លោក ឆោម ឆើត ហៅ មេធីមយើង ផលិតវីដេអូពីការធ្វើទឹកត្នោតជូរ និងគ្រឿងក្លែមពីស្រែចម្ការទទួលបានការគាំទ្រច្រើនពីអ្នកប្រើប្រាស់បណ្ដាញសង្គម។ រូបថត សហការី
ខេត្ដពោធិ៍សាត់៖ ស្ថាបនិកពាក្យ «ធីមយើង» ឬ «ពេញលេងហើយធីមយើង» បានកសាងភាពល្បីល្បាញរបស់ខ្លួននៅលើបណ្ដាញសង្គមរហូតដល់មានអ្នកគាំទ្រនៅក្រៅប្រទេស ដោយសារតែការថតសកម្មភាពឡើងត្នោតសាមញ្ញៗផលិតជាទឹកត្នោតជូរ ជាភេសជ្ជៈមានសារជាតិស្រវឹងបែបប្រពៃណីខ្មែរមួយប្រភេទ។
ប្រធានក្រុម «ធីមយើង» ឈ្មោះពិត ឆោម ឆើត អាយុ ៣៦ឆ្នាំ នៅឃុំត្នោតជុំ ស្រុកក្រគរ ខេត្ដពោធិសាត់ បច្ចុប្បន្នមានអ្នកតាមដាន (followers) លើ Facebook ជិត ៤០០ខេ (៤០ម៉ឺនគណនី) និង TikTok មានអ្នកចុចចូលចិត្ដ (likes) ជាង ៥លានគណនី។
ពេលសួរថា «ឆើត ឯងល្បីដោយសារអ្វីដែរ?» យុវជនដែលនិយាយបញ្ចូលដោយសំណើចរូបនេះបានតបវិញថា «ដោយសារឡើងត្នោត»។
លោក ឆើត បាននិយាយថា៖ «ខ្ញុំផលិតវីដេអូបង្ហោះលើបណ្ដាញសង្គមលេងៗ មិននឹកស្មានថា មានអ្នកចូលមើលច្រើនរហូតដល់ផ្ទុះខ្លាំងយ៉ាងនេះសោះ។ ខ្ញុំថតសកម្មភាពឡើងត្នោត ធ្វើទឹកត្នោតជូរ ធ្វើគ្រឿងក្លែម»។
ប្រជាប្រិយភាពនៅលើបណ្ដាញសង្គមនេះ បានផ្ដល់ចំណូលមួយផ្នែកដល់យុវជន ឆោម ឆើត គួបផ្សំនឹងការលក់ទឹកត្នោតជូរ និងគ្រឿងក្លែមបែបស្រុកស្រែ។
លោកបានរំឭកថា កាលពីឆ្នាំមុន ស្រាប់តែមានបងប្អូនខ្មែរមកពីអូស្ដ្រាលី អាមេរិកមកដល់ផ្ទះ ដែលបង្កការភ្ញាក់ផ្អើលចំពោះការគាំទ្ររបស់មហាជនចំពោះអ្នកបង្កើតមាតិកាឡើងត្នោតរូបនេះ។
ភាពល្បីល្បាញនៅលើបណ្ដាញសង្គមមិនត្រឹមតែធ្វើឱ្យមហាជនស្គាល់ ឆោម ឆើត ប៉ុណ្ណោះទេ ប៉ុន្ដែវាបានកែប្រែជីវិតរបស់យុវជនដែលបន្ដនៅលីវរហូតដល់ពេលនេះទៀត។
តើលោក ឆោម ឆើត ដែលអ្នកគាំទ្រ ឬអ្នកប្រើប្រាស់បណ្ដាញសង្គមតែងតែបានឮពាក្យនិយាយតៗគ្នាថា «ពេញលេងហើយធីមយើង» រហូតដល់តារាចម្រៀងរ៉េប VannDa យកទៅនិយាយលើឆាកតន្ដ្រីថែមទៀតនោះ ជានរណា?
