉ុង បានឱ្យដឹងថា៖ «សហគមន៍អេកូទេសចរណ៍ព្រែកកោងកាង ចូលរួមចំណែកបង្កើត និងអភិវឌ្ឍផលិតទេសចរណ៍ថ្មីៗនៅក្នុងព្រះសីហនុ ក៏ដូចជាក្រុងកោះរ៉ុង»។
សហគមន៍មានតួនាទីជួយអភិរក្ស ការពារព្រៃកោងកាង និងជីវៈចម្រុះនៅលើដែនកោះដែលមានប្រជាជនសរុបជិត ៤ពាន់នាក់។
លោក ស្រេង បានលើកឡើងពីសក្ដានុពលទេសចរណ៍នៅតំបន់អេកូទេសចរណ៍ព្រែកកោងកាងថា៖ «ចំពោះថ្ងៃធម្មតា យើងទទួលភ្ញៀវចន្លោះពី ៧០ ទៅ ១០០នាក់ ខណៈថ្ងៃចុងសប្ដាហ៍ និងថ្ងៃបុណ្យ សហគមន៍ទទួលភ្ញៀវយ៉ាងតិចជាង ១០០នាក់ឡើង»។
ទិដ្ឋភាពពីលើអាកាសនៃតំបន់ព្រៃកោងកាងរបស់សហគមន៍អេកូទេសចរណ៍ព្រែកកោងកាងកោះរ៉ុង។ រូបថត សហការី
ក្រៅពីសេវាកម្មម្ហូបអាហារ ដូចជា បុកល្ហុងអ្នកកោះ នំប៉័ងកៀប កាហ្វេកោងកាង និងអាហារប្រចាំតំបន់ជាច្រើនទៀត សហគមន៍ត្រៀមពង្រីកបង្កើតផ្ទះស្នាក់សម្រាប់ទទួលភ្ញៀវដែលមានបំណងស្នាក់អាស្រ័យផងដែរ។
សេវាកម្មទូកកាយៈ មានតម្លៃ ៤ម៉ឺនរៀល (១០ដុល្លារ) ដែលភ្ញៀវទេសចរអាចជិះលម្ហែតាមដងព្រែកប្រវែង ១៣០០ម៉ែត្រ ធ្លាយទៅដល់សមុទ្រ ទស្សនាកោះសង្សារដ៏ប្រណិត។
លោក ឡុង ឌីម៉ង់ អភិបាលរងខេត្ដព្រះសីហនុ បានឱ្យដឹងថា៖ «តំបន់អេកូទេសចរណ៍ប្រែកកោងកាងនេះមានសម្រស់ធម្មជាតិពិតជាស្រស់ស្អាតណាស់ ហើយនៅកោះរ៉ុងនេះមិនត្រឹមតែមានឆ្នេរដ៏ទាក់ទាញប៉ុណ្ណោះទេ ប៉ុន្ដែយើងមានព្រៃភ្នំ ព្រៃកោងកាង រួមទាំងធនធាននៅក្រោមបាតសមុទ្រដ៏ច្រើនថែមទៀត»។
លោកបានបន្ដថា លើសពីធនធានធម្មជាតិ កោះរ៉ុងមានហេដ្ឋារសម្ព័ន្ធសម្បូរបែប រួមទាំងទូកល្បឿនលឿន ដែលផ្ដល់ឱ្យភ្ញៀវសុវត្ថិភាព និងផាសុកភាព ក៏ដូចជាសេវាកម្ម និងអនាម័យបរិស្ថាន។
លោក ម៉ាង ស៊ីណេត អភិបាលខេត្ដព្រះសីហនុ ដឹកនាំមន្ដ្រីដាំកូនកោងកាង ១ពាន់ដើមកាលពីខែធ្នូ ឆ្នាំ២០២៤ កន្លងទៅ។ រូបថត សហការី
លោក ឌីម៉ង់ បានបញ្ជាក់ថា ភាពទាក់ទាញភ្ញៀវទេសចរបានច្រើន និងស្នាក់នៅបានយូរ មានតែការកែច្នៃបង្កើតជារីសត បន្ថែមពីលើធនធានធម្មជាតិ។
លោកបានថ្លែងថា៖ «កោះបាលី ប្រទេសឥណ្ឌូនេស៊ី អាចទាក់ទាញភ្ញៀវទេសចររាប់សិបលាននាក់ក្នុងមួយឆ្នាំៗ ដោយសារតែរីសត។ រីសតនោះ គឺជាសណ្ឋាគារធំៗ ដែលមានអ្នកជំនាញឌីហ្សាញឱ្យមានភាពទាក់ទាញ ដោយភ្ញៀវអាចចំណាយពេលស្នាក់នៅមួយអាទិត្យ ក៏មិនធុញទ្រាន់ផង»។
