ឯកឧត្តម Wang Wentian ឯកអគ្គរដ្ឋទូតចិនប្រចាំព្រះរាជាណាចក្រកម្ពុជា។
ភ្នំពេញៈ លោក Wang Wentian ឯកអគ្គរដ្ឋទូតចិនប្រចាំកម្ពុជាបានលើកឡើងថាចំណងមិត្តភាពចិន និងកម្ពុជាបានក្លាយជាគំរូដែលជឿទុកចិត្តគ្នាទៅវិញទៅមកខាងនយោបាយ ហើយលោកជឿជាក់ថា ប្រទេសទាំង ២ នឹងបន្តបោះសន្ទុះទៅកាន់ដំណាក់កាលថ្មីមួយទៀត។
លោកបានថ្លែងដូច្នេះតាមសុន្ទរកថាក្នុងឱកាសរំឭកខួបលើកទី ៧២ នៃការបង្កើតសាធារណរដ្ឋប្រជាមានិតចិនដែលបានផ្សព្វផ្សាយដោយស្ថានទូតចិនប្រចាំកម្ពុជានៅថ្ងៃទី ១ ខែតុលា នេះ។
លោក Wang Wentian ថ្លែងថា៖ «ចំណងមិត្តភាពចិន និងកម្ពុជាទទួលបានផលដើមរដូវ ក្លាយជាគំរូដែលមានការជឿទុកចិត្តគ្នាទៅវិញទៅមកខាងនយោបាយ ផ្តល់អត្ថប្រយោជន៍ទៅវិញទៅមក និងកិច្ចសហប្រតិបត្តិការ គោរពគ្នាទៅវិញទៅមក ការផ្សារភ្ជាប់គ្នារវាងបេះដូងប្រជាជន និងកិច្ចសហប្រតិបត្តិការសន្តិសុខជាដើម»។
លោកថ្លែងទៀតថា៖ «[ខ្ញុំ] ជឿជាក់ថាក្រោមការដឹកនាំជាយុទ្ធសាស្ត្ររបស់ថ្នាក់ដឹកនាំនៃប្រទេសទាំង ២ និងក្រោមកិច្ចខិតខំប្រឹងប្រែងរួមគ្នារបស់ប្រជាជនទាំង ២ ភាពជាដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ និងកិច្ចកសាងសហគមន៍វាសនារួមគ្នារវាងចិន-កម្ពុជានឹងបន្តបោះសន្ទុះទៅកាន់ដំណាក់កាលថ្មីមួយទៀត»។
លោក Wang Wentian រំឭកថា ចំណងមិត្តភាពដែកថែបរវាងចិន និងកម្ពុជាទទួលបានការលើកកម្ពស់ឥតឈប់ឈរក្នុងកិច្ចសហប្រតិបត្តិការប្រយុទ្ធប្រឆាំងនឹងជំងឺកូវីដ ១៩ និង ការជំរុញអភិវឌ្ឍរួម។ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ បានព្រះរាជទានជំនួយដល់កិច្ចទប់ស្កាត់ជំងឺវីរុសក្នុងប្រទេសចិន។ លោកនាយករដ្ឋមន្ត្រី ហ៊ុន សែន បានបំពេញទស្សនកិច្ចជាបន្ទាន់ទៅកាន់ប្រទេសចិនក្នុង «ដំណើរបញ្ច្រាស» ។
លោកបន្តថា ភាគីចិនបានចាត់បញ្ជូនក្រុមអ្នកជំនាញទប់ស្កាត់ជំងឺវីរុស និងផ្តល់វ៉ាក់សាំងមកកាន់កម្ពុជាជាអាទិភាព។ កម្មវិធីចាក់វ៉ាក់សាំងនិទាឃរដូវ (Spring Vaccination) ត្រូវបានអនុវត្តស្ទើរតែគ្រប់ខេត្តទូទាំងប្រទេសកម្ពុជា។
លោក Wang Wentian អះអាងថា សកម្មភាពដ៏កក់ក្តៅនីមួយៗត្រូវបានបង្ហាញយ៉ាងច្បាស់អំពីអត្ថន័យស្នូលនៃសហគមន៍វាសនារួមរវាងចិន និងកម្ពុជា។ កិច្ចសហប្រតិបត្តិការជាក់ស្តែងក្នុងវិស័យសេដ្ឋកិច្ច និងពាណិជ្ជកម្មរវាងប្រទេសទាំង ២ មានកំណើន ទោះបីជារងផលប៉ះពាល់នៃជំងឺវីរុសក៏ដោយ។
លោកលើកឡើងទៀតថា គម្រោងសំខាន់ៗក្នុងកិច្ចសហប្រតិបត្តិការខ្សែក្រវាត់ និងផ្លូវមានដូចជាតំបន់សេដ្ឋកិច្ចពិសេសខេត្តព្រះសីហនុ ផ្លូវល្បឿនលឿនភ្នំពេញ-ក្រុងព្រះសីហនុ អាកាសយានដ្ឋានអន្តរជាតិសៀមរាបអង្គរថ្មីជាដើមត្រូវបានជំរុញយ៉ាងរលូន។ កសិផលកម្ពុជាដែលមានគុណភាពខ្ពស់ជាច្រើនត្រូវបាននាំចេញទៅកាន់ទីផ្សារប្រទេសចិនឥតឈប់ឈរមានដូចជាអង្ករ ផ្លែចេក ផ្លែស្វាយជាដើម។
លោក Wang Wentian ថ្លែងដូច្នេះថា៖ «ប្រទេសទាំង ២ បានសម្របសម្រួលយ៉ាងស្អិតរមួត និងគាំទ្រគ្នាទៅវិញទៅមក បង្ហាញពីសំឡេងយុត្តិធម៌ និងសច្ចធម៌លើបញ្ហាដែលពាក់ព័ន្ធនឹងផលប្រយោជន៍ស្នូលរវាងគ្នា និងគ្នា និងជាចំណាប់អារម្មណ៍រួម»៕