ថ្វីដ្បិតតែការបង្កើតប្រជាប្រិយភាពរហូតដល់អ្នកមានឥទ្ធិពលលើបណ្ដាញសង្គម (influencers, content creators) និងសិល្បករជាច្រើនមកគាំទ្រផលិតផលទឹកត្នោតជូរ ជាពិសេស ចង់ជួបផ្ទាល់ជាមួយមេធីមយើងយ៉ាងណាក៏ដោយ ក៏លោក ឆើត ឆ្លងកាត់ជីវិតជូរចត់ក្នុងនាមជាពលករចំណាកស្រុកខុសច្បាប់។
លោក ឆើត បានប្រាប់ភ្នំពេញប៉ុស្ដិ៍ថា៖ «ដោយគ្មានគោលដៅជីវិតច្បាស់លាស់ ខ្ញុំសម្រេចចិត្ដតាមមេខ្យល់ធ្វើការងារចំណាកស្រុកដោយខុសច្បាប់ទៅកាន់ប្រទេសជិតខាង។ ការធ្វើដំណើរឆ្លងដែនដោយខុសច្បាប់ ជាបទពិសោធជីវិតដ៏សែនលំបាកមួយដែលមិនអាចបំភ្លេចបាន។ យើងត្រូវជិះប្រជ្រៀតគ្នាដោយអង្គុយលើគ្នាបីនាក់ ដែលឡានមួយគ្រឿង យើងត្រូវជិះប្រមាណ ៣០នាក់ឯងនោះ»។
លោកបានបន្ដថា៖ «ទម្រាំតែមានឱកាសបានឆ្លងដែន យើងត្រូវដេកក្នុងព្រៃពីរបីថ្ងៃ និងចាប់ផ្ដើមការងារជាកម្មករសំណង់នៅថៃរយៈពេល ៣ឆ្នាំ។ ការងារយូរពេក ខ្ញុំក៏នឹកឃើញចង់ធ្វើការនៅរោងចក្រម្ដង និងទាក់ទងមេខ្យល់ គេយកម្នាក់ ១.២លានរៀល»។
គោលបំណងផ្លាស់ប្ដូរការងារមិនទទួលជោគជ័យនោះទេ ដោយមេខ្យល់យកលោក និងពលករដទៃទៅដាក់ចូលនៅផ្ទះសំណាក់ជាច្រើនថ្ងៃ មុនពេលគេយកមកទម្លាក់នៅ ឡុងគឿ រហូតដល់មានអ្នកយកអាសាបញ្ជូលរូបទៅធ្វើការ និងមានសោហ៊ុយធ្វើដំណើរទៅក្រុងបាងកកធ្វើការក្នុងរោងចក្រផលិតបន្ទះថាមពលអាគុយ។
ពេលមកលេងស្រុកដើម្បីចូលរួមពិធីបុណ្យចូលឆ្នាំប្រពៃណីជាតិកាលពីឆ្នាំ២០២៣ លោក ឆើត លែងមានបំណងចង់ធ្វើការសំណាកស្រុក និងនឹកឃើញចង់ចាប់របរចាស់ជាអ្នកឡើងត្នោតចិញ្ចឹមជីវិត។
ក្រៅពីឡើងត្នោត លោក ឆើត ក៏ចង់បង្ហាញពីសកម្មភាពរបស់ខ្លួនលើបណ្ដាញសង្គម ដោយប្រើប្រាស់ទូរស័ព្ទចាស់ថតការឡើងត្នោត ដែលមានការគាំទ្រជាបន្ដបន្ទាប់។
វីដេអូដែលទទួលបានការពេញនិយមបំផុត គឺឆាក្ដៅសាច់កណ្ដុរជាមួយក្លើរបស់លោកដោយបាននិយាយក្នុងវីដេអូឃ្លីបនោះថា «សួស្ដី ធីមទឹកត្នោតយើងទាំងអស់គ្នា គ្រឿងក្លែមយើងឆ្អិនហើយ» ស្រាប់តែក្លើរបស់លោកអង្គុយបះជើងច្រូង។ វីដេអូនេះបានធ្វើឱ្យមេធីមយើង លោក ឆើត ក្លាយជាតារា Facebook និង TikTok មួយរូប។
ដៃកាន់កែវទឹកត្នោតជូរ លោក ឆើត បាននិយាយថា៖ «នៅស្រុកខ្មែរ មានតែខ្ញុំមួយ ដែលបង្កើតមាតិកាឡើងត្នោត ធ្វើទឹកត្នោតជូរ ដោយអ្នកខ្លះសរសេរថា ពួកគាត់អត់ដឹងពីរបៀបធ្វើទឹកត្នោត។ បងប្អូនខ្មែរនៅអាមេរិក ក៏បានសរសេរពីការនឹករឭកអតីតកាលរបស់គាត់»។
