លោក ខៀវ កាញារីទ្ធ រដ្ឋមន្ត្រីក្រសួងព័ត៌មាននិងមន្ត្រីជំនាញវិស័យសារព័ត៌មាន ក្នុងពិធីបើកសិក្ខាសាលា។ រូបថត AKP
ភ្នំពេញៈ ក្រុមអ្នកជំនាញតំណាងឱ្យក្រសួងយុត្តិធម៌ ក្រសួងមហាផ្ទៃ អង្គការយូណេស្កូ និងអ្នកតំណាងឱ្យវិស័យព័ត៌មាននានានៅក្នុងស្រុកបានជួបពិភាក្សាគ្នានៅសណ្ឋាគារសុខាភ្នំពេញ កាលពីថ្ងៃទី ១៦ ខែវិច្ឆិកា ក្នុងសិក្ខាសាលាស្ដីពីការអនុវត្តវិជ្ជាជីវៈ ក្នុងការស្វែងរកការយល់គ្នាទៅវិញទៅមក ទៅលើឯករាជភាពនិងសេរីភាពសារព័ត៌មាននៅក្នុងក្របខ័ណ្ឌច្បាប់ រវាងអ្នកសារព័ត៌មាននិងមន្ត្រីរាជរដ្ឋាភិបាល ដើម្បីជាផលប្រយោជន៍នៃលទ្ធិប្រជាធិបតេយ្យនៅកម្ពុជា។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានថ្លែងទៅកាន់សិក្ខាសាលានេះថា កន្លងមកមានអ្នកសារព័ត៌មាន និងអ្នកធ្វើការផ្នែករដ្ឋបាលនៅតាមក្រសួងស្ថាប័នខ្លះមិនមានការយល់ពីគ្នាដែលធ្វើឱ្យមានការស្តីបន្ទោសគ្នាទៅវិញទៅមក រហូតដល់ចោទប្រកាន់លើរាជរដ្ឋាភិបាលដែលមិនដឹងមូលហេតុក៏មាន។
លោក ខៀវ កញ្ញារីទ្ធ ថ្លែងថា៖ «អ្នកសារព័ត៌មានដែលមានវិជ្ជាជីវៈ និងមានចំណេះដឹងខ្ពស់គឺជាអ្នកដែលអាចជួយដល់ប្រជាជនផង និងក៏ជាស្ពានសម្រាប់ពលរដ្ឋ និងរាជរដ្ឋាភិបាល នេះជាគំនិតរបស់សម្តេចតេជោនាយករដ្ឋមន្ត្រី ប៉ុន្តែដោយសារការមិនយល់គ្នាធ្វើឱ្យមានភាពល្អក់កករ រហូតដល់ធ្វើឱ្យមានការចោទរាជរដ្ឋាភិបាលដែលជាការពិតគឺជាការងារឯកជន ឬជាការសម្រេចដោយឡែកពីគ្នា»។
លោក ខៀវ កញារីទ្ធ បានអះអាងថា សិក្ខាសាលានេះធ្វើឡើងដើម្បីធ្វើការឈ្វេងយល់ពីគ្នាទៅវិញទៅមក ដែលត្រូវឈ្វេងយល់ថា តើចំណុចណាមិនល្អហើយគួរឱ្យអ្នកសារព័ត៌មានស្ថិតនៅក្នុងកម្រិតណា និងអ្នករដ្ឋបាលត្រូវសួរអ្នកសារព័ត៌មានថាតើចំណុចណាខ្លះដែលខ្លួនត្រូវធ្វើ។
លោក ខៀវ កញារីទ្ធ ថ្លែងថា៖ «ថ្ងៃនេះ អាចចាត់ថាទិវាជាប្រវត្តិសាស្ត្រនៅកម្ពុជា ដែលអ្នកកាសែតកម្ពុជា អាជ្ញាធរតុលាការកម្ពុជា និងអាជ្ញាធរនីតិប្រតិបត្តិកម្ពុជា ជួបជុំដើម្បីពិគ្រោះគ្នា ពីរបៀបទំនាក់ទំនង ការងារជាមួយគ្នា ដើម្បីជាផលប្រយោជន៍នៃលទ្ធិប្រជាធិបតេយ្យនៅកម្ពុជា តាមបែបកម្ពុជា»។
លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានឱ្យដឹងដែរថា អ្នកសារព័ត៌មាន មានកាតព្វកិច្ចគោរពគោលការណ៍ចាំបាច់មួយចំនួនដូចជា គោរពសច្ចធម៌និងគោរពសិទ្ធិយល់ដឹងនូវសច្ចធម៌របស់សាធារណជន ដែលត្រូវផ្សាយដំណឹងទាំងឡាយដោយសុច្ចរិត ព្រមទាំងធ្វើការអត្ថាធិប្បាយ ឬរិះគន់ឱ្យត្រឹមត្រូវ និងសមស្របតាមគតិ យុត្តិធម៌ និងត្រូវរាយការណ៍តែតាមហេតុការណ៍ដែលខ្លួនដឹងពីប្រភពដើមតែប៉ុណ្ណោះ ជាពិសេសអ្នកសារព័ត៌មានមិនត្រូវបំបាត់ចោលនូវព័ត៌មានសំខាន់ៗ ឬក្លែងបន្លំឯកសារផ្សេងឡើយ៕
