បសស ណែនាំមន្ត្រីមិនឱ្យផ្ដល់សេវាជូនដល់អ្នកដែលមិនបានបង្ហាញបណ្ណចាក់វ៉ាក់សាំង។ ហុង មិនា
ភ្នំពេញៈ បេឡាជាតិរបបសន្តិសុខសង្គម (បសស) នៃក្រសួងការងារ និងបណ្តុះបណ្តាលវិជ្ជាជីវៈបានណែនាំដល់គ្រប់ទីស្នាក់ការ (បសស) ទូទាំងរាជធានី-ខេត្តមិនត្រូវផ្តល់សេវាជូនកម្មករនិយោជិត ឬពលរដ្ឋដែលមិនបង្ហាញបណ្ណចាក់វ៉ាក់សាំងបង្ការជំងឺកូវីដ ១៩ ទេ។
បសស កាលពីថ្ងៃទី ១០ ខែតុលា បានជូនដំណឹងដល់នាយក ឬម្ចាស់សហគ្រាសគ្រឹះស្ថាន និងកម្មករនិយោជិត ព្រមទាំងសាធារណជនទាំងអស់ត្រូវតែបង្ហាញបណ្ណចាក់វ៉ាក់សាំងកូវីដ ១៩ រាល់ពេលទៅរកសេវា (បសស) នៅតាមទីតាំងភ្នាក់ងាររបស់ខ្លួនបើពុំនោះទេនឹងមិនផ្តល់សេវាជូនឡើយ។
បសស បន្តថា៖ «ចាប់ពីថ្ងៃជូនដំណឹងនេះតទៅ រាល់ពេលលោក លោកស្រីមកទទួលសេវានៅគ្រប់ទីស្នាក់ការ បសស ទូទាំងរាជធានី-ខេត្ត ខណ្ឌទាំងអស់ត្រូវបង្ហាញបណ្ណចាក់វ៉ាក់សាំងកូវីដ ១៩ ឬ បណ្ណចាក់វ៉ាក់សាំងបង្ការជំងឺកូវីដ ១៩ ឬ លិខិតបញ្ជាក់ការចាក់វ៉ាក់សាំងបង្ការជំងឺកូវីដ ១៩»។
បើតាម បសស ការណែនាំនេះដោយយោងតាមសេចក្តីណែនាំរបស់សាលារាជធានី-ភ្នំពេញកាលពីថ្ងៃទី ៥ ខែតុលា ដោយតម្រូវឱ្យពលរដ្ឋបង្ហាញបណ្ណចាក់វ៉ាក់សាំងកូវីដ ១៩ ឬលិខិតបញ្ជាក់ការចាក់វ៉ាក់សាំងរាល់ពេលចេញ-ចូលគ្រឹះស្ថានសិក្សា ផ្សារ និងទីតាំងអាជីវកម្មដ្ឋាននានាក្នុងភូមិសាស្ត្ររាជធានី ដើម្បីគ្រប់គ្រងការរីករាលដាលនៃជំងឺរាតត្បាតនេះឱ្យកាន់តែមានប្រសិទ្ធភាព។
រដ្ឋបាលរាជធានីភ្នំពេញបន្តថា៖ «ប្រសិនបើមានបុគ្គលណាម្នាក់មិនព្រមសហការបង្ហាញបណ្ណចាក់វ៉ាក់សាំង ដាច់ខាតមិនត្រូវអនុញ្ញាតឱ្យចូលក្នុងទីតាំង ឬទីកន្លែងរបស់ខ្លួនឡើយ និងត្រូវរាយការណ៍ទៅអាជ្ញាធរក្បែរនោះជាបន្ទាន់»។
នាយករងអង្គការសិទ្ធិមនុស្សលីកាដូ (LICADHO) លោក អំ សំអាត យល់ថា លក្ខខណ្ឌរបស់ បសស នាពេលនេះចង់ជំរុញទាំងកម្មករ និងអ្នកដែលមានបណ្ណ បសស ឱ្យចូលរួមចាក់វ៉ាក់សាំងបង្ការជំងឺកូវីដ-១៩ឱ្យបានគ្រប់ៗគ្នា។ ប៉ុន្តែលោកបន្តថា ការធ្វើបែបនេះធ្វើឱ្យប៉ះពាល់ដល់ការទទួលបានសេវាសាធារណៈរបស់ប្រជាជន។ ទោះយ៉ាងណាលោកជឿថា៖ «មកដល់ពេលនេះប្រជាពលរដ្ឋស្ទើរគ្រប់គ្នាហើយទទួលបានការចាក់វ៉ាក់សាំងកូវីដ ១៩»។
លោកថ្លែងថា ការទទួលបានសេវាសុខភាពសាធារណៈ ពលរដ្ឋគួរទទួលបានដូចៗគ្នា ដោយសារអ្នកដែលមានបណ្ណ បសស គឺពួកគេក៏មានកាតព្វកិច្ចបង់សេវានេះផងដែរ។
លោកថា៖ «តែបើមើលទិដ្ឋភាពទូទៅវិញ ការផ្តល់សេវាសាធារណៈដល់ប្រជាពលរដ្ឋ ទោះបីជាមានបណ្ណ ឬមិនមានបណ្ណចាក់វ៉ាក់សាំងក៏ដោយ ពលរដ្ឋត្រូវតែទទួលបានការព្យាបាលផ្នែកសុខភាពសាធារណៈដូចគ្នា ជាពិសេសទាក់ទង បសស គឺពលរដ្ឋមានការបង់សេវាសម្រាប់ បសស»។
បើតាមរបាយការណ៍របស់ក្រសួងសុខាភិបាលគិតត្រឹមថ្ងៃទី ១០ ខែតុលា ឆ្នាំ ២០២១ ប្រជាពលរដ្ឋដែលមានអាយុចាប់ពី ៦ ឆ្នាំឡើង សរុបជាង ១៣ លាននាក់ ឬស្មើនឹង ៨៤,៣៣% ធៀបនឹងគោលដៅចំនួន ១៦ លាននាក់បានទទួលការចាក់វ៉ាក់សាំង៕
វីដេអូ៖
