លោកនាយករដ្ឋមន្ត្រី និងភរិយា នាពេលកន្លងមក។ រូបថត SPM
ភ្នំពេញៈ នៅក្នុងខួបអាពាហ៍ពិពាហ៍ គម្រប់ ៤៦ ឆ្នាំរបស់លោកនាយករដ្ឋមន្ត្រី ហ៊ុន សែន លោកបានស្នើទៅដល់គូស្រករដែលសម្រេចចិត្តលែងលះ ឬបែកផ្លូវគ្នា កុំធ្វើការបរិហារកេរ្តិ៍ ឬជេរប្រមាថគ្នាបង្ហោះតាមបណ្តាញសង្គមហ្វេសប៊ុកដើម្បីរក្សាកិត្តិយសឱ្យគ្នាទៅវិញទៅមក ជាពិសេសកិត្តិយសរបស់កូនៗ។ លោកបានថ្លែងបែបនេះ នៅក្នុងពិធីប្រគល់ប្រាក់រង្វាន់ជូនកីឡាការិនី អ៊ុក ស្រីមុំ ក្រោយដណ្តើមបានមេដាយមាសពិភពលោក ពីការប្រកួតកីឡាប៉េតង់នៅប្រទេសអេស្ប៉ាញនាព្រឹកថ្ងៃទី ៥ មករា ២០២២ នៅវិមានសន្តិភាព។
លោកមានប្រសាសន៍ថា៖ «ខ្ញុំស្នើសុំដូចនេះ តើយើងអាចទុកកិត្តិយសឱ្យគ្នាបានទេ? យ៉ាងហោចណាស់យើងក៏ធ្លាប់បានស្រឡាញ់គ្នា ទោះ ១ ម៉ោង ២ ម៉ោង ១ ឬ ២ ថ្ងៃ ១ ឬ ២ ខែ ១ ឆ្នាំ ឬ ២ ឆ្នាំហើយ ហើយបន្ថែមលើនោះថ្ងៃក្រោយ តើកិត្តិយសកូនរបស់យើងវានឹងទៅជាយ៉ាងណា»។
នៅពេលដែលមានការជេរប្រមាថគ្នា នៅពេលបច្ចុប្បន្ននេះ គេមើលងាយម្តាយឪពុក ប៉ុន្តែកូននឹងត្រូវបានគេមើលងាយនៅថ្ងៃក្រោយ ដែលធ្វើឱ្យមានការប៉ះពាល់អារម្មណ៍របស់កូនយ៉ាងធ្ងន់ធ្ងរ។ លោក ហ៊ុន សែន បានបញ្ជាក់បន្ថែមទៀតថា ប្រសិនបើមិនត្រូវរ៉ូវគ្នាហើយ គួរតែចែកផ្លូវគ្នាដោយស្ងាត់ស្ងៀម រាប់អានគ្នាជាធម្មតា និងបន្តជួយអាហារកិច្ចទៅដល់កូនរៀងៗខ្លួន។
.jpg)
លោក ហ៊ុន សែន បានថ្លែងថា៖ «សុំកុំហែកហួរគ្នា ជេរគ្នាតាមហ្វេសប៊ុកបានទេ សុំអង្វរករចំណុចនេះបន្តិចចុះ ដោយសារវាដូចជាជ្រុលពេក។ តើអាចទុកកិត្តិយសឱ្យគ្នាបានទេ? នេះជាសម្ដីរបស់អ្នកអប់រំដែលមានបទពិសោធក្នុងជីវិតឆ្លងកាត់ ៤៦ ឆ្នាំហើយ។ ចំណុចសំខាន់គឺខ្ញុំអាណិតកូនៗ តើថ្ងៃក្រោយវាគិតយ៉ាងម៉េច ហើយវាប៉ះពាល់ដល់អារម្មណ៍កូនៗ ដែលធ្វើឱ្យកូនមិនអាចរៀនសូត្របាន»។
លោក ឈត ប៊ុនថន មន្ត្រីស្រាវជ្រាវផ្នែកទំនាក់ទំនង វប្បធម៌ អប់រំ និងទេសចរណ៍នៃរាជបណ្ឌិត្យសភាកម្ពុជា បានគាំទ្រចំពោះការលើកឡើង និងជាគំនិតមួយដែលគូស្វាមីទាំងអស់គួរតែទទួលយក។
