ការសម្ដែងសិល្បៈរូបគ្នាក្នុងព្រឹត្តិការណ៍ឆ្នាំទស្សនាកម្ពុជា ចិន ២០២៤ នៅប្រទេសចិន។ ក្រសួងទេសចរណ៍
ទស្សនីយភាពពិសេសនឹងកើតមាននៅផ្លូវថ្មើរជើងរាជធានីភ្នំពេញនាចុងសប្ដាហ៍នេះ ក្នុងព្រឹត្តិការណ៍បើកជាផ្លូវការនូវ «ឆ្នាំទេសចរណ៍ កម្ពុជា-ចិន ២០២៥» ដោយមានការសម្ដែងសិល្បៈរួមគ្នារវាងកម្ពុជា និងចិន។
យោងតាមការជូនដំណឹងរបស់ក្រសួងទេសចរណ៍ ព្រឹត្តិការណ៍ «ឆ្នាំទេសចរណ៍ កម្ពុជា-ចិន ២០២៥» នឹងបើកនៅថ្ងៃទី២៣ខែឧសភា នៅសាលសន្និសីទចតុម្មុខ ដោយមានការសម្តែងទស្សនីយភាពសិល្បៈរួមគ្នា ដែលរៀបចំឡើងដោយក្រសួងទេសចរណ៍ និងស្ថានទូតចិនប្រចាំកម្ពុជា។
ប៉ុន្តែ ព្រឹត្តិការណ៍ដែលមហាជនអាចចូលរួមដោយសេរីគឺនៅថ្ងៃទី២៤ និងថ្ងៃទី២៥ ខែឧសភា ដោយមានការសម្តែងទស្សនីយភាពសិល្បៈរួមគ្នា ដែលនឹងធ្វើឡើងនៅបរិវេណសួនច្បារ តេជោមាសតេជោយ៉ត តាមបណ្តោយផ្លូវថ្មើរជើងមាត់ទន្លេចតុមុខ។
ក្រសួងទេសចរណ៍ថ្លែងថា៖ «ការរៀបចំព្រឹត្តិការណ៍នេះ ជាលទ្ធផលនៃដំណើរទស្សនកិច្ចផ្លូវរដ្ឋរបស់ ឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន មកកាន់ព្រះរាជាណាចក្រកម្ពុជា កាលពីថ្ងៃទី១៧ ដល់ថ្ងៃទី១៨ ខែមេសា ឆ្នាំ២០២៥ ដោយប្រមុខរដ្ឋាភិបាលទាំងពីរ បានឯកភាពកំណត់យកឆ្នាំ២០២៥ ជា «ឆ្នាំទេសចរណ៍ កម្ពុជា-ចិន»។
ក្រសួងទេសចរណ៍ អំពាវនាវដល់សាធារណជន សមាគម ទេសចរណ៍ ប្រតិបត្តិករទេសចរណ៍ ផ្នែកឯកជន អ្នកសារព័ត៌មាន ភ្ញៀវទេសចរជាតិ-អន្តរជាតិ និងភាគីពាក់ព័ន្ធ នានា ចូលរួមឱ្យបានច្រើនកុះករ។
យ៉ាងណាក៏ដោយ ការសម្ដែងសិល្បៈអមដោយការបង្ហាញទេពកោសល្យវប្បធម៌នេះ មិនមែនជាលើកទី១ទេ គឺធ្លាប់បានធ្វើឡើងជាច្រើនឡើងរួចហើយ កាលពីឆ្នាំមុន ដោយការសម្ដែងធ្វើឡើងទាំងនៅកម្ពុជា និងចិន។ ព្រឹត្តិការណ៍ដែលគួរឲ្យកត់សម្គាល់នោះគឺការសម្ដែងគុនល្បុក្កតោ និងក្បាច់គុនសាវលីញ។
លោក ឈត ប៊ុនថង អ្នកជំនាញផ្នែកការស្រាវជ្រាវទេសចរណ៍ នៅរាជបណ្ឌិត្យសភាកម្ពុជា យល់ឃើញថា ការរៀបចំព្រឹត្តិការណ៍នេះឡើងគឺជារឿងល្អ ដើម្បីលើកកម្ពស់វិស័យទេសចរណ៍ និងវិនិយោគរវាងប្រទេសទាំងពីរ។ ប៉ុន្តែថាតើ វាមានឥទ្ធិពលកម្រិតណានោះ វាអាស្រ័យលើការវាស់ស្ទង់ជាក់ស្ដែង។
លោក ឈត ប៊ុនថង៖ «ថាតើការរៀបចំព្រឹត្តិការណ៍នេះអាចទាក់ទាញទេសចរបានកម្រិតណា វាពិបាកវាស់វែងណាស់ ប៉ុន្តែ ការធ្វើប្រសើរជាងមិនធ្វើ។ នៅពេលយើងធ្វើ មានអ្នកចូលរួមផ្ទាល់ មានការផ្សព្វផ្សាយ ទាំងផ្លូវការនិងមិនផ្លូវការ ដែលនឹងនាំព្រឹត្តិការណ៍នេះទៅដល់ប្រជាពលរដ្ឋចិន និងខ្មែរ និងមនុស្សលើពិភពលោកដែលគេអាចមើលឃើញ»។
លើសពីនេះទៀត លោក ប៊ុនថង ថ្លែងថា៖ «ការរៀបចំព្រឹត្តិការណ៍ទាំងនេះក៏សបញ្ជាក់ឲ្យឃើញថា ប្រទេសដែលរៀបចំសុទ្ធតែជាប្រទេសមានសន្តិសុខ សណ្ដាប់ធ្នាប់ល្អ និងមានសន្តិភាព ដែលខុសពីពាក្យចចាមអារ៉ាមដែលថាមានអសន្តិសុខ ការលួចប្លន់ ចាប់ជំរិត អីជាដើម»។
នៅឆ្នាំ២០២៤ កម្ពុជាទទួលបានភ្ញៀវទេសចរអន្តរជាតិ ៦,៧លាននាក់ កើនឡើងជិត ២៣ភាគរយ។ ក្នុងនោះ ភ្ញៀវទេសចរមានចំនួន ៨៤៨.៩៥២នាក់ ស្មើនឹង ១២ភាគរយ និងកើនឡើង ៥៥ភាគរយធៀបនឹងឆ្នាំ២០២៣។ នេះបើតាមស្ថិតិក្រសួងទេសចរណ៍។
