លោក លី ធុជ ក្នុងជំនួបជាមួយភាគីអង្គការជប៉ុនពីថ្ងៃទី ២៩ វិច្ឆិកា ។ រូបថត CMAA
ភ្នំពេញៈ អនុប្រធានទី១ នៃអាជ្ញាធរមីនកម្ពុជា លោក លី ធុជ បានជំរុញឱ្យអង្គការ Japan Mine Action Service (JMAS) បន្តគាំទ្រដល់ការងារបោសសម្អាតមីនមនុស្សធម៌នៅកម្ពុជាដោយត្រូវសហការយ៉ាងជិតស្និទ្ធជាមួយអាជ្ញាធរមីននិងមជ្ឈមណ្ឌលសកម្មភាពកំចាត់មីនកម្ពុជា (CMAC) ដើម្បីឱ្យបញ្ចប់ការងារបោសសម្អាតមីននៅឆ្នាំ ២០២៥។
នៅក្នុងជំនួបពិភាក្សាការងារពាក់ព័ន្ធនឹងវិស័យមីននៅកម្ពុជាជាមួយលោក YOSHIOKA Yoshito ប្រធានអង្គការ JMAS ប្រចាំកម្ពុជា (ថ្មី) នៅទីស្នាក់ការអាជ្ញាធរមីននៅថ្ងៃទី ២៩ ខែ វិច្ឆិកា ឆ្នាំ ២០២១ លោក លី ធុជ បានវាយតម្លៃខ្ពស់ចំពោះទំនាក់ទំនងជាប្រវត្តិសាស្ត្ររវាងរាជរដ្ឋាភិបាលនិងប្រជាជននៃប្រទេសទាំង ២ និងជំរុញឱ្យអង្គការនេះគាំទ្រនិងសហការបោសសម្អាតនៅកម្ពុជាឱ្យចប់តាមផែនការ។
លោកក៏បានថ្លែងអំណរគុណយ៉ាងជ្រាលជ្រៅជូនចំពោះរាជរដ្ឋាភិបាល និងប្រជាជនជប៉ុនដែលបានចូលរួមគាំទ្រស្វែងរកសុខសន្តិភាព និងការអភិវឌ្ឍជូនដល់ប្រជាជននិងប្រទេសកម្ពុជាដែលក្នុងនោះជប៉ុនបានចូលរួមយ៉ាងសកម្មដល់ការងារសកម្មភាពមីនមនុស្សធម៌នៅកម្ពុជាដើម្បីផ្តល់ដីសម្រាប់បង្កបង្កើនផលជួយសង្គ្រោះអាយុជីវិតនិងលើកកម្ពស់ជីវភាពរស់នៅរបស់ប្រជាជនកម្ពុជា។
លោក លី ធុជ ក៏បានលើកឡើងពីសមិទ្ធផលសម្រេចបាននៃការងារបោសសម្អាតមីនផងដែរ បន្ទាប់ពីការដួលរលំនៃរបបកម្ពុជាប្រជាធិបតេយ្យដែលរាជរដ្ឋាភិបាលកម្ពុជាបានចាត់ការងារបោសសម្អាតមីនជាការងារអាទិភាពមួយក្នុងកិច្ចគាំពារសន្តិភាពនិងការអភិវឌ្ឍជូនជាតិមាតុភូមិដោយបានដាក់ចេញចក្ខុវិស័យយ៉ាងច្បាស់លាស់ដើម្បីបញ្ចប់ការងារបោសសម្អាតមីនឱ្យអស់ត្រឹមឆ្នាំ២០២៥ ។
លោកបានពន្យល់ថា៖ «ការដាក់ចេញចក្ខុវិស័យនេះដូចមានចែងក្នុងផែនការយុទ្ធសាស្ត្រជាតិសកម្មភាពមីន ២០១៨-២០២៥ ព្រមទាំងបាននិងកំពុងខិតខំរិះរកនូវវិធីសាស្ត្រកាត់បន្ថយផ្ទៃដីក៏ដូចជាកាត់បន្ថយការប្រើប្រាស់ធនធានបោសសម្អាតមីនដោយសហការជាមួយប្រទេសជាមិត្ត និងដៃគូអភិវឌ្ឍន៍»។
ក្នុងជំនួបនេះដែរ លោក YOSHIOKA Yoshito បានសម្តែងនូវក្តីរីករាយចំពោះកិច្ចសហប្រតិបត្តិការរវាងអង្គការ (JMAS) និងអង្គភាព CMAC លើការងារបោសសម្អាតមីននិងសំណល់ជាតិផ្ទុះពីសង្គ្រាម ហើយលោកក៏បានសម្តែងក្តីរីករាយចំពោះផ្លែផ្កាដែលជាលទ្ធផលនៃការអនុវត្តគម្រោងដែលកំពុងដំណើការនៅខេត្តបន្ទាយមានជ័យ និងខេត្តស្ទឹងត្រែង។
លោកបន្ថែមថា នៅក្នុងអាណត្តិរបស់លោកនេះ លោកនឹងបន្តពង្រឹងនិងពង្រីកនៅកិច្ចសហប្រតិបត្តិការ ការគាំទ្រអង្គភាព CMAC លើការងារបោសសម្អាតមីន និងសំណល់ជាតិផ្ទុះពីសង្គ្រាមផ្ដល់សុខសុវត្ថិភាពជូនប្រជាពលរដ្ឋនិងគាំទ្រការអភិវឌ្ឍក្រោយបោសសម្អាតមីនរួចនៅកម្ពុជា។
រដ្ឋាភិបាលកម្ពុជាបានដាក់ចេញនូវចក្ខុវិស័យប្រែក្លាយផែនការយុទ្ធសាស្ត្រជាតិសកម្មភាពកំចាត់មីនឱ្យសម្រេចគោលដៅឆ្នាំ២០២៥ដោយត្រូវបញ្ចប់ភារកិច្ចបោសសម្អាតតំបន់មានគ្រាប់មីនទាំងអស់និងកាត់បន្ថយការគំរាមកំហែងជាអតិបរមាដោយសំណល់យុទ្ធភណ្ឌសង្គ្រាមនានានៅក្នុងប្រទេសកម្ពុជា៕
