ផ្ទះពលរដ្ឋនៅស្រុកបន្ទាយមាស ខេត្តកំពត ដែលបាក់រលំដោយសារខ្យល់កន្ត្រាក់ កាលពីថ្ងៃទី ២០ តុលា។ រូបថត ហ្វេសប៊ុក
កំពតៈ យ៉ាងហោចណាស់មានមនុស្ស៣នាក់បានរងរបួស និងផ្ទះជិត ៧០ ខ្នងបានរងការខូចខាតដោយសារភ្លៀងលាយឡំខ្យល់កន្ត្រាក់នៅស្រុកបន្ទាយមាស ខេត្តកំពត ខណៈនៅស្រុកសង្កែខេត្តបាត់ដំបង មានករណីរន្ទះបាញ់ងាប់គោ ១១ ក្បាល កាលពីថ្ងៃទី ២០ ខែ តុលា ឆ្នាំ ២០២១។ នេះបើតាមការអះអាងពីអាជ្ញាធរមូលដ្ឋាននៃខេត្តទាំង ២។
លោក ជុំ សារឿន នាយករដ្ឋបាលស្រុកបន្ទាយមាស ខេត្តកំពត បានប្រាប់ ភ្នំពេញ ប៉ុស្តិ៍ថា ករណីភ្លៀងខ្យល់លាយឡំនឹងផ្គររន្ទះកាលពីល្ងាចថ្ងៃពុធ បានបង្កឲ្យពលរដ្ឋចំនួន ៣ នាក់រងរបួសធ្ងន់ស្រាល និងបានបង្កឲ្យផ្ទះពលរដ្ឋសរុប ៦៩ ខ្នងនៅឃុំចំនួន ៣ គឺឃុំស្ដេចគង់ខាងត្បូង, ឃុំស្ដេចគង់ខាងជើង និងស្ដេចគង់ខាងលិច បានរងការខូចខាត ក្នុងនោះមាន ២៦ ខ្នងបានបាក់រលំដួលដល់ដី និង ៤៣ ខ្នងផ្ទះទៀត បានប៉ើងរបើកដំបូល ខូចខាតស្រាល។ ក្រៅពីនោះបានបង្កផលប៉ះពាល់ដល់ដំណាំហូបផ្លែរបស់ពលរដ្ឋ ដូចជា ចេក ល្ហុង ខ្នុរ ដូង ស្វាយ ជាច្រើនរយដើមផងដែរ។
លោក សារឿន បានបញ្ជាក់ថា៖ «នៅពេលនេះ សមត្ថកិច្ចយើងកំពុងចុះជួយអន្តរាគមន៍ជួសជុលផ្ទះជូនប្រជាពលរដ្ឋដែលរងការខូចខាតដោយបាតុភូតភ្លៀង និងខ្យល់កន្ត្រាក់នេះរួចរាល់បានចំនួន ២០ ខ្នងផ្ទះផងដែរ»។
.jpg)
ចំណែកនៅឯខេត្តបាត់ដំបងក៏មានភ្លៀងលាយឡំផ្គររន្ទះផងដែរ កាលពីថ្ងៃទី ២០ តុលា ជាពិសេសនៅស្រុកសង្កែ។ លោក សុំ សុវណ្ណ អធិការស្រុកសង្កែបានប្រាប់ ភ្នំពេញ ប៉ុស្តិ៍ថា ក្រៅពីមានភ្លៀងខ្យល់បក់បោកខ្លាំងបង្កឲ្យប៉ើងដំបូល និងរលំផ្ទះរបស់អ្នកភូមិមួយចំនួននៅឃុំតាប៉ុន ក៏មានករណីរន្ទះបាញ់ងាប់គោរបស់អ្នកភូមិចំនួន ១១ ក្បាលផងដែរ។