លោក ឌីម៉ង់ បានលើកទឹកចិត្ដឱ្យអ្នកវិនិយោគធ្វើកែច្នៃបង្កើតរីសតប្រណីតៗដើម្បីទាក់ទាញភ្ញៀវទេសចរមកពីជុំវិញពិភពលោក។
ក្រុមអ្នកសារព័ត៌មានប្រមាណ ៦០នាក់មកពី ៣០ស្ថាប័នទៅទស្សនកិច្ចនៅតំបន់អេកូទេសចរណ៍ព្រែកកោងកាងកោះ។ រូបថត ហុង រស្មី
លោក ម៉ាង ស៊ីណេត អភិបាលខេត្ដព្រះសីហនុ បានឱ្យដឹងកាលពីដើមខែធ្នូ ឆ្នាំ២០២៤ ថា ខេត្តព្រះសីហនុ ព្រឹកថ្ងៃទី៣ ខែធ្នូ ឆ្នាំ២០២៤ ថា លោក និងលោក Sun Shuxian អនុរដ្ឋមន្ត្រីក្រសួងធនធានធម្មជាតិ នៃសាធារណរដ្ឋប្រជាមានិតចិន និងលោក ជា សំអាង រដ្ឋលេខាធិការក្រសួងបរិស្ថាន បានចូលរួមសកម្មភាពលើកស្ទួយបរិស្ថាន និងបង្កើតជីវៈចម្រុះនៅតំបន់ព្រែកកោងកាង។
លោកបានសរសេរលើហ្វេសប៊ុកថា៖ «យើងចូលរួមពីធីដាំកូនកោងកាងចំនួន ១ពាន់ដើម និងពិធីប្រលែងកូនត្រី និងក្តាមថ្មនៅសហគមន៍អេកូទេសចរណ៍ព្រែកកោងកាង រួមទាំងដាក់ស្លាកសញ្ញាផ្សព្វផ្សាយនៅក្នុងឧទ្យានជាតិសមុទ្រកោះរ៉ុង ស្ថិតនៅសង្កាត់កោះរ៉ុង ក្រុងកោះរ៉ុង ខេត្តព្រះសីហនុ»។
កោះរ៉ុងត្រូវបានកំណត់ជាទីក្រុងកោះរ៉ុង ដែលមានចំនួន ៤ ភូមិ គឺភូមិកោះតូច ភូមិដើមថ្កូវ ភូមិព្រៃស្វាយ និងភូមិសុខសាន្ដ។
លោក នួន ប៊ុនថុល អភិបាលក្រុងកោះរ៉ុង បានឱ្យដឹងថា ជាច្រើនជំនាន់មកហើយ អ្នកស្រុកនៅលើកោះនេះពឹងផ្អែកលើទឹកដ៏សម្បូរបែបជុំវិញកោះរ៉ុង ដើម្បីទ្រទ្រង់ជីវភាពរបស់ពួកគេ ជាមួយនឹងការនេសាទជាប្រចាំ។
លោកបាននិយាយថា៖ «ទោះជាយ៉ាងណាក៏ដោយ នៅពេលដែលវិស័យទេសចរណ៍ចាប់ផ្តើមរីកចម្រើននៅកម្ពុជា សេដ្ឋកិច្ចរបស់កោះនេះបានផ្លាស់ប្តូរ ហើយអ្នកភូមិជាច្រើនបានងាកទៅរកសេវាកម្មដែលទាក់ទងនឹងទេសចរណ៍ដើម្បីទទួលបានប្រាក់ចំណូលប្រកបដោយនិរន្តរភាព»។
គម្រោងហេដ្ឋារចនាសម្ព័ន្ធសំខាន់ៗបានគាំទ្រការផ្លាស់ប្តូររបស់កោះរ៉ុងទៅជាគោលដៅទេសចរណ៍ទំនើប។ ក្រុមហ៊ុន រ៉ូយ៉ាល់ គ្រុប បានសាងសង់ផ្លូវបេតុងប្រវែង ៤០ គីឡូម៉ែត្រជុំវិញកោះ ដោយបង្កើនការតភ្ជាប់រវាងភូមិរបស់ខ្លួន រួមទាំងបណ្ដាញអគ្គិសនី ដែលត្រូវបានពង្រីកពីតារ៉ាសាគរ៕
