ភ្នំពេញៈ មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប ឬ CCF) បានបង្ក្រាប និងដកហូតអាល់កុលក្លែងក្លាយមេតាណុលចំនួន ១៥៧ ប៊ីដុង ឬស្មើ ៤ ៧១០ លីត្រ នាថ្ងៃទី ២៥ តុលា ដែលប្រភពនៃអាល់កុលក្លែងក្លាយនេះត្រូវបានសង្ស័យនាំចូលពីប្រទេសវៀតណាម។
កាលពីថ្ងៃទី ២៥ ខែ តុលា ឆ្នាំ ២០២១ មន្ត្រីជំនាញសាខា ក.ប.ប. រាជធានីភ្នំពេញ បានចុះប្រតិបត្តិការត្រួតពិនិត្យជាក់ស្តែងនៅទីតាំងផ្ទះ ដែលមានស្តុកទុកលក់ និងចែកចាយអាល់កុល ១ កន្លែង ដែលមានទីតាំងស្ថិតនៅសង្កាត់ចោមចៅ ខណ្ឌពោធិ៍សែនជ័យ ដើម្បីធានាបាននូវការការពារផលប្រយោជន៍ប្រជាពលរដ្ឋ ក៏ដូចជាសុខភាពរបស់ប្រជាពលរដ្ឋផងដែរ។
ក្រោយប្រតិបត្តិការ ក.ប.ប. បានរកឃើញនូវអាល់កុលប្រភេទមេតាណុលចំនួន ១៥៧ ប៊ីដុង ស្មើនឹង ៤ ៧១០ លីត្រ និងត្រូវបានដកហូត និងរក្សាទុកនៅទីតាំងផ្ទះខាងលើជាបណ្តោះអាសន្ន និង ចាត់ការទៅតាមនីតិវិធីច្បាប់ផងដែរ។
លោក ផាន អូន អគ្គនាយកនៃអគ្គនាយកដ្ឋាន ក.ប.ប. ប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែតុលាថា ក្រុមការងារនៃអគ្គនាយកដ្ឋានកំពុងបន្តការស្រាវជ្រាវ ដើម្បីស្វែងរកប្រភពនាំចូលនៃផលិតផលអាល់កុលក្លែងក្លាយទាំងនេះ។ តាមប្រភពព័ត៌មានបឋម ផលិតផលអាល់កុលក្លែងក្លាយនេះសង្ស័យថា មានប្រភពនាំចូលពីប្រទេសវៀតណាម។
លោកបញ្ជាក់ថា៖ «យើងកំពុងធ្វើការស្វែងរកបន្ថែមទៀត សម្រាប់ប្រភពដ៏ធំនៃការនាំចូលផលិតផលអាល់កុលមេតាណុលក្លែងក្លាយនេះ។ ដូច្នេះយើងមិនអាច បង្ហាញព័ត៌មានលម្អិតពាក់ព័ន្ធនឹងករណីនេះក្នុងពេលនេះបានច្រើននោះទេ»។
បើតាមលោក ផាន អូន អំឡុងពេលមានតម្រូវការអាល់កុលកើនឡើងខ្ពស់ ការចរាចរអាល់កុលក្លែងក្លាយ ដែលមានលាយជាមួយសារធាតុគីមីមេតាណុលលាយនឹងទឹកក៏មានការកើនឡើង។ សារធាតុមេតាណុល គឺជាសារធាតុពុល ហើយការប្រើប្រាស់មេតាណុលធ្វើជាសារធាតុសម្លាប់មេរោគ មិនត្រឹមតែមិនមាន ប្រសិទ្ធភាពសម្លាប់មេរោគប៉ុណ្ណោះទេ ប៉ុន្តែថែមទាំងបណ្តាលឱ្យប៉ះពាល់ដល់សុខភាពរបស់អ្នកប្រើប្រាស់។
ការបង្កឱ្យមានផលប៉ះពាល់ដល់សុខភាពនេះ ដូចជា បណ្តាលឱ្យរលាកស្បែក រលាកភ្នែក ឈឺក្បាល វិលមុខ ស្រវាំងភ្នែក ងងុយដេក បាត់បង់ស្មារតី ក្អួតចង្អោរ រំខានដល់ការរំលាយអាហារ។ លើសពីនេះ វាក៏អាចបណ្តាលឱ្យស្លាប់បាន ប្រសិនបើយកទៅលាយជាមួយស្រា សម្រាប់បរិភោគលើសកម្រិតដែលហាមឃាត់។
ដោយប្រឈមនឹងគ្រោះថ្នាក់បែបនេះ លោកអំពាវនាវឱ្យអាជីវករ ទាំងអ្នកលក់ដុំ អ្នកលក់រាយ ម្ចាស់ឱសថស្ថាន ម្ចាស់ផ្សារទំនើប និងអ្នកនាំចូលផលិតផលអាល់កុលទាំងអស់សូមប្រកបរបរអាជីវកម្ម លក់ដូរ ប្រកបដោយការទទួលខុសត្រូវប្រកាន់ខ្ជាប់នូវក្រមសីលធម៌ និងសុចរិតភាព ដោយគិតពីសុខុមាលភាពរបស់ប្រជាពលរដ្ឋ អ្នកប្រើប្រាស់ខ្ពស់ជាងការចំណេញលុយ។
បន្ទាប់មក មន្ត្រីជំនាញក៏បានស៊ើបអង្កេតទីតាំងឃ្លាំងស្តុកអាល់កុល ១ កន្លែង ទៀត។ នៅថ្ងៃទី ២៦ តុលា ដោយទទួលបានការអនុញ្ញាតពីព្រះរាជអាជ្ញាអមសាលាដំបូងរាជធានីភ្នំពេញ និងមានការចូលរួមពីមន្ត្រីនគរបាលប្រឆាំងបទល្មើសសេដ្ឋកិច្ចរាជធានីភ្នំពេញ អាជ្ញាធរខណ្ឌ និងសង្កាត់ មន្ត្រីអគ្គនាយកដ្ឋាន ក.ប.ប. បានចុះត្រួតពិនិត្យទីតាំងឃ្លាំងស្តុកទំនិញ ១ កន្លែងស្ថិតនៅសង្កាត់ដង្កោ ខណ្ឌដង្កោ ដោយបានរកឃើញអាល់កុលក្លែងក្លាយ ចំនួន ៣៧៥ ប៊ីដុង ស្មើនឹង ១១ ២៥០ លីត្រ។ លទ្ធផលសរុបក្នុងប្រតិបត្តិការបង្ក្រាបទាំង ២ ថ្ងៃ មន្ត្រីជំនាញបានរកឃើញ និងរឹបអូសអាល់កុលក្លែងក្លាយចំនួន ១៥ ៩៦០ លីត្រ ដើម្បីអនុវត្តនីតិវិធីបន្ត៕