លោកថ្លែងថា៖«ភ្លៀងកាលពីថ្ងៃម្សិលមិញខ្លាំង និងមានរន្ទះបាញ់ ៣-៤ លើកជាប់ៗគ្នា បណ្ដាលឲ្យងាប់គោអ្នកភូមិបឹងទឹម ក្នុងឃុំតាប៉ុនអស់ ១១ ក្បាល និងបានដួលរលំផ្ទះអស់ ៤ ខ្នង និងប៉ើងរបើកដំបូលចំនួន ១៥ ខ្នង ប៉ុន្តែមិនមាននរណាម្នាក់រងគ្រោះដល់អាយុជីវិតនោះទេ»។
យ៉ាងណាក៏ដោយ អាជ្ញាធរខេត្តបាត់ដំបង នៅថ្ងៃទី ២១ ខែ តុលា ឆ្នាំ ២០២១ បានអំពាវនាវឲ្យពលរដ្ឋ ដែលរស់នៅអមតាមដងស្ទឹងសង្កែបង្កើនការប្រុងប្រយ័ត្នសាជាថ្មីម្ដងទៀត ខណៈមានភ្លៀងធ្លាក់ខ្លាំងនៅផ្នែកខាងលើ ធ្វើឲ្យទឹកនៅក្នុងអាងទំនប់ពហុបំណងខេត្តបាត់ដំបង ជនឡើងដល់កម្រិត ដែលត្រូវបើកទ្វារទឹកដើម្បីរំដោះទឹកចេញ ការពារការបាក់ធ្លាយខ្នងទំនប់។
ដោយឡែកនៅឯក្រុងប៉ោយប៉ែត ខេត្តបន្ទាយមានជ័យ អាជ្ញាធរមូលដ្ឋានកំពុងបន្តកិច្ចអន្តរាគមន៍ ជម្លៀសពលរដ្ឋមកកាន់ទីទួលសុវត្ថិភាពបន្ទាប់ពីមានជំនន់ទឹកភ្លៀងហូរធ្លាក់ពីប្រទេសថៃតាមអូរព្រំដែនបង្កឲ្យមានការជន់លិចលំនៅឋានប្រជាពលរដ្ឋនៅតាមទីទំនាបជាប់ដងអូរសាជាថ្មីម្ដងទៀត។
លោក គាត ហ៊ុល អភិបាលក្រុងប៉ោយប៉ែត បានប្រាប់ ភ្នំពេញ ប៉ុស្តិ៍ថា នៅពេលនេះមានទឹកធ្លាក់ពីប្រទេសថៃចូលមកក្នុងអូរព្រំដែននៃប្រទេសកម្ពុជា បណ្ដាលឲ្យមានការជន់លិចជាថ្មីម្ដងទៀតនៅក្នុងភូមិមួយចំនួននៃសង្កាត់ប៉ោយប៉ែតនិងសង្កាត់ផ្សារកណ្ដាល ប៉ុន្តែនៅមិនទាន់ធ្ងន់ធ្ងរដូចកាលពីខែកញ្ញាកន្លងទៅថ្មីៗនេះទេ។
លោកបានបញ្ជាក់ថា៖ «ដើម្បីសុវត្ថិភាពប្រជាពលរដ្ឋ ដែលមានលំនៅឋានប្របជាប់មាត់អូរ កម្លាំងសមត្ថកិច្ចយើង បានជួយអន្តរាគមន៍ជម្លៀសមកកាន់ទីទួលសុវត្ថិភាព ជាបណ្ដើរៗ ដែលគិតមកទល់រសៀលថ្ងៃទី ២១ ខែ តុលា ឆ្នាំ ២០២១ មានចំនួនជាង ១៣០ គ្រួសារ»។
បើតាមលោក គាត ហ៊ុល អ្នកភូមិដែលត្រូវបានជម្លៀសទៅកាន់ទីទួលសុវត្ថិភាពនាពេលនេះ គឺជាប្រជាពលរដ្ឋ ដែលទើបតែត្រឡប់ពីទីទួលសុត្ថិភាពទៅកាន់លំនៅឋានរបស់ពួកគេវិញ ក្រោយពីទឹកបានស្រកអស់ពីមាត់អូរ កាលពី ២ សប្ដាហ៍មុន មិនមែនជាអ្នកថ្មីនោះទេ៕