លោកបានឱ្យដឹងថា ពាក្យ «ពេញលេងហើយធីមយើង» កើតឡើងពីការនិយាយលេងជាមួយសមាជិកដោយបានហៅកៀរគរមកចូលរួមសប្បាយជាមួយសកម្មភាពរបស់លោកលើបណ្ដាញសង្គម។
លោកបាននិយាយថា៖ «ពាក្យនេះ ខ្ញុំនិយាយលេធម្មតាថា (ពេញលេងហើយធីមយើង ថ្ងៃនេះ គ្រឿងក្លែមយើងបរបូណ៌សម្បើម) ចេះតែនិយាយលេង យូរៗ គេងយកទៅនិយាយតាមយើងតៗគ្នា។ ធ្វើបែបនេះ គ្រាន់តែចង់បង្កើតបរិយាកាសសប្បាយ ជួបជុំអ្នកស្រុកអ្នកភូមិ ក្រោយពីការងារ»។
លោក ឆើត នៅតែបន្ដផលិតវីដេអូបង្ហោះលើបណ្ដាញសង្គមបែបអ្នកស្រុកស្រែ និងតាមរដូវកាល ដែលភាគច្រើនឆក់ចិត្ដមហាជន ជាពិសេស ពលរដ្ឋខ្មែររស់នៅឯនាយសមុទ្រ។
បច្ចុប្បន្ននេះ ដោយសារតែមមាញឹកក្នុងការទទួលភ្ញៀវមកទទួលទានទឹកត្នោតជូរ និងចង់ជួបជាមួយមេធីមយើង លោក ឆើត មិនមានពេលវេលាឡើងត្នោតនោះទេ ដោយផលិតផលទឹកត្នោតជូរលក់ប្រចាំថ្ងៃរបស់លោក ជាការទទួលទិញពីអ្នកឡើងត្នោតក្នុងភូមិ។
លោកប្រមូលទិញទឹកត្នោតជូរពីអ្នកឡើងត្នោត ៣នាក់ក្នុងសហគមន៍ ដែលអាចផ្គត់ទឹកត្នោតជូរម្នាក់ពី ៣ ទៅ ៦កានក្នុងមួយថ្ងៃ។ ប៉ុន្ដែរសជាតិទឹកត្នោតជូរ ត្រូវតែគោរពតាមស្ដង់ដារបស់លោក ឆើត ដែលលោកដឹងថា អតិថិជនត្រូវការរសជាតិជូរផ្អែម និងមិនប្រើប្រាស់មេអ្វីលើសពីធម្មជាតិ។
អ្នកឡើងត្នោតដ៏រស់រាយរូបនេះ ក៏ប្រមូលទិញត្រឡនតនពីក្មេងៗក្នុងភូមិ ទិញមាន់ទា ដែលបង្កើនចំណូលតិចតួចដល់សហគមន៍។
លោក ឆើត ទទួលស្គាល់ថា ការផលិតមាតិកាទឹកត្នោតជូរ ក៏ទទួលរងការរិះគន់ពីសំណាក់អ្នកប្រើប្រាស់បណ្ដាញសង្គមផងដែរ ដោយចោទប្រកាន់ថា លោកផ្សព្វផ្សាយគ្រឿងស្រវឹង។
លោកអះអាងថា ការផលិតទឹកត្នោតជូរជាកេរតំណែលដូនតាខ្មែរមួយដែរ ហើយលោកអាចជួយបន្ថែមប្រាក់ចំណូលដល់អ្នកភូមិមួយផ្នែកដែរ។
លោក ឆើត បានប្រាប់ភ្នំពេញប៉ុស្ដិ៍ថា៖ «ខ្ញុំមិនគិតទេ។ ខ្វះអី នៅស្រុកខ្មែរ អ្នកផ្សព្វផ្សាយគ្រឿងស្រវឹង។ តែស្រុកខ្មែរ មានតែខ្ញុំមួយ ដែលផ្សព្វផ្សាយទឹកត្នោតជូរធម្មជាតិ។ ខ្ញុំអត់ខ្វល់ទេ។ បើទីផ្សារដើរល្អ យើងជួយអ្នកភូមិបានទៀត។ ក្មេងៗមានលុយចាយទៅរៀន ដោយការលក់ត្រឡនតន ហើយអ្នកស្រុកមានចំណូលពីការលក់ផលិតផលកសិកម្មរបស់គាត់ដែរ»៕
