ឧទ្យានុរក្សតំបន់រ៉ាមសារបឹងទន្លេឆ្មា បានរកឃើញសម្បុកអកត្រីក្បាលប្រផេះចំនួន ១០ នៅក្នុងខែតុលា។ រូបថត ក្រសួងព័ត៌មាន
ភ្នំពេញៈ ឧទ្យានុរក្សតំបន់រ៉ាមសារបឹងទន្លេឆ្មាបានរកឃើញសម្បុកអកត្រីក្បាលប្រផេះចំនួន ១០ នៅក្នុងខែតុលា។ អង្គការជីវិតធម្មជាតិនៅកម្ពុជាសង្ឃឹមថា សម្បុកសត្វនេះនឹងត្រូវបានរកឃើញច្រើនទៀត ព្រោះរដូវបន្តពូជឆ្នាំនេះមិនទាន់បានបញ្ចប់នៅឡើយ។
អង្គការជីវិតធម្មជាតិនៅកម្ពុជា នៅថ្ងៃទី ៥ ខែវិច្ឆិកា បានឱ្យដឹងថា អកត្រីក្បាលប្រផេះ គឺជាប្រភេទជិតទទួលរងការគំរាមកំហែងលើពិភពលោក។ សត្វនេះកំពុងមានការថយចុះនៅតំបន់មួយចំនួនដូចជាតាមដងទន្លេសេកុងជាដើម។
ដោយឡែកក្នុងខែតុលានេះ ឧទ្យានុរក្សតំបន់រ៉ាមសារបឹងទន្លេឆ្មាបានរកឃើញសម្បុកសត្វនេះចំនួន ១០ នៅតំបន់រ៉ាមសារ។
អង្គការនេះបានសរសេរនៅលើហ្វេសប៊ុកថា «យើងសង្ឃឹមថា សម្បុកសត្វនេះច្រើនទៀត នឹងត្រូវបានរកឃើញដោយហេតុថា រដូវបន្តពូជឆ្នាំនេះមិនទាន់បានបញ្ចប់ទេ»។
អង្គការនេះបានឱ្យដឹងទៀតថា ការកត់ត្រានេះបង្ហាញថា តំបន់ដីសើមបឹងទន្លេឆ្មានេះ គឺជាតំបន់ដ៏សំខាន់មួយដែលបាននិងកំពុងគាំទ្រដល់ការរស់នៅរបស់អកត្រីក្បាលប្រផេះនេះ។
អង្គការជីវិតធម្មជាតិនៅកម្ពុជាដោយមានការគាំទ្រថវិកាពី The European Union-Our Tonle Sap project បាននិងគាំទ្រដល់ការល្បាតរបស់ឧទ្យានុរក្សតំបន់រ៉ាមសារបឹងទន្លេឆ្មាក្នុងការអង្កេតតាមដានជីវចម្រុះ និងការអនុវត្តច្បាប់៕