លោកបានប្រាប់ភ្នំពេញប៉ុស្តិ៍នៅថ្ងៃទី ៥ ខែមករាថា ជាធម្មតាប្តីប្រពន្ធមួយចំនួនមានការបែកបាក់គ្នា ឬមានជម្លោះជាមួយគ្នា ប៉ុន្តែទោះបីជាអស់និស្ស័យជាប្តីប្រពន្ធនឹងគ្នាក៏ដោយ ក៏មិនគួរណាជេរប្រមាថគ្នាជាសាធារណៈដូចនេះឡើយ។
លោក ឈត ប៊ុនថន ថ្លែងថា៖ «បើយើងសម្រេចថាបែកផ្លូវគ្នាហើយ គឺបែកតាមសន្តិវិធី តាមប្រពៃណី ផ្លូវច្បាប់ ហើយរក្សាកិត្តិយសឱ្យគ្នាទៅវិញទៅមក ជាពិសេសទុកកិត្តិយស សេចក្តីថ្លៃថ្នូរឱ្យកូនៗផងដែរ ដោយសារការហែកហួរគ្នាតាមបណ្តាញសង្គមហ្វេសប៊ុក វាមិនត្រឹមតែខូចកិត្តិយសតែប្តី ឬប្រពន្ធទេ តែវាប៉ះពាល់ទៅដល់កូនៗផងដែរ»។
លោក ប៊ុនថន ថា នៅពេលដែលមានបញ្ហា គួរតែនាំគ្នាដោះស្រាយស្ងាត់ៗដោយភាគីទាំង ២ បានហើយ កុំធ្វើការផ្សព្វផ្សាយជាសាធារណៈហើយសូម្បីតែអ្នកជិតខាងក៏គួរកុំឱ្យដឹងឮផងដែរ ដោយសារវាជារឿងឯកជន។
លោកនាយករដ្ឋមន្ត្រីក៏បានសរសេរនៅលើបណ្តាញសង្គមហ្វេសប៊ុករបស់លោកនាព្រឹកថ្ងៃទី ៥ ខែមករា ថា លោកតែងតែគិតថាអ្វីដែលលោក និងភរិយាបានឆ្លងកាត់ក្នុងសម័យសង្គ្រាមគឺពុំគួរឱ្យជឿថា លោកអាចមានជីវិតរហូតមកដល់សព្វថ្ងៃនេះឡើយ។ ជីវិតយុទ្ធជនក្នុងភ្លើងសង្គ្រាម ពិសេសក្នុងរបបប្រល័យពូជសាសន៍ ប៉ុល ពត ដែលត្រូវតស៊ូផ្ដួលរំលំដោយយកជីវិតធ្វើដើមទុន គឺមិនមែនជារឿងសាមញ្ញនោះឡើយ។
លោកថា៖ «ចាប់ផ្តើមពីប្តីប្រពន្ធដ៏កម្សត់វ័យក្មេង ២ នាក់ ដែលពេលនោះខ្ញុំមានអាយុ ២៤ ឆ្នាំ ឯភរិយាខ្ញុំ អាយុ ២២ ឆ្នាំ រហូតមកដល់ពេលនេះយើងមានកូន និងចៅយ៉ាងច្រើន ប៉ុន្តែនៅតែចងចាំជានិច្ចចំពោះជីវិតតស៊ូដ៏លំបាកបំផុតរបស់ខ្ញុំ និងភរិយាជាទីស្រឡាញ់»។ សៀវភៅគូព្រេងមិនព្រាត់ដែលលោកបានសរសេររៀបរាប់ពីជីវិតប្តីប្រពន្ធរបស់លោក ត្រូវបានបោះពុម្ពជាភាសាខ្មែរ អង់គ្លេស និងចិន។ រីឯ ភាពយន្តរឿងកូនប្រុសក្រោមពន្លឺព្រះច័ន្ទពេញបូណ៌មីក៏ចាប់ផ្តើមថត អាចប្រើរយៈពេល ១៤ ខែទើបអាចបញ្ចប់បាន៕